Na Cava Eda Rarawa, Qase qai Mate Kina?

Rau Vakavuna na iMatai ni Tamata Meda Rarawa

“Ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca, mani dewa na mate vei ira na tamata kece ga.”—ROMA 5:12.

Na Kalou a buli rau na imatai ni tamata o Atama kei Ivi me uasivi na nodrau vakasama kei na yagodrau. E vakarautaka e dua na parataisi totoka e vuravura me rau tiko kina, e vakatokai na were o Iteni. E kaya ni rau rawa ni kana mai na vunikau kece, vakavo ga e dua. Ia rau qai kania o Atama kei Ivi na vuanikau vakatabui, rau mani valavala ca kina. (Vakatekivu 2:15-17; 3:1-19) Ni rau sa talaidredre, e vakatalai rau tani na Kalou mai na vanua totoka qori, rau tekivu vakila na dredre. Toso na gauna rau vakaluveni, ratou vakila tale ga na luvedrau na dredre. Eratou qase qai mate yani. (Vakatekivu 3:23; 5:5) Eda kawa ni vuvale qori, ya na vuna eda dau tauvimate kina, qase qai mate tale ga.

Era Vakavuna Tale ga na Noda Rarawa na Agilosi Ca

“E lewa tiko na vunica na vuravura taucoko.”—1 JONI 5:19.

Na “vunica” qori o Setani, e dua na agilosi a talaidredre vua na Kalou. (Joni 8:44; Vakatakila 12:9) Toso na gauna, era talaidredre eso tale na agilosi qai muri Setani. Era vakatokai mera timoni. O ira na yalovelavela qo, era vakayagataka na nodra kaukaua mera vakacalai ira na tamata mera talaidredre vua na Dauveibuli. Era vakacalai ira e levu mera cakava na ka ca. (Same 106:35-38; 1 Timoci 4:1) E dau taleitaka o Setani kei ira na timoni meda vakila na rarawa kei na mosi.

Eso na Gauna e Bale ga Vei Keda Noda Rarawa

“Na ka kece e kaburaka e dua ena tamusuka tale ga.”—KALATIA 6:7.

Eda dau rarawa nida kawa ivalavala ca, kei na nona veivakacalai o Setani ena vuravura qo. Ia so na gauna e bale ga vei keda na noda rarawa. Ena sala cava? Nida vakatulewa cala se cakava na ka ca. Ia nida cakava na ka vinaka, eda na vakila na kena yaga. Kena ivakaraitaki, na tagane vakawati se tama e dau dina, cakacaka vakaukaua qai lomana nona vuvale, ena vakila na kena vinaka, ratou na marau tale ga na nona vuvale. Ia ke dau veimauilavo, mateni, se vucesa, ena rawa ni dravudravua nona vuvale. E vinaka gona meda dau talairawarawa vua na Dauveibuli. E vinakata meda marautaka e levu na ka vinaka, qai vakila “e levu sara na . . .  vakacegu.”—Same 119:165.

Eda sa Bula tu ena “iOtioti ni Veisiga”

“Na iotioti ni veisiga, . . .  [era] na dau lomani ira ga na tamata, era na lomana na ilavo, . . .  era na talaidredre vei ira nodra itubutubu, . . .  era na sega ni lewa vinaka na yalodra, era na voravora, era na sega ni vinakata na ka e dodonu.”—2 TIMOCI 3:1-5.

Qori sara ga na itovo eda raica vei ira e levu nikua. E vakadinadinataka ga nida sa bula tu ena “iotioti ni veisiga” ni vuravura ca qo. E parofisaitaka tale ga na iVolatabu ni na yaco na ivalu, leqa ni kakana, uneune kaukaua, kei na tauvimate. (Maciu 24:3, 7, 8; Luke 21:10, 11) Na veika kece qori e vakavuna e levu na rarawa kei na mate.