Taro na Dauwiliwili . . .

O Cei a Dusimaka na “Kalokalo”?

▪ O sa bau raica e dua na ivakatakarakara se drama ni nona davo koto na gone sucuvou o Jisu ena valenimanumanu ratou qai sikovi koya yani e tolu na tui se tamata vuku? E tukuni ena kena italanoa ni dusimaka na Kalou e dua na kalokalo me liutaki ratou ina valenimanumanu mai Peceliema. Ena so na vanua, era vakavulici e levu na gone mera wiligusutaka na yacadratou na tolu na tui ya—Melchior, Caspar, kei Baltazar. Ia e duavata beka kei na ka e kaya na iVolatabu na italanoa kilai levu ya? Sega, e levu na ka e veicalati kina.

Kena imatai, o cei eratou sikovi Jisu? Ena vosa taumada vaKirisi, e sega ni tukuna na iVolatabu ni ratou tui se tamata vuku, ia eratou dauraikalokalo. Kena irairai ni ratou muria na ivalavala butobuto ni kena kilai na ka vuni ni raici na veitosoyaki ni kalokalo. E sega ni cavuti ena iVolatabu na yacadratou se na kedratou iwiliwili na sikovi Jisu.

Kena ikarua, na gauna cava eratou veisiko kina? Eratou sega ni sikovi Jisu ena valenimanumanu ni se gonedramidrami. Eda kila vakacava qori? E vola ena Kosipeli o Maciu: “Ni ratou curu i vale eratou raica na gone kei Meri na tinana.” (Maciu 2:11) E tukuna na iVolatabu ni sa dua toka na ‘gonetagane lailai’ o Jisu ena gauna eratou sikovi koya kina na dauraikalokalo, sega ni gonedramidrami. Erau sa sega ni tiko ena gauna qori ena valenimanumanu o Josefa kei Meri; erau sa tiko ena dua na vale.

Kena ikatolu, o cei a dusimaka na “kalokalo” me liutaki ratou na dauraikalokalo? Era dau vakavulica na italatala ni veimatalotu nikua ni a dusimaka na “kalokalo” na Kalou. E dina qori? Nanuma tiko na “kalokalo” a sega ni kauti ratou e liu na dauraikalokalo i Peceliema. Ia a kauti ratou i Jerusalemi vei Tui Eroti. Ni ratou tukuni Jisu vua na turaga yaloca qai daulaba qori, sa qai kaukaua ga na nona cata na gone ena “nodra tui na Jiu.” (Maciu 2:2) A saga vaqaseqase o Eroti me ratou mai tukuna tale vua na dauraikalokalo na vanua eratou raica kina na gone, me rawa ni lai veisiko tale ga. Ia na “kalokalo” a qai dusimaki ratou vei rau o Josefa kei Meri. Ke a sega ni cakava e dua na ka na Kalou, a rawa sara ga ni ratou vakaleqa na bula i Jisu na dauraikalokalo. A katakata o Eroti ni ratou sega ni lesu yani vua na dauraikalokalo qai vakarota mera vakamatei kece na gonetagane era yabaki rua lako sobu e Peceliema kei na veivanua volekata.​—Maciu 2:16.

A qai tukuna ena dua na gauna e muri o Jiova ni o Jisu na ‘Luvena lomani, e vakadonuya.’ (Maciu 3:17) Vakasamataka mada: Ena rawa beka vua na Tama dauloloma e dau caka dodonu, me digitaka mera nona italai na dauraikalokalo lotu butobuto ra qai daurairai, na ka sara ga e vakatabui ena nona Lawa? (Vakarua 18:10) Ena dusimaka beka e dua na kalokalo me kauti ratou vua na turaga rerevaki duadua ena nona vanua qai daulaba, me ratou lai tukuna vua na itukutuku ena yaloca qai vuvu ga kina vakalevu? Ena dusimaka tale ga na Kalou na kalokalo vata ga qori kei ratou na dauraikalokalo me ratou vakaraitaka na vanua e davo toka kina na luvena e sega ni taqomaki koya rawa?

Kena ivakaraitaki: Ena tala na turaganivalu vinaka na nona sotia naba dua ena vanua rerevaki era tiko kina na meca. Vakacava ena tukuna vei ira na meca na vanua e tiko kina nona sotia? Sega. E va tale ga qori o Jiova, a tala mai na Luvena ena vuravura rerevaki qo. Ena vakaraitaka beka vua na tui ca o Eroti na vanua e davo tiko kina na Luvena e sega ni taqomaki koya rawa? Ena sega vakadua ni cakava qori!

Ia o cei ga a dusimaka na “kalokalo” se na ka e vaka na kalokalo? O cei e vinakata vakalevu me vakamatei o Jisu, me muduki koso na nona bula me kua kina ni vakayacora na ka e talai mai kina i vuravura? O cei e veivakacalai qai bukana tiko na lasu, ivalavala voravora, kei na veivakamatematei? O Jisu a vakatakilai koya qori me o Setani na Tevoro na “daulasulasu, e tama ni lasu kece,” a “daulaba . . . mai na ivakatekivu.”​—Joni 8:44.