Taro na Dauwiliwili
Na cava e vakaibalebaletaka o Jisu ena nona kaya vei Nikotimo: “Sa sega e dua na tamata sa lako cake ki lomalagi, ko koya ga sa lako sobu mai lomalagi, a Luve ni tamata”?—Joni 3:13.
A se tiko ga e vuravura o Jisu ena gauna a cavuta kina na veivosa oya, a se bera ni lako cake se lesu i lomalagi. Ia, na veika eda kila me baleti Jisu vaka kina na ituvaki e cavuta kina na veivosa oya ena vukei keda meda taura vinaka na ka e vakaibalebaletaka tiko.
O Jisu a bula taumada mai lomalagi kei Tamana, oya na vuna e tukuni kina ni “lako sobu mai lomalagi.” Ia, ena gauna lokuci, a tokitaki na bula i Jisu ina katonigone i Meri, yaco sara me mai sucu vakatamata. (Luke 1:30-35; Kalatia 4:4; Iperiu 2:9, 14, 17) Ni oti nona mate, a vakaturi me dua na ka bula vakayalo o Jisu qai lesu vei Jiova. O koya gona, ni bera ga vakalailai nona vakamatei, a rawa ni masuta o Jisu: “Tamaqu, ni vakarokorokotaki au me daru tiko vata, e na vakarokoroko sa tu vei au ni daru a tiko vata ni sa sega ni caka ko vuravura.”—Joni 17:5; Roma 6:4, 9; Iperiu 9:24; 1 Pita 3:18.
Ena gauna a veivosaki tiko kina o Jisu kei Nikotimo na Farisi e ivakavuvuli tale ga e Isireli, a se bera ni lesu i lomalagi o Jisu. A sega ni bau dua na tamata a mate me se lako cake i lomalagi. Tukuna sara mada ga o Jisu ni o Joni na Dauveipapitaisotaki e parofita uasivi ni Kalou, ia “ko koya sa lailai sara e na matanitu vakalomalagi sa uasivi vei koya.” (Maciu 11:11) A vakamacalataka tale ga na yapositolo o Pita ni a mate na tui yalodina o Tevita qai se tu ga ena ibulubulu; a sega ni lako i lomalagi. (Cakacaka 2:29, 34) E tiko na vuna vinaka era sega ni lako kina i lomalagi o Tevita, o Joni na Dauveipapitaisotaki, kei na so tale na turaga yalodina era a mate ni bera ni mate o Jisu. O ira oqo era mate ni bera ni vakarautaka o Jisu na sala me rawa nira na vakaturi na tamata mera lai bula i lomalagi. A vola na yapositolo o Paula ni nona liu yani i lomalagi o Jisu, “sa dolava kina . . . e dua na sala vou” ina bula vakalomalagi.—Iperiu 6:19, 20; 9:24; 10:19, 20, VV.
Ni se bera gona ni mate o Jisu qai vakaturi, na cava e vakaibalebaletaka ena nona kaya vei Nikotimo: “Sa sega e dua na tamata sa lako cake ki lomalagi, ko koya ga sa lako sobu mai lomalagi, a Luve ni tamata”? (Joni 3:13) Dikeva na veitikina yavolita, se na ka erau veivosakitaka tiko o Jisu kei Nikotimo.
Ni lako mai o Nikotimo me raici Jisu ena lomaloma ni bogi, a kaya vua o Jisu: “E dina, e dina, au sa kaya vei iko, Kevaka sa sega ni sucu tale na tamata, ena sega ni raica rawa na matanitu ni Kalou.” (Joni 3:3) A taroga o Nikotimo: ‘E rawa vakacava oqo? Rawa vakacava me sucu vakarua na tamata?’ A sega ni taura rawa o koya na ivakavuvuli me baleta na curu ina Matanitu ni Kalou. E dua beka e rawa ni vakamacalataka vua na ivakavuvuli oqo? Na tamata e sega ni rawa ni cakava oqori; me vaka ni sega ni dua na tamata a bau bula mai lomalagi me rawa ni vakamacalataka na veika e gadrevi vua e dua me qai curu ina Matanitu ni Kalou. O Jisu duadua ga a rawa ni vakamacalataka na ka oqo, baleta ni a lako mai lomalagi qai tu vua na kila me vakavulici Nikotimo kei ira tale e so.
Na taro e veivosakitaki tiko oqo e dusia e dua na tikina bibi me baleta na noda vulica na Vosa ni Kalou. E sega ni ka vakayalomatua meda vakatitiqataka e dua na tikinivolatabu baleta ga ni dredre meda kila na kena ibalebale. Na ka e kaya e dua na tikinivolatabu me dikevi vata kei na so tale na tikinivolatabu, me rau salasalavata tale ga. Kena ikuri, ena vukei keda meda kila na ibalebale ni dua na tikinivolatabu e sega ni matata vei keda kevaka eda dikeva na veitikina yavolita, na ituvaki a volai kina kei na ka a veivosakitaki tiko.