Wase e 62

Na Ka ni Vuli me Baleta na Yalomalumalumu

NI VAKABULAI oti na gonetagane curumi timoni ena vanua ka volekata na yasayasa mai Sisaria-Filipai, sa qai via lesu tale ki na nona i tikotiko ko Jisu mai Kapenaumi. Ia, e via lesu vata ga kei ira na nona tisaipeli me rawa ni vakarautaki ira ena nona mate kei na veika sa tu mai liu era na vakacolati kina. E vakamacalataka o koya vei ira: “E na soli yani na Luve ni tamata ki na ligadra na tamata ka ra na vakamatea, ka na vakaturi cake tale e na i katolu ni siga.”

E dina ga ni a sa tukuna oti na veika oqo ko Jisu, ka ratou raica sara na lewe tolu na i apositolo na veivakamataliataki ka veivosakitaki kina na nona i “lakolako,” ia era lecava tikoga na ka oqo na nona i muri. E dina ga ni sega ni dua vei ira e cakitaka ni na vakamatei, me vaka a vakayacora ena dua na gauna e liu ko Pita, ia era rere ni vakatarogi koya tale kina.

Sa ra tadu yani oqo ki Kapenaumi, na vanua ka a vakaciciva mai kina ko Jisu na nona cakacaka vakaitalatala. Na koro talega i Pita kei na so tale na i apositolo. Era qai lako mai vei Pita ena vanua oqo na tamata era kumuni i vakacavacava ni valenisoro. Rairai era saga me voroka ko Jisu na i vakavuvuli vakavanua kilailevu, sa ra qai taroga: “E sega li ni dau solia na i vakacavacava e rua na drachma [me baleta na valenisoro] na nomudou i Vakavuvuli?”

“O, io,” e sauma yani ko Pita.

E kila ko Jisu na ka a yaco ena nona tadu yani e vale ni rairai oti toka ga oqo. Ni bera nona qai kauta cake mai oqo ko Pita, sa tarogi koya sara ko Jisu: “A cava ko nanuma, Saimoni? Era dau kumuna mai vei cei ko ira na tui e vuravura na i vakacavacava se na soli? Mai vei ira na luvedra, se mai vei ira ga na kai tani?”

“Mai vei ira ga na kai tani,” e sauma ko Pita.

“Sa qai lalaga na luvedra,” e kaya ko Jisu. Me vaka ni Tui ena lomalagi kei vuravura na Tama i Jisu, ko Koya ka sokaloutaki ena loma ni valenisoro, e sega ni gadrevi kina vakalawa vua na Luve ni Kalou me sauma na i vakacavacava ni valenisoro. E kaya ko Jisu: “Ia ni da sega ga ni via vakatarabetaki ira, lako mada ki matasawa, ka viritaka na siwa, ka yavia mai na i matai ga ni ika e katia mai, ni ko sa dolava na gusuna ko na kunea kina e dua na i lavo [e va na drachma]. Kauta oqori ka solia vei ira me nodaru i tavi.”

Ena gauna era soqonivata na tisaipeli ni oti nodra lesu yani ki Kapenaumi, rairai ena vale beka i Pita, era qai taroga: “O cei e ka levu duadua e na matanitu vakalomalagi?” Sa kila ko Jisu na vu ni nodra taro, ena veika e yaco ena kedra maliwa ni ra muri voli mai dakuna ena nodra lesu mai Sisaria Filipai. Sa qai taroga: “A cava dou sa veileti kina ena gaunisala?” Era madua, ka vagagalu na tisaipeli, ni ra a veileti vakataki ira e gaunisala se o cei e levu duadua vei ira.

E dredre dina me vakabauti me ra veileti tu vaka o ya na tisaipeli, ka ni sa voleka ni oti yani oqo e tolu na yabaki na nona veivakatavulici voli ko Jisu? E vakavotui kina na kaukauwa ni vakayacoka ni kakadigadiga vakatamata kei na lotu e lako mai kina e dua. Na lotu vaka-Jiu era susugi mai kina na tisaipeli e vakabibitaka na i tutu se i tavi vakaturaga ena ka kecega e caka. Me kena i kuri ena vuku ni yalayala i Jisu vei Pita ni na soli vua “na i dola” ni Matanitu, e rairai vakananuma ni uasivi cake o koya. A rairai tu talega vei Jemesa kei Joni na vakasama vata ga oqori ni a soli vei rau me rau raica na vakamataliataki nei Jisu.

Veitalia mada se o cei e cala, e vakaciriloloma ga na sala a vakadodonutaka kina ko Jisu na i vakarau ni nodra rai. Sa qai kaciva mai e dua na gone, e mai vakaduria ena kedra maliwa, taubeni koya ena ligana, ka kaya: “Kevaka dou sega ni veisau mai ka yaco me vaka e dua na gone lailai dou na sega sara ni curu ki na matanitu vakalomalagi. O koya ga sa vakamalumalumutaki koya me vaka e dua na gone lailai vaka oqo sa i koya e ka levu duadua e na matanitu vakalomalagi. O koya tale ga e vinakata e dua na gone lailai vaka oqo e na yacaqu sa vinakati au.”

Sa dua na sala uasivi dina me vakadodonutaki ira kina na nona tisaipeli! E sega ni bau cudruvi ira ko Jisu me vakatokai ira ni ra viavia turaga, kocokoco, se via rogo. E sega ni vakakina, ia e veivakadodonutaki na nona veivakatavulici ni taurivaka na i vakatautauvata me baleti ira na gone lalai, ni ra daukilai tu ga me ra yalomalumalumu ka ra galala mai na via rogo ka dausega tu ni nodra i vakarau na veivakaduiduitaki. E vakaraitaka vakakina ko Jisu vei ira na nona tisaipeli ni gadrevi me ra susuga cake na veitovo qoroi oqo era daukilai kina na gone ena nodra yalomalumalumu. Sa qai tinimaka vakaoqo ko Jisu: “Ni ko koya e lailai duadua vei kemudou kece sa i koya ga e levu duadua.” Maciu 17:22-27; 18:1-5; Marika 9:30-37; Luke 9:43-48.

▪ Ni ra lesu tiko ki Kapenaumi, na veivakatavulici cava e baci tokaruataka ko Jisu, ia e vakaevei na i valavala ni kena ciqomi?

▪ Na cava e sega ni vauci kina ko Jisu me solia na i vakacavacava ni valenisoro, ia na cava ga e qai sauma kina?

▪ Na cava e vakavuna beka nodra veileti na tisaipeli, ia e qai vakadodonutaki ira vakacava ko Jisu?