Wase e 13

Vuli Maina Veretaki i Jisu

NI PAPITAISO oti ga ko Jisu, sa kauti koya sara yani na yalo tabu ni Kalou ki na vanua liwa mai Jutia. E levu na ka e vakasamataka ni a “tadola mai na lomalagi,” ena gauna a papitaiso kina me rawa ni vakadigova kina na veika vakalomalagi. E dina sara ni levu na veika me vakananuma!

E tiko voli mai na vanua lala ko Jisu ena 40 na siga ka 40 na bogi ka e sega na ka me bau kania ena gauna kece oqo. Ia ni sa viakana vakalevu ko Jisu, sa qai toro yani vua na Tevoro me veretaki koya, ka kaya: “Kevaka ko sa luve ni Kalou, mo kaya mada me vuki mei buli madrai na veivatu oqo.” Ia e kila ko Jisu ni cala me vakayagataka nona kaukauwa vakacakamana me vakaceguya ga na veika e gadreva. A cata gona o koya me veretaki.

Ia, e sega ni soro koso na Tevoro. Sa qai tovolea e dua tale na i walewale. E bolei Jisu me rika sobu mai na lalaga ni valenisoro ni ra na vakabulai koya na agilosi ni Kalou. Ia, a sega ni via cakava ko Jisu e dua na ka mataliataki vakaoqori. Sa qai cavuta na i Vola Tabu ka vakaraitaka ko Jisu ni cala me vakatovolei ena sala oqo na Kalou.

Ena i katolu ni nona veretaki, sa qai vakaraitaka ena dua na sala veivakurabuitaki na Tevoro vei Jisu na veimatanitu kecega e vuravura ka vaka: “A ka kecega oqori ka’u na solia vei iko, kevaka ko na cuva sobu ka vakarokoroko vei au.” Ia e sega ni via soro koso ko Jisu me cala ena veiveretaki oqo, e digia me yalodina tikoga vua na Kalou.

Eda rawa ni vuli mai na veretaki oqo i Jisu. Era vakaraitaka, ni Tevoro e sega ni i vakaraitaki ni ka ca, me vaka era kaya e so na tamata, ia e dua dina na ka tawarairai. Na vakatovolei i Jisu e vakaraitaka talega ni veimatanitu kece e vuravura era i yau taukeni ni Tevoro. Me qai dina ga vakacava na veiveretaki o ya ena nona soli ira vei Karisito kevaka me ra a sega dina ga ni nona na Tevoro?

Ia vakasamataka mada oqo: Ni kaya na Tevoro ni lomasoli me vakaicovitaki Jisu ke dua ga na i vakaraitaki ni sokalou me cabora vua, me solia vua na veimatanitu kece e vuravura. Rairai ena saga me veretaki keda ena sala vata ga oqo na Tevoro, ena viritura e matada na vakanuinui kamikamica me da rawata na i yau, kaukauwa, se na i tutu vakavuravura. Ia e lomavukutaki dina me da muria na i vakaraitaki i Jisu me da yalodina vua na Kalou ka veitalia ga na vere cava! Maciu 3:16; 4:1-11; Marika 1:12, 13; Luke 4:1-13.

▪ Na cava na veika e rairai vakananuma voli ko Jisu ena loma ni 40 na siga e tiko voli kina mai na vanua liwa?

▪ A tovolea vakacava na Tevoro me veretaki Jisu?

▪ Na cava eda vulica rawa mai na veretaki i Jisu?