Lako i Karana o Jekope

O KILAI iratou na tamata eratou veivosaki tu oqori kei Jekope? A sotavi iratou o Jekope ena dua na ikeliwai ni oti nona lako voli mai ena vica vata na siga. Eratou vakatawa tiko nodratou sipi. Sa qai tarogi iratou o Jekope: ‘Dou lako mai vei?’

Ratou kaya, ‘Keitou lako mai Karana.’

A taroga tale o Jekope, ‘Dou kilai Lepani?’

Ratou sauma yani, ‘Keitou kilai koya. Raica, qori na luvena yalewa o Rejeli kei na qelenisipi i tamana.’ O raici Rejeli ni lako tiko mai?

Ni raici Rejeli kei na sipi i Lepani na vugona o Jekope, a lai tosoya laivi sara na vatu ena ikeli mera gunu na sipi. A reguci Rejeli qai vakamacalataki koya. E lai tukuna sara o Rejeli ena marau vei Lepani na tamana.

E marau vakalevu o Lepani ni mai tiko vata kei koya o Jekope. A marautaka tale ga ni kerea o Jekope me vakamautaki Rejeli. Ia, e kaya vei Jekope me cakacaka mada e liu me vitu na yabaki. A sega ni ca vei Jekope na cakacaka ena iteitei nei Lepani ni sa rui vinakati Rejeli vakalevu. Ia, ni yaco mai na gauna me rau sa vakamau kina, o kila na cava a qai yaco?

A soli Lia na luvena qase o Lepani, sega ni o Rejeli. Ni vakadonuya o Jekope me cakacaka tale ena vitu na yabaki, sa qai soli Rejeli me watina. Oqori na gauna e se vakatara tu kina na Kalou me levu na watidra na tagane. Ia ena gauna oqo, e tukuna na iVolatabu ni dodonu me dua ga na watina na tagane.