Mai na Buli ni Veika me Yacova na Waluvu

E vu mai vei na lomalagi kei na vuravura? E mai tu vakacava na matanisiga, vula, kalokalo, kei na levu tale na ka e tu e vuravura? E kaya na iVolatabu ni a buli ira na Kalou. Na noda ivola e tekivu ena italanoa ni bulibuli ena iVolatabu.

Eda vulica, ni Kalou a buli ira taumada na veika bula vakayalo era vakataki koya. Era agilosi. Ia a buli na vuravura me baleti keda na tamata. Sa qai bulia na Kalou na tagane kei na yalewa, o Atama kei Ivi qai biuti rau ena dua na were totoka. Ia rau a talaidredre vua na Kalou, rau mani mate kina.

Mai na gauna a buli kina o Atama me yacova na Waluvu levu, e rauta ni 1,656 na yabaki. Ena loma ni gauna oqo era bula kina na tamata ca. Era tu mai lomalagi na veika bula vakayalo tawarairai, o Setani kei ira na nona agilosi ca. E vuravura o Keni kei na levu na tamata ca, vaka kina e so na tamata kaukaua sara. Ia era a tu tale ga e vuravura e so na tamata vinaka​—o Epeli, Inoki kei Noa. Ena iWasewase DUA eda na wilika kina na veika e baleti ira kece na tamata oqo kei na veika e yaco.