Marau Tiko qai Vakacaucautaka Tiko na Kalou ena Soqo Lelevu

Mai na veiyabaki sara ni 1880, era sa raica rawa na Gonevuli ni iVolatabu na yaga ni soqoni tale e so, ena kauti ira vata mai na nodra itokani vakabauta ena so tale na vanua mera mai veikilai kina. Era mani tuva kina na soqo vakayabaki mera soqo vata mai kina na Gonevuli ni iVolatabu mai na veiyasa i Mereke, e muri ra qai sureti tale ga mai Canada. E gauna ni veivakabulabulataki vakayalo oya; e rogoci ena loma ni vica na siga e levu sara na ivakasala vakaivolatabu, ra qai marautaka na gauna vinaka ni veivakayaloqaqataki o ira kece na tiko e kea. E yaco me ivakarau tudei ena soqo lelevu na nodra papitaiso o ira na vakabauta vou. E gauna vinaka tale ga na soqo lelevu mera rogoca kina e levu sara na lewenivanua na itukutuku vinaka.—Roma 1:11, 12.

Era dau sotasota wasoma edaidai na iVakadinadina i Jiova ena soqo lelevu. Ena iwasewase e vakatokai na tabacakacaka, era na biu vata kina e rauta ni le 18 ina 25 na ivavakoso, ra qai dau sikova se qarava na ivakatawa dauveilakoyaki. Ena dua na yabaki ena dau soqo kina vakarua e dua na tabacakacaka, se dua na iwase ni tabacakacaka oya, ena Vakarauwai kei na/se Sigatabu.

Ena dua na yabaki ena veimatanitu, e tuvai vakadua ga na soqo lelevu cake e vakatokai na soqo ni tikina, era dau soqo vata mai kina ena dua na vanua e vica na udolu. Na soqo lelevu vaka oqo e tarai ira cake vakayalo na iVakadinadina i Jiova kei ira tale e so era taleitaka nodra cakacaka, era ivakadinadina vinaka tale ga vei ira na vakararai tu.

Na porokaramu ni soqo lelevu oqo e vakarautaka na iLawalawa Dauvakatulewa ni iVakadinadina i Jiova qai yavutaki ena veika e ganiti ira dina na iVakadinadina ena veiyasa i vuravura. E lewe ni porokaramu na ivunau, veivosaki, kei na vakatasuasuataki ni veika e yaco dina ena noda bula ni veisiga, era vosa kina na ivakatawa dauveilakoyaki kei na iVakadinadina matua mai na veivavakoso. Era dau vakasavuirogorogo tale ga e so ena veika era sa vakayacora tiko mera taqomaka kina nodra bula vakarisito ena vuravura tawavakalou, se ra talanoataka na veika era sa rawata tiko ena cakacaka vakaitalatala. E dau vakayacori e dua tale na ka ena soqo ni tikina, oya na drama vakaivolatabu se drama e baleta na bula ena gauna sara ga oqo, e saravi kina na nodra valuta na leqaleqa ni bula edaidai na lotu Vakarisito.

E rawa ni gauna vinaka ni veimaliwai oqo ni se cegu tu na soqo. Na cakacaka kece ni kena cicivaki na soqo era vakayacora ga o ira na iVakadinadina i Jiova era bole. Na isau ni valenisoqo kei na veika tale e so e saumi ga ena ilavo e cautaki ena lomasoli. E sega ni saumi na mai vakarorogo, e sega tale ga ni kau wavoki na veleti ni soli.

Ke o taro ina nodra ivavakoso voleka na iVakadinadina i Jiova, o na kila mai kina na gauna kei na vanua ni soqo vaka oqo ena vanua o vakaitikotiko kina. E rawa ni tarogi tale ga na ituvatuva e so ni vakavodo ina vanua ni soqo, kei na veika e baleta na vakaicili.

Na soqo lelevu oqo e yaga vei ira na iVakadinadina i Jiova kei ira na dau veimaliwai kei ira mera kua ni raica tiko ga kina na nodra ivavakoso, ia mera raica ra qai kila ni tiko e vuravura kece nodra ilawalawa veiwekani.​—1 Pita 2:17.

• E yaga vakacava vei ira na Gonevuli ni iVolatabu taumada na nodra soqo lelevu?

• Vakamacalataka na kena tuvai kei na kena vakarautaki na porokaramu ni soqo ni tabacakacaka kei na soqo ni tikina.

[iYaloyalo ena tabana e 18]

Na drama vakaivolatabu ena soqo ni tikina mai Mereke

Soqo ni veimatanitu, Poladi

Soqo ni veimatanitu, Argentina

Soqo ni tabacakacaka, Japani

Era tauri ivola vakaivolatabu tiko na mata ni soqo mai Suwitisiladi

Na papitaiso ena soqo ni veimatanitu, Sauca Aferika

Kacivaki na ivola vakaivolatabu tabaki vou, Canada

Lagasere tiko na mata ni soqo ni tikina, Sipeni