Da Vuli Vei Nikotimo

“KEVAKA e dua sa via muri au, me kakua ni muria na lomana, ia me colata ga na nona kauveilatai [se, “kaunirarawa,” NW] e na veisiga, ka muri au.” (Luke 9:​23) Ratou a ciqoma na veisureti oya e vica na gonedau dravudravua kei na dua na daukumuni ivakacavacava. Mani ratou biuta na ka kece me ratou muri Jisu.​—Maciu 4:​18-​22; Luke 5:​27, 28.

E se dola tu ga nikua na veisureti i Jisu, e lewe vuqa era sa ciqoma. Dina ga ni so era sa vuli iVolatabu tiko kei ira na iVakadinadina i Jiova, ia era tu vakasuka ni “muria na lomana [loma i Jisu]” ra qai sega tale ga ni ‘via colata na nodra kaunirarawa.’ E sega ni lomadra mera colata na itavi dokai ni dua na tisaipeli i Jisu.

Na cava era tu vakasuka kina e so mera ciqoma na veisureti i Jisu ra qai yalataki ira vua na Kalou o Jiova? Vua e dua e vulagi ina vakabauta vakajiu se vakarisito ni tiko na Kalou bula, sa macala ga ni na taura na gauna me na qai vakadeitaka kina e lomana ni tiko dina na Dauveibuli kaukaua. Ia, nira sa vakadeitaka mada ga e lomadra na tikina oya, era se tu vakasuka ga mera imuri i Jisu. De dua, era rerevaka ni na raici ira vakatani o ira na wekadra kei na nodra itokani ke ra yaco mera dua na iVakadinadina i Jiova. E so tale, era sega ni raica vakabibi ni oqo na gauna ni ivakataotioti, era qara gona kina na rogo kei na iyau. (Maciu 24:​36-​42; 1 Timoci 6:​9, 10) Se mani cava e vuna, e dodonu vei ira era lomalomaruataka tiko mera imuri i Jisu, mera vuli vei Nikotimo, e dua na nodra iliuliu vutuniyau na Jiu ena gauna i Jisu.

Rawa Vua me Kalougata

Ena loma ga ni ono na vula ni nona cakacaka vakaitalatala o Jisu, sa kila rawa o Nikotimo ni o koya ‘e dua na ivakavuvuli mai vua na Kalou.’ Ena nona drukataka na cakamana i Jisu mai Jerusalemi ena Lakosivia ni 30 S.K., a lako yani kina vei Jisu ena bogi o Nikotimo me lai vakaraitaka vua ni vakabauti koya, me kilai koya vinaka tale ga kina na ivakavuvuli oqo. Mani tukuna kina vei Nikotimo o Jisu na ka dina titobu, oya ni na gadrevi na “sucu tale” me curu rawa kina e dua ina Matanitu ni Kalou. Oya tale ga na gauna a cavuta kina o Jisu na veivosa oqo: “Sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.”​—Joni 3:​1-​16.

Dua na kalougata levu sa tu oqo e mata i Nikotimo! A rawa vua me dua na itokani voleka i Jisu, me raica sara ga e matana na veika e cakava ena gauna a bula voli kina e vuravura. Ni dua na nodra iliuliu na Jiu qai ivakavuvuli tale ga e Isireli, e bau buta vinaka toka o Nikotimo ena Vosa ni Kalou. E titobu tale ga na ka e kila, e sega gona kina ni dredre vua me taura rawa ni o Jisu e ivakavuvuli, e tala mai na Kalou. E dau taleitaka o Nikotimo na veika vakayalo, qai dua tale ga na turaga yalomalumalumu dina. Sega ni a ka rawarawa vua e dua e lewe ni nodra mataveilewai cecere duadua na Jiu me vakadinata ni a tala mai na Kalou na luve ni matai dravudravua oqo! Na itovo kece oqori ena gadrevi me tiko vua e dua me tisaipeli kina i Jisu.

A sega ni seavu na nona taleitaka na turaga ni Nasareci oqo o Nikotimo. Ni oti e rua veimama na yabaki ena Solevu ni Valetabanikau, a tiko o Nikotimo ena dua na nodra soqo na Sanadrini. Ena gauna oya, e se ‘dua tiko ga vei ira’ o Nikotimo. Sa ra qai tala na ovisa o ira na bete levu kei ira na Farisi me lai vesuki Jisu. Nodra suka mai era qai kaya: “E sega e dua na tamata sa vosa me vaka na tamata oqo.” Sa ra qai tekivu vakalialiai ira na ovisa na Farisi: “Dou sa vakacalai beka koi kemudou talega? Sa vakabauti koya e dua vei ira na turaga se vei ira na Farisi, se segai? ia era sa rusa na tamata oqo era sa sega ni kila na vunau.” Sa sega ni kinoci koya rawa o Nikotimo. Mani kaya cake: “Sa cudruva beka na tamata na noda vunau, ni sa sega ni rogoci koya mada eliu, ka kila na ka sa cakava?” Era sosovi koya na vo ni Farisi: “Ko iko talega na kai Kalili, ne? mo vakasaqara ka kila: ni sa sega e dua na parofita sa tubu mai Kalili.”​—Joni 7:​1, 10, 32, 45-​52.

