Wase e 17

Vakatavulici Nikotimo

ENA gauna e tiko voli kina o koya ena Lakosivia ni 30 S.K., sa vakayacora na i vakatakilakila veivakurabuitaki ko Jisu, se cakamana. Sa qai yaco me ra vakabauti koya e lewe vuqa. Ko Nikotimo, e dua na lewe ni Sanadrini, na nodra mataveilewai levu na Jiu, e kurabui ka via kila tale e so na ka. Sa qai sikovi Jisu yani ena buto ni bogi, e rairai rerevaki ira na nodra i liuliu na Jiu de vakacacani na kena i rogorogo kevaka ena laurai.

“Vakavuvuli,” e kaya o koya, “keitou sa kila ni kemuni sa lako mai vua na Kalou me vakavuvuli: ni sa sega e dua na tamata e cakava rawa na veika-mana oqo ko ni sa cakava, kevaka erau sa sega ni tiko kaya na Kalou.” Sa qai sauma ka kaya vei Nikotimo ko Jisu, me rawa ni curu ki na Matanitu ni Kalou, sa dodonu vua e dua na tamata me “sucu tale.”

Ia, ena sucu rawa tale vakaevei e dua na tamata? “Sa curu rawa vakarua ki na kete i tinana me sucu mai?” e taroga ko Nikotimo.

E sega, oqori e sega ni kena i balebale na sucu tale. “Kevaka sa sega ni sucu e dua e na wai kei na yalo,” e vakamacalataka ko Jisu, “ena sega ni curu rawa ki na matanitu ni Kalou.” Ena gauna sa papitaiso kina ko Jisu ka lako sobu mai vua na yalo tabu, sa sucu kina o koya “ena wai kei na yalo.” Ena vuku ni i tukutuku oqo mai lomalagi, ‘Sa i koya oqo na Luvequ au sa vakadonuya,’ e kacivaka kina na Kalou ni sa vakatubura e dua na luvena vakayalo ka namaka me curuma yani na Matanitu vakalomalagi. E muri, ena Siga ni Penitiko 33 S.K., o ira era papitaiso kina era na rawata na yalo tabu ka ra na sucu talega kina me ra luve ni Kalou vakayalo.

Ia e rui bibi na nona i tavi na Luve vakayago lavotaki ni Kalou. “Ia me vaka sa laveta cake na gata ko Mosese mai na veikau,” sa tukuna ko Jisu vei Nikotimo, “e dodonu me laveti cake vaka talega kina na Luve ni tamata: . . . ko ira yadua era sa vakabauti koya, me ra rawata ga na bula tawa mudu.” Io, me vakataki ira na Isireli a kati ira na gata batigaga, era vakabulai ena nodra raica na gata parasa, sa vaka talega kina na tamata kecega me ra cakacakataka nodra vakabauta na Luve ni Kalou me rawa ni ra vakabulai mai na i tuvaki mate era tu kina.

Ni vakabibitaki na i tavi loloma i Jiova ena ka oqo, e tarava na nona tukuna vei Nikotimo ko Jisu: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua sa vakabauti koya, me ra rawata ga na bula tawa mudu.” Ena nona tiko voli oqo e Jerusalemi ni se qai vula ono oti ga ni tekivuna nona cakacaka vakaitalatala, sa vakamakaretaka ko Jisu ni o koya ena vakayagataka ko Jiova me vakabulai ira na kawatamata.

E tomana nona i vakamacala ko Jisu vei Nikotimo: “Ni sa sega ni tala mai na Luvena ki vuravura na Kalou me cudruvi ira na kai vuravura,” e sega ni lewai ira vakaca, se vakacalai ira, me totogitaki ira na kawatamata me ra vakarusai. Na kena dodonu ga, me vaka e kaya ko Jisu, ni talai mai “me bula ga ko ira na kai vuravura e na vukuna.”

E rere ko Nikotimo ka lako vakavuni yani vei Jisu ena buto ni bogi. O koya gona e vakavure vakasama ni tinia nona veivosaki kei koya ko Jisu ena nona kaya: “Oqo era sa cudruvi kina, ni sa lako mai na rarama [a vakaraitaka ko Jisu ena nona bula kei na nona i vakavuvuli] ki vuravura, a ra sa vinakata na butobuto ko ira na tamata, ka cata na rarama, ni sa ca na nodrai valavala. Ni sa cata na rarama ko koya yadua sai valavala ca, a sa sega ni lako mai ki na rarama, de kunei na nonai valavala ca. Ia ko koya sa muria nai valavala dina sa lako mai ki na rarama, me vakaraitaki na nonai valavala, ni sa vinaka vua na Kalou.” Joni 2:​23–3:21; Maciu 3:​16, 17; Cakacaka 2:​1-4; Tiko Voli mai na Lekutu 21:⁠9.

▪ Na cava e vakavuna na veisikovi i Nikotimo, ia na cava e lako yani kina ena bogi?

▪ Na cava na i balebale ni “sucu tale”?

▪ E vakatauvatana vakacava ko Jisu na nona i tavi ena noda vakabulai?

▪ Na cava e kena i balebale ni sega ni lako mai ko Jisu me mai lewai vuravura?