Va na Cauravou e Papiloni

E KAUTI ira kece na tamata vuli vinaka ni Isireli o Nepukanesa i Papiloni. Ia mai na kedra maliwa oqo sa qai digitaka na tui na cauravou era rairai totoka qai ulu vinaka duadua. Le va eratou laurai ena iyaloyalo oqori. Dua o Taniela, ia o iratou na nona itokani ra vakayacani iratou na Papiloni me o Setareki, Mesaki, kei Apetiniko.

E vinakata o Nepukanesa mera vakavulici na ilawalawa cauravou oqo mera veiqaravi e vale levu. Ni sa na oti nodra vuli yabaki tolu ena qai digitaki ira na cauravou vuku duadua mera nona ivukevuke. E vinakata na tui mera kaukaua qai bulabula na cauravou ena nodra vuli. Mani vakarota kina me soli vei ira na cauravou kece na kakana vinaka kei na waini e dau soli vei koya kei na nona vuvale.

Raici Taniela mada. O kila se cava e kaya tiko vei Asipinasi na iliuliu ni dauveiqaravi i Nepukanesa? E kaya tiko o Taniela ni sega ni via kania na ivotavota kakana mai vua na tui. E lomaleqa kina o Asipinasi qai kaya: ‘Sa lewa mai na tui na ka mo dou kania se gunuva. Ia ke dou sega ni rairai bulabula me vakataki ira na vo ni cauravou, ena rawa ni vakamatei au kina na tui.’

Sa qai kaya o Taniela vei koya e lesia o Asipinasi me nodratou ivakatawa: ‘Vakatovolei keitou mada me 10 na siga. Solia wale ga vei keitou na kakana draudrau kei na waidroka. Oti, mo lewa se o cei e bulabula, o keitou se o ira na kania tiko na ivotavota mai vua na tui.’

E vakadonuya na ivakatawa na kerekere oya. Ni oti e 10 na siga, e laurai ni ratou bulabula cake o Taniela kei na nona itokani le tolu. Sa qai vakatara na ivakatawa me ratou kania tiko ga na kakana draudrau.

Ni oti e tolu na yabaki era kau kece vei Tui Nepukanesa na cauravou. Ni vosa oti vei ira, e raica rawa ni ratou vuku duadua o Taniela kei iratou nona itokani. Eratou digitaki sara kina me ratou daunivakasala vua. Na gauna e dau taro ivakasala kina ena so na leqa dredre e raica rawa ni vakatinitaki na nodratou kila ni vakatauvatani kei ira na bete kei na tamata vuku ni Papiloni.