Ni oti tale e rauta ni ono na vula, ena siga ni Kanavata ni Lakosivia ni 33 S.K., a raica o Nikotimo ni kevutaki sobu mai ena kaunirarawa na yago i Jisu. A qai lai tomani Josefa na kai Arimacea, e lewe tale ga ni Sanadrini, ena kena vakarautaki na yago i Jisu me bulu. Oya na vuna, a kauta mai kina o Nikotimo na “mura e veiwaki vata kei na yasiyasi” e rauta ni tolusagavulu na kilokaramu na kena bibi. E vakaraitaka oya ni a voli ena dua na ilavo levu. E vakaraitaka tale ga oya na nona yalodoudou me bolea na nona na matalevutaki ni duavata kei koya na “dauveivakacalai,” na yaca era vakacavutaki Jisu kina na nona itokani Farisi. Sega ni bera na nodrau vakarautaka na lewe rua oqo na yago i Jisu me lai bulu ena dua na ibulubulu vou e voleka ga. Ia, me yacova mai na gauna oya, e se sega ga ni vakatakilakilataki o Nikotimo me tisaipeli i Jisu!​—Joni 19:​38-​42, VV; Maciu 27:63; Marika 15:43.

Vu ni Nona Sega ni Cakava Kina e Dua na Ka

Se cava na vu ni nona a sega ni via ‘colata o Nikotimo na nona kaunirarawa’ me muri Jisu, e sega ni volaitukutukutaka o Joni. Ia, a dusia ga o koya e so na ka e rairai vakavuna na nona lomalomarua na turaga Farisi oqo.

iMatai, a kaya o Joni ni nodra iliuliu na Jiu oqo a “lako mai . . . vei Jisu e na bogi.” (Joni 3:2) Oqo na nona nanuma e dua na vuku ni iVolatabu: “A lako o Nikotimo ena bogi, sega ni baleta ni rere, ia e vinakata ga me levea na nodra na vakasosataka na lewe vuqa na nodrau veivosaki kei Jisu.” Ia, a cavuti Nikotimo o Joni me “ko koya sa lako eliu vei Jisu e na bogi” ni oti ga na nona tukuna ni o Josefa na kai Arimacea e “a tisaipeli i Jisu, ia ka vuni ga ni sa rerevaki ira na kai Jutia.” (Joni 19:​38, 39) E kena irairai gona ni a lakovi Jisu o Nikotimo ena bogi ni “rerevaki ira na kai Jutia,” me vaka ga na nodra rere e so ena gauna oya mera laurai vata kei Jisu.​—Joni 7:​13.

O se sega tiko beka ga ni dua na tisapeli i Jisu ni o rui leqataka vakalevu na ka era na kaya na wekamu, nomu itokani, se o ira oni cakacaka vata? E kaya e dua na vosa vakaibalebale: “Na rerevaka na tamata sa da tacori kina.” O na vorata vakacava na rere oya? E tomana na vosa vakaibalebale: “Ia ko koya sa vakararavi vei Jiova ena tiko vinaka.” (Vosa Vakaibalebale 29:25) Me rawa ni vakatabakidua na nomu vakararavi vei Jiova, ena dodonu mo vakila sara ga na nona veivakacegui ena gauna o rarawa tu kina. Masu vei Jiova, qai kerea vua me vakaukauataki iko ena vakatulewa lalai sara mada ga e vauci kina na nomu sokalou. Toso na gauna, ena tubu na nomu vakabauta kei na nomu dau vakararavi vei Jiova me yacova na gauna sa rawa kina me salavata na nomu vakatulewa lelevu kei na inaki ni Kalou.

Rairai e murilomana tiko ga o Nikotimo baleta beka na nona itutu qai rogo tale ga ni dua vei ira na iliuliu. De sa kauaitaka vakalevu tiko ena gauna oya na nona itutu, ni lewe ni Sanadrini. O na tu vakasuka beka mo imuri i Karisito ni o na vakayalia kina na nomu itutu dokai ena vanua o tiko kina, se ni o na calata beka kina na nomu toroicake vakacakacaka? Ia e sega ni vakatauvatanitaki rawa na veika oqo kei na kena dokai na noda qaravi koya sa Cecere Sara e lomalagi kei vuravura, ni tu vakarau me vakaceguya na noda kerekere e salavata kei na nona inaki.​—Same 10:17; 83:18; 145:18.

E dua tale beka na vuna e lokuyara kina o Nikotimo, na nona iyau. Ni Farisi, de a rawai koya o ira na nona itokani, “era sa daulomana nai lavo.” (Luke 16:14) E vakadinadinataka na nona volia rawa na mura sa veiwaki vata kei na yasiyasi e saulevu ni turaga rawati koya. E so tale ga nikua era lokuyarataka na colata na nodra itavi vakarisito nira lomaleqataka na nodra iyau. O koya gona, a vakasalataki ira kina na nona imuri o Jisu: “Mo dou kakua ni lomaocaoca e na vuku ni nomudou bula, e na ka mo dou kania, se na ka mo dou gunuva: se e na vuku ni yagomudou, e na ka mo dou vakaisulu kina. . . . Ni sa kila na Tamamudou vakalomalagi sa yaga vei kemudou na ka kecega oqo. Ia dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo.”​—Maciu 6:​25-​33.

