Wase e 20

iKarua ni Cakamana ni Tiko Voli mai Kena

ENA gauna e lesu kina ko Jisu ki na yalava a vakaitikotiko kina ni oti nona vakarabailevutaka nona cakacaka vakavunau mai Jutia, e sega ni laki vakacegu. Ia e tekivu me toroya cake nona cakacaka vakaitalatala mai Kalili, na vanua a tubu cake mai kina. Ia o ira na nona tisaipeli, era sega ni mai tikovata kei koya, era lesu ki na nodra i tikotiko vei ira nodra vuvale kei na nodra cakacaka e liu.

Na i tukutuku cava e sa tekivu vunautaka ko Jisu? Oqo: “Sa voleka na matanitu ni Kalou; dou veivutuni, ka vakabauta nai tukutuku-vinaka.” Ia e vakacava na nodra ciqoma? Era rogoci Jisu na kai Kalili. Era vakarokorokotaki koya na tamata kecega. Ia, oqo e sega ni vakavuna vakatabakidua na nona i tukutuku, ia ena vuku ni lewe vuqa era a tiko ena Lakosivia mai Jerusalemi ena vula vica yani ki liu ka ra raica na cakacaka veivakurabuitaki a vakayacora o koya.

E rairai tekivuna mai Kena ko Jisu na nona cakacaka vakaitalatala levu vei ira na kai Kalili. Ena dua na gauna e liu, o rawa ni nanuma, ena nona lesu tiko mai Jutia, a vukica na wai me waini ena dua na magiti ni vakamau a vakayacori mai kea. Ena i karua ni gauna oqo, na nona davo bibi tiko na luvena e dua na vakailesilesi vakamatanitu i Tui Eroti Anitipasa. Ni rogoci Jisu ni lako mai Jutia ki Kena, sa qai lakova e dua na i lakolako balavu sara na vakailesilesi oqo mai na nona vale e Kapenaumi me laki raici Jisu. Ena levu ni nona vutugu, sa qai vakamamasu na tagane: ‘Yalovinaka mo ni lako totolo mai, ni bera ni ciba na luvequ.’

E sauma yani ko Jisu: ‘Mo lesu ki vale. Sa vakabulai na luvemu!’ E vakabauta na vakailesilesi i Eroti ka lesuva tale na i lakolako balavu ki nona vale. Ni lako tiko e sala sa mai tavaki koya na nona dauveiqaravi, ka ratou lako vakariri mai me ratou tukuna ni sa oti na leqa​—⁠sa bula vinaka tale na luvena! ‘Na gauna cava sa bula vinaka tale kina?’ e taroga o koya.

‘E nanoa ena 1:00 ena yakavi,’ eratou sauma.

Sa kila sara na vakailesilesi ni gauna oqori a kaya kina ko Jisu, ‘Sa vakabulai na luvemu!’ Ni oti oqori, sa qai yaco na tagane oqo kei iratou kece na nona lewe ni vale me ratou tisaipeli i Karisito.

A mani yaco ko Kena me vanua kalougata ni a cakamana vakarua kina ko Jisu me vakatakila na nona sa lesu mai Jutia. E sega ni se qai o rau ga oqo na cakamana me vakayacori me yacova mai na gauna oqo, ia e rau bibi ka ni rau vakatakilakilataka na nona lesu mai Kalili.

Sa lesu yani oqo ko Jisu ki Nasareci na nona koro. Na cava sa waraki koya tu mai kea? Joni 4:43-54; Marika 1:14, 15; Luke 4:14, 15.

▪ Ni lesu yani ki Kalili ko Jisu, na cava e qai yaco vei ira nona tisaipeli, ia e vakacava na i valavala ni nodra ciqomi koya na tamata?

▪ Na cakamana cava e vakayacora ko Jisu, ia e laki cakayaco vakacava vei ira era vauci kina?

▪ E vakaevei na i valavala ni nona vakalougatataki Kena ko Jisu?