Kua ni Yalana Nomu iTokani

Vu ni Leqa

Ena kuria ga noda veivakaduiduitaki, nida yawaki ira eda dau raicalataka. Ke da dau vakailala ga kei ira e sota noda mita, eda na rawa ni nanuma ni sa donu tu ga noda ivakarau ni rai, kei na ka eda cakava se vakila.

iVakavuvuli Vakaivolatabu

“Moni lomasavu.”—2 KORINICA 6:13.

Kena iBalebale: Na “lomada” e rawa ni vakaibalebaletaka na ka eda vakila kei na ka eda taleitaka. Ena qiqo gona na ivakarau ni lomada ke da taleitaki ira ga era tautauvata kei keda. Ena sega ni yaco qori ke da yalorawarawa ni veitokani kei ira era duidui vei keda.

Yaga ni Noda Veitokani kei Ira e Levu

Nida kilai ira vinaka eso tale, eda na qai taura rawa na vuna era duidui kina. Nida volekati ira, eda na sega ni kauaitaka na ka eda duidui kina. Eda na mareqeti ira ga, qai biuti keda ena kedra ituvaki ena gauna era marau se rarawa kina.

Kena ivakaraitaki o Nazaré. E dau vakaduiduitaki ira na toki yani ena nona vanua. E vakamacalataka na ka e qai veisautaka na nona rai: “Au cakacaka qai veimaliwai vakalevu kei ira. Au qai raica ni sega sara ga ni dina na veika era vosavakacacataki kina. Ni o veitokani gona kei na dua e duidui na vanua e cavutu mai kina, o na vulica mo kua ni veivakaduiduitaki. Ena qai tubu ga na nomu lomani ira qai mareqeti ira.”

Ka o Rawa ni Cakava

Saga mo veikilai vinaka kei ira e duatani na vanua era cavutu mai kina, matatamata kei na vosa. O rawa ni

Kerei ira mera vakamacalataki ira.
Sureti ira mo dou mai kanavata.
Rogoca vinaka na nodra italanoa qai saga mo kila na ka era dau kauaitaka vakalevu.

Ke o saga mo kila vinaka na vuna e va kina ya nodra itovo, ena qai donu nomu rai me baleti ira.

Ka e Yaco Dina: Kandasamy kei Sookammah (Kenada)

“Keirau susu e Sauca Aferika ena gauna e kaukaua sara tu ga kina na veivakaduiduitaki. Era vakasaurarataki na duikaikai mera kua ni veimaliwai, mera kua tale ga ni bula vata. Qori e uqeta vakalevu na veivakaduiduitaki. Keirau yago loaloa qai dua na ka na neirau cati ira na yago vulavula, ni so vei ira era dau beci keimami. Ena gauna ya keirau nanuma ga ni keirau vakaduiduitaki, ia keirau sega ni liaca ni keirau sa veivakaduiduitaki tiko.

“Keirau sa qai veisautaka na neirau rai, ni keirau saga me keirau lomasavu keirau qai veimaliwai tale ga kei ira na duikaikai. Ni keirau veimaliwai kei ira na yago vulavula keirau sa qai kila ni levu na ka keimami tautauvata kina. E tautauvata na keimami ituvaki kei na ka dredre keimami sotava.

“Dua mada ga na gauna balavu na neirau vakaicilitaki rau e dua na veiwatini yago vulavula. Keitou lai veikilai vinaka sara, yaco me keitou lai veitokani dredre. Qori sara ga na gauna e tekivu veisau kina na neirau rai me baleti ira na yago vulavula.”