Calata na Nona Kalougata

E vakavure vakasama na itukutuku i Nikotimo, ni volaitukutukutaki ga ena Kosipeli i Joni, qai sega ni tukuna se a yaco me imuri i Jisu se sega. Ena dua na kena ivakamacala, ni a qai ciqomi Jisu o Nikotimo, papitaiso, ra vakacacani koya na Jiu, sivo mai na nona itutu, qai vakatalai tani mai Jerusalemi. Se mani cava na kena dina, e dua na ka e matata: A calata na nona kalougata ni a lokuyara ni se tiko e vuravura o Jisu.

Ke muri Jisu o Nikotimo ena imatai ga ni nodrau sota, ke a yaco me nona tisaipeli voleka. Ni tiko vua na kila, rai titobu, yalomalumalumu, qai kauai ena veika vakayalo, ke a dua na tisaipeli uasivi. Io, ke a rogoca na nona vunau veivakadrukai na Qasenivuli Levu, vulica e so na ka bibi mai na vosa vakatautauvata i Jisu, vakadinadinataka na veivakabulai veivakurabuitaki a cakava o Jisu, kei na nona vakayaloqaqataki mai na vosa ni tatau i Jisu vei ira na nona yapositolo. Ia, a calata na veika kece oya.

A calata na nona kalougata o Nikotimo ena vuku ni nona lomalomarua. Okati kina na nona veisureti vakayalololoma o Jisu: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou. Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou. Ni sa rawarawa na noqui vua, ka mamada na noqui colacola.” (Maciu 11:​28-​30) Ke a rawa sara ga ni solia vei Nikotimo o Jisu na veivakacegui oqo!

Vakacava o Iko?

Ena 1914, sa tekivu veiliutaki vakatui o Jisu Karisito ena Matanitu ni Kalou vakalomalagi. Nona tukuna vakailiu na ka ena yaco ena nona tiko tawarairai, oqo e dua vei ira na ka a kaya: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:14) Ni bera ni yaco na ivakataotioti, e sa na vunautaki oti na itukutuku vinaka ena vuravura taucoko. E marautaka o Jisu Karisito na nodra vakaitavi na kawatamata era sega ni uasivi. O rawa ni vakaitavi tale ga ena cakacaka oqo.

A raica rawa o Nikotimo ni o Jisu a talai mai vua na Kalou. (Joni 3:2) Nomu vulica na iVolatabu, rairai sa na vaka oya na nomu vakasama. O sa na veisautaka beka na nomu bula me salavata kei na ivakatagedegede ni iVolatabu. O sa na soqoni tiko beka kei ira na iVakadinadina i Jiova me vakarabailevutaka na nomu kila na iVolatabu. E vakavinavinakataki na nomu sasaga. Ia, a sega ni rauta wale ga na nona vakaraitaka o Nikotimo na nona marautaki Jisu ni a talai mai vua Kalou. A vinakati vua me “kakua ni muria na lomana, ia me colata ga na nona kauveilatai [se, “kaunirarawa,” NW] e na veisiga, ka muri [Jisu].”​—Luke 9:​23.

Me dei tiko mada ga vei keda na vosa nei yapositolo o Paula. A vola: “Ia koi keitou ni keitou sa cakacaka vata kaya, keitou sa cikevi kemudou mo dou kakua ni vakatawayagataka na loloma ni Kalou. Ni sa kaya ko koya, Au a rogoci iko e na gauna ni vinakati, Ia e na gauna ni bula ka’u a vukei iko: raica, oqo na gauna ni vinakati; raica, na siga ni bula edaidai oqo.”​—2 Korinica 6:​1, 2.

Oqo na gauna mo bucina kina na vakabauta ena yavalati iko. Me rawa oya, vakananuma na veika o vulica tiko mai na iVolatabu. Masu vei Jiova, qai kerea vua me vukei iko mo vakaraitaka na vakabauta vaka oya. Ni o sotava na nona veivuke vakayalololoma, ena uqeti iko na nomu vakavinavinaka kei na nomu lomani koya mo ‘kua ni muria na lomamu, ia o na colata ga na nomu kaunirarawa ena veisiga, ka muri Jisu Karisito.’ O sa na cakava beka kina oqo e dua na ka?

[iYaloyalo ena tabana e 9]

Ena imatai ni gauna, a doudou o Nikotimo na vosa ena vuku i Jisu

[iYaloyalo ena tabana e 9]

Dina ga ni a tusaqati, a veivuke o Nikotimo ena kena vakarautaki na yago i Jisu me bulu

[iYaloyalo ena tabana e 10]

Ena vakaukauataki iko mo yavala na nomu vuli vakataki iko kei na masu

[iYaloyalo ena tabana e 10]

O na ciqoma beka na itavi dokai ena nomu cakacaka ena ruku ni veiliutaki i Jisu Karisito?