Wase e 15

I Matai ni Cakamana i Jisu

SE QAI oti beka ga e dua se rua na siga me ratou mai i sevu ni tisaipeli i Jisu ko Adriu, Pita, Joni, Filipi, Nacanieli, kei Jemesa tale beka ga. Sa ratou lako yani oqo ki na yasayasa va-Kalili, na vanua eratou lako kece mai kina. Ko Kena na vanua eratou lako tiko kina, na koro i Nacanieli, e koto ena veidelana ka sega ni yawa sara mai Nasareci, na vanua a susugi kina ko Jisu. Eratou sureti ki na magiti ni vakamau mai Kena.

A lako talega na tina i Jisu ki na vakamau. Ni veikilai voleka sara kei na vuvale ni vakamau, e rairai vakaitavi ko Meri ena nona qarava na veika era gadreva e lewe vuqa na vulagi. E totolo sara na nona kunea ni dua na ka sa lailai, e laki tukuna sara vei Jisu: “Sa sega vei ira na waini.”

Ni tukuna oqo ko Meri, e vaka me vakatura tiko me cakava kina e dua na ka ko Jisu ni sa lailai na waini, taumada e sega ni via cakava kina e dua na ka ko Jisu. “A cava vei iko kei au?” e taroga. Me vaka ni Tui lumuti ni Kalou e sega ni dodonu me lewai koya ena nona cakacaka e dua vei ira na nona vuvale se i tokani. Ena lomavuku i Meri e laiva kina na veika oqo ena liga i luvena, sa qai tukuna ga vei ira era veiqaravi tiko: “A ka kecega sa kaya vei kemudou ko koya, dou kitaka.”

Io, e ono na saqa ni wai vatu e tu kina, e rawa ni maroroi yadua kina e sivia e vasagavulu na lita wai. Sa qai vakasalataki ira era veiqaravi kina ko Jisu: “Vakasinaita na saqa ni wai e na wai.” Era vakasinaita vutuvutu na dauveiqaravi. Sa qai kaya ko Jisu: “Dou qai takiva, ka kauta vua sa lewa na magiti.”

E kurabuitaka o koya e lewa na magiti na totoka ni waini, e sega tiko ni kila ni a cakamanataki. Sa qai kaciva mai na tagane vakawati vou, ka vaka: “A tamata yadua sa dautauca eliu na waini vinaka; ia ni ra sa gunuva vakalevu na tamata, sa qai muri na waini sa vinaka vakalailai ga: ia ko iko, ko sa maninitaka na waini vinaka me yacova na tiki-ni-siga oqo.”

Oqo na i matai ni cakamana i Jisu, ia ni ratou sa raica, sa qai vakataudeitaka nodratou vakabauta na nona tisaipeli vou. Ni oti oqori, sa ratou qai lako yani o tinana kei iratou na tacina vakacabecabe ki na koro ko Kapenaumi e koto volekata na Wasawasa ko Kalili. Joni 2:1-12.

▪ Na gauna cava ena cakacaka vakaitalatala i Jisu e caka kina na vakamau mai Kena?

▪ Na cava e saqata kina ko Jisu na ka e vakatura o tinana?

▪ Na cakamana cava e vakayacora ko Jisu, ia e cakayaco vakacava vei ira na tani?