Wase e 29
Vakayacora na Cakacaka Vinaka ena Siga ni Vakacecegu
OQO e sa vula i tubutubu ni 31 S.K. Sa oti yani oqo e vica na vula mai na vosa i Jisu vua na yalewa ena i keli wai mai Samaria ena nona i lakolako mai Jutia ki Kalili.
Ni oti nona veivakatavulici ka tete rabailevu yani mai Kalili taucoko, sa baci lako tale ki Jutia ko Jisu, na vanua ena laki vunau kina ena veivalenilotu. Ni vakatauvatani kei na veika e tukuna na i Vola Tabu ena nona cakacaka vakaitalatala mai Kalili, e lailai sara na veika e tukuna me baleta na cakacaka vakaitalatala i Jisu mai Jutia ena nona veisiko oqo kei na veivula a mai tiko voli kina e ke ena Lakosivia sa oti. E rairai sega ni tautauvata na kena ciqomi nona cakacaka vakaitalatala e Jutia me vaka mai Kalili.
E sega ni dede sa lako yani ko Jisu ki na koro turaga kei Jutia, ko Jerusalemi, ena Lakosivia ni 31 S.K. Ena vanua oqo, ena Matamata ni Koro ni Sipi, e tiko kina e dua na tobu ni sisili ka vakatokai ko Peciseita, era dau lako kina e lewe vuqa era tauvimate, na mataboko, kei na lokiloki. Era vakabauta ni rawa ni ra vakabulai na tamata ena nodra sobu yani ki na tobu ni yavalati na wai.
Sa Siga ni Vakacecegu oqo, ia e raica e dua na tagane ko Jisu mai na tobu ni sisili ka tauvimate voli ena loma ni 38 na yabaki. Ni sa kila na dede ni nona tauvimate, sa qai taroga ko Jisu: “Ko sa via bula, se segai?”
E sauma yani vei Jisu: “Sa sega, saka, e dua na noqu tamata me kauti au ki nai silisili, ni sa vakayavalati na wai; ia ni’u sa lako tiko kina, sa liu sobu vei au e dua tani.”
Sa kaya vei koya ko Jisu: “Tu cake, taura cake na nomui mocemoce, ka lako.” Sa bula vinaka vakasauri na tagane, e taura cake na nona i mocemoce ka sa vakatekivu me lako!
Ia ni ra sa raica na tagane na Jiu, era sa kaya: “A siga ni vakacecegu oqo: sa sega ni tara vei iko mo colata nai mocemoce.”
Sa kaya vei ira na tagane: “O koya sa vakabulai au, sa kaya vei au ko koya, Taura cake na nomui mocemoce, ka lako.”
“Ko cei na tamata sa kaya vei iko, Taura cake na nomui mocemoce, ka lako?” era vakataroga. A lako tani vakatikitiki ko Jisu ena vukudra na lewe vuqa, ka sa sega ni kila na yaca i Jisu o koya a vakabulai. E muri sa qai sotavi Jisu na tagane ena loma ni valenisoro, sa qai kila na tagane se o cei a vakabulai koya.
Sa qai lako yani na tagane ka laki tukuna vei ira na Jiu ni sa i Jisu a vakabulai koya. Ni ra sa kila na ka oqo, era sa qai lako yani na Jiu vei Jisu. Ena vuku ni cava? Era via kila beka se rawata vakacava na cakacaka vakurabuitaki oqo? Sega. Na nodra via vakasaqara ga na cala me ra beitaki koya kina ni cakava na veika vinaka oqo ena Siga ni Vakacecegu. Era sa tekivu vakacacani koya! Luke 4:44; Joni 5:1-16.
▪ E vakacava na dede ni gauna mai na i otioti ni nona a sikovi Jutia ko Jisu?
▪ Na cava e taleitaki kina vakalevu na tobu ni sisili mai Peciseita?
▪ Na cakamana cava e vakayacora ko Jisu mai na tobu ni sisili, ia e vakacava na i tovo ni yalodra na Jiu ena ka sa caka oqo?