Vakatovolei Jisu na Tevoro

Ni papitaiso oti ga o Jisu, e dusimaki koya sara na yalo tabu ina vanua talasiga. E sega ni kana me 40 na siga. Oti qori, dua na ka nona viakana. E lai temaki Jisu sara na Tevoro, e kaya vua: ‘Ke o Luve dina ni Kalou, vukica na vatu qo me ibuli madrai.’ Ia e sauma o Jisu ni cavuqaqataka e dua na tikinivolatabu: ‘E volai ni sega ni bula na tamata ena kakana wale ga. E bibi me rogoca na vosa kece e tukuna o Jiova.’

E vakatovolei Jisu tale na Tevoro: ‘Ke o Luve dina ni Kalou, mo lade mai na vanua cecere duadua ena valenisoro. E volai ni na tala na Kalou nona agilosi mera keveti iko.’ E cavuqaqataka tale o Jisu e dua na tikinivolatabu: ‘E volai mo kua ni vakatovolei Jiova.’

E qai vakaraitaka vei Jisu o Setani na veimatanitu kece e vuravura, na kedra lagilagi kei na kedra iyau, e kaya sara: ‘Au na solia vei iko na veimatanitu kece qori kei na kedra lagilagi ke o sokalou ga vakadua vei au.’ Ia e sauma o Jisu: ‘Lako tani Setani! E volai mo sokalou duadua ga vei Jiova.’

E biuti koya na Tevoro, era qai lako vei Jisu na agilosi mera solia vua na kena. E vunautaka sara o Jisu na itukutuku vinaka ni Matanitu ni Kalou, na cakacaka e talai mai kina e vuravura. Levu era taleitaka ra qai muri koya e veivanua.