Soqo ni Veimatanitu ena 2003
A VAKAYACORI ena siga Vakarauwai, 6 Okotova, 2001, na nodra bose vakayabaki na lewe ni Watch Tower Bible and Tract Society of Pennsylvania mai Jersey City, New Jersey, e Mereke. Ni oti na bose era marautaka na lewena kei ira na sureti e dua na porokaramu lavotaki. Ena siga e tarava, a vakayacori kina na ikuri ni soqo oqo ena va tale na vanua e Canada kei Mereke, ni sa cava na iotioti ni vunau eratou qai vakarogoya na iLawalawa Dauvakatulewa ni iVakadinadina i Jiova na itukutuku oqo:
“Nida sa rai vakanamata tu yani i liu, e bibi kina vei ira kece na tamata ni Kalou mera kua ni biuta na vakasosoqonivata. Na tikina oqo e veivakauqeti kina na yapositolo o Paula me lako vata kei na noda dau veivakayaloqaqataki, me vakalevu nida kila ni sa voleka na siga levu qai rerevaki i Jiova. (Iperiu 10:24, 25) Me salavata kei na ivakaro ena iVolatabu, eda nuitaka me vakayacori na Soqo ni Tikina ena veiyasa i vuravura ena yabaki mai oqo [2002]. Ia ena yabaki 2003, kevaka e loma i Jiova, ena rawa ni vakayacori na Soqo ni Veimatanitu lavotaki ena so na vanua e vuravura. Oqo sara ga na gauna ni yadra kei na vakatawa, me yalomatuataki kina na veika sa yaco tiko e vuravura.”
Dina ga ni sa qai levu tiko ga na veilecayaki kei na leqa ni sa vakarau mai cava na ivakarau ni veika nikua, ena toso tiko ga i liu na nodra cakacaka na tamata ni Kalou. Na itukutuku vinaka ni Matanitu ni Kalou, okati kina na veivakasalataki ni iVolatabu, me vunautaki ina veimatanitu, veimataqali kei na duivosavosa kei ira na tamata, mera ‘rerevaka na Kalou, ka vakarokoroko vei koya ni sa toro voleka mai na nona siga ni lewa.’ (Vakatakila 14:6, 7) Me salavata ga na inaki kei na lewa vinaka ni Tamada vakalomalagi, e sa lalawataki tiko ena so na vanua e vuravura na soqo ni veimatanitu ena yabaki 2003.
E se bera tiko ni vakadeitaki na kena vakayacori na soqo oqo ena so na vanua e Noca Amerika kei Urope. Ena tuvanaki e so na ilawalawa mera na lako ina so na vanua e Esia; ni via cava yani na yabaki, e so tale era na lako i Aferika, Sauca Amerika kei na so na vanua ena Pasifika. Era na kerei e so na valenivolavola ni tabana mera vakauta e so na ilawalawa me vakaiyalayala ga na kedra iwiliwili, ena sega gona kina ni caka raraba tu na veisureti. Ia, ena ka ni veivakayaloqaqataki nodra na lako na ilawalawa oqo mera mata ni nodra vanua ina veivanua ena caka kina na soqo.
Ena sega ni dede era sa na taura na veivavakoso ni iVakadinadina i Jiova na ivakamacala ni soqo oqo. Ena tiko ena dui valenivolavola ni tabana na ivakamacala ni tikinisiga kei na vanua mera na lako kina na sureti ina soqo. E kerei mo ni kua ni volavola mai se vakataroga na veika me baleta na soqo ena gauna oqo.
O ira na ilawalawa era na digitaki, era iVakadinadina era sa yalataki ira ra qai papitaiso, mera ivakaraitaki vinaka ra qai vakaraitaka na loloma vakaveitacini vei ira na tacida ena veivanua era na gole kina. O ira tale ga na tacida era tiko ena veivanua oqori era na kidavaki ira na vulagi ra qai vakacegui ira dina. (Iperiu 13:1, 2) Oqo ena rawa kina na ‘veivakacegui.’ (Roma 1:11, 12) Na ikuri tale ni ivakamacala ni soqo ena tiko ena valenivolavola ni tabana e sureti me vakauta e so na ilawalawa ina dua se na vica na vanua.
Me vaka ga na kena ivakarau, ena tuvanaki ga ena veivanua na soqo ni tikina siga tolu ni yabaki 2003. Noda soqoni vata vaka oqo, eda na ‘vakarorogo, vuli qai vakayaloqaqataki’ kina. (Vakarua 31:12; 1 Korinica 14:31, VV) Oqo me solia vei ira na tamata ni Kalou mera “tovolea mada ka raica ni sa yalovinaka ko Jiova.” (Same 34:8) Na soqo ni veimatanitu kece kei na soqo ni tikina, era na tiko kina na daukaulotu, e so era na vakaitavi tale ga ena porokaramu.
Eda na marautaka tiko ena yabaki oqo na Soqo ni Tikina na “Dauvunau Gugumatua ni Matanitu ni Kalou,” eda na uqeti kina meda vakalevutaka na noda cakacaka vakavunau. Nida cakava oqo, eda na rai vakanamata tu ina veika e sa vakarautaka tu o Jiova ena yabaki mai oqo. Ena vukei keda tale ga meda ‘yadra tiko qai tu vakarau’ ena gauna dredre eda bula tu kina nikua.—Maciu 24:42-44.