Na Drua Erau Duidui

ERAU duidui na gonetagane oqo, se vakaevei? O kila na yacadrau? E dau tobo manumanu o Iso, ia o Jekope e dau vakatawa sipi.

Erau drua tagane i Aisake kei Repeka. E dau taleitaki Iso vakalevu na tamadrau o Aisake, ni matai ena vakasasa manumanu qai dau kauta mai me kedratou. Ia e lomani Jekope sara vakalevu o Repeka ni galugalu tu ga qai itovo vinaka.

A se bula tale tiko ga na tukadrau o Eparama, da qai rawa ni vakasamataka nona dau via rogo italanoa me baleti Jiova o Jekope. A qai mate o Eparama ni sa yabaki 175, rau yabaki 15 tiko kina na drua.

Na gauna e yabaki 40 kina o Iso a vakawatitaka e rua na yalewa ni Kenani. Rau rarawa dina vakalevu o Aisake kei Repeka, ni rau sega ni sokaloutaki Jiova na yalewa oqo.

Dua na siga a yaco e dua na ka e vakavuna me rarawataki Jekope kina o Iso. Oqo na gauna e tauca kina o Aisake nona vosa ni veivakalougatataki vei koya e ulumatua. Ni ulumatua o Iso, a namaka me na tau vua. Ia, a sa volitaka nona itutu vakaulumatua vei Jekope. A sa tukuna oti tale ga na Kalou ena gauna rau se qai sucu kina na drua ni na tau vei Jekope na vosa ni veivakalougatataki. Oqo sara ga na ka a qai yaco. A vosa vakalougatataki Jekope o Aisake.

Ni qai rogoca o Iso na ka oqo, e rarawataki Jekope dina. Na levu ni nona cudru e kaya sara ga ni na vakamatei koya. A lomaleqa sara vakalevu o Repeka ni rogoca. Mani tukuna vei Aisake na watina: ‘Sa na qai ca tale ga vakalevu ke mai wati Jekope e dua na yalewa ni Kenani.’

A kacivi Jekope o Aisake qai kaya vua: ‘Kua ni vakawatitaka e dua na yalewa ni Kenani. Lako ina vale i tukamu o Pecueli i Karana. Me lai watimu e dua na luve i Lepani.’

A rogoci tamana o Jekope qai sega tale ni wawa, ni sa tekivuna na nona ilakolako balavu vei ira na wekana i Karana.