Wase e 66

Ena Solevu ni Vale Vakacevaceva

SA VOLEKA oqo ni tolu na yabaki nona papitaiso ko Jisu, ka sa rogovaki sara o koya. Era raici koya e udolu vakacaca ni cakava nona cakamana, ka sa teteva na vanua taucoko na i tukutuku ni nona cakacaka. Ia, ni ra sa soqovata mai na tamata ki na Solevu ni Vale Vakacevaceva mai Jerusalemi, era sa vakasaqarai koya mai kea. Era via kila: “E vei mada ko koya?”

A dauveibataki vakalevu sara ko Jisu. “A tamata vinaka ko koya,” era kaya e so. “E sega, sa vagolei ira vakatani na lewe vuqa ko koya,” era kaya na so. E levu na veivosaki lo vakaoqo me baleti koya ena i tekivu ni siga ni solevu. Ia e sega ni dua e bau doudou me vosa vakavinakataki Jisu ena matana levu. Na vuna ni ra rerevaka na tamata de ra vakacacani ira na nodra i liuliu na Jiu.

Ni sa vakacagau tu vakaveimama na solevu, sa qai toka tu yani ko Jisu. E lako sara yani o koya ki na valenisoro, ka ra kurabui na tamata ena maqosa ni nona veivakatavulici. Me vaka ni sega ni bau vuli ko Jisu ena veikoronivuli e dauvakatavuvulitaka na nodra lawa na Jiu, sa ra qai vakananuma e lomadra: “Sa dua tani na levu ni kila ka ni tamata oqo! E la’ki rawata tu beka mai vei, ni a sega tu ni vuli?”

E vakamacalataka ko Jisu: “E sega ni noqu na i vakavuvuli au sa vakatavuvulitaka tiko vei kemuni, e nei koya ga ka a talai au mai. Kevaka e dua na tamata e via cakava na loma ni Kalou, e na kila na i vakavuvuli, se sa ka mai vua na Kalou, se’u sa vosa tiko vakai au ga.” E muria voleka sara na lawa ni Kalou na i vakatavuvuli i Jisu. Sa dodonu me macala vinaka kina ni vakasaqara voli o koya na lagilagi ni Kalou, e sega ni vakasaqara na nona. E taroga ko Jisu: “E sega li ni a solia vei kemuni na Lawa ko Mosese?” Sa qai kaya ena nona vunauci ira: “E sega ga ni dua vei kemuni e muria na Lawa.”

“A cava ko ni via vakamatei au tiko kina?” e tarogi ira ko Jisu.

Rairai era vulagi yani ki na solevu, o ira na lewe vuqa o ya, ka ra lecava na sasaga e via vakayacori. Era sega ni vakasamataka rawa ni dua me via vakamatea na i vakavuvuli veivakurabuitaki oqo. Sa ra qai vakadinata ni dua na ka e vakaleqai Jisu me vakakina oqo na nona vakasama. “E tiko vei iko e dua na tevoro,” era kaya. “Ko cei e via vakamatei iko?”

E dina ga ni ra sega tiko ni kila na lewe vuqa, ia ko ira na nodra i liuliu na Jiu era vinakata me vakamatei ko Jisu. Na nona a vakabula e dua na tamata ena Siga ni Vakacecegu ko Jisu, rauta ni dua veimama na yabaki yani ki liu, era a saga me ra vakamatei koya na nodra i liuliu. Sa qai dusia ko Jisu na nodra sesewa ena nona tarogi ira: “Kevaka sa cilivi na gone tagane e na Siga ni Vakacecegu, me kakua kina ni voroki na Lawa i Mosese me baleta na veicilivi, a cava ko ni qai cudruvi au kina ni’u a vakabula, me bula vinaka sara e dua na tamata e na Siga ni Vakacecegu? Ni kakua ni dau lewa na ka e na kena i rairai ga, ia ni vakataulewa ga e na i vakarau ni lewa dodonu.”

Na lewe i Jerusalemi era kila vinaka na ka e yaco, era sa qai kaya: “E sega li ni ko koya oqo era a saga tiko na veiliutaki me ra vakamatea? Ia raica, e vosa tiko ko koya e na matana levu, ka ra bau sega ni kaya vua e dua na ka! E vakaevei? Era sa vakadeitaka beka e lomadra ko ira na i liuliu ni sa i koya dina oqo na Karisito?” Era vakamacalataka na lewe i Jerusalemi oqo na vu ni nodra sega ni vakabauta ni ko Jisu na Karisito: “Ia na Karisito, ni sa lako mai, e na sega e dua e kila se lako mai vei. Ia na tamata oqo eda kila na vanua e lako mai kina.”

Sa qai sauma ko Jisu: “Dou sa kilai au, dou sa kila talega na vanua ka’u sa lako mai kina, ia ka’u sa sega ni lako mai vakai au ga, ia sa dina ko koya sa talai au mai, ia dou sa sega ni kilai koya: ia ka’u sa kilai koya koi au: ni’u sa lako mai vei koya, a sa talai au mai ko Koya.” Era sa qai saga me ra vesuka ena ka oqo, rairai era via biuti koya beka ki valeniveivesu se vakamatei koya. Ia e sega ni yaco na lomadra baleta ni se bera ni yaco mai na gauna me mate kina ko Jisu.

Ia era lewe vuqa era vakabauti Jisu, ni dodonu ga me vakakina. A cava tale, ni a taubale voli e dela ni wai, vakamalumutaka na liwa ni cagi, vakamaravutaka na cava mai wasawasa, vakani ira vakacakamana e lewe vica vata na udolu ena vica ga na i buli madrai kei na ika, vakabulai ira na tauvimate, vakavuna me ra lako rawa na lokiloki, era rai tale na mataboko, vakabulai ira na vukavuka, ka vakaturi ira cake sara mada ga na mate. Era qai taroga: “Ni sa na lako mai na Karisito, e na levu cake beka na cakacaka mana e cakava mai na kena sa cakava rawa na tamata oqo?”

Ni ra sa rogoca na Farisi na nodra kudruvaka na lewe vuqa na veika oqo, sa ra duavata kei ira na bete i liuliu ena nodra talai ira yani na ovisa me ra laki vesuki Jisu. Joni 7:11-32.

▪ Ena gauna cava sa qai yaco mai kina ko Jisu ena solevu, ia na cava era veikayaka na tamata me baleti koya?

▪ Na cava na vuna era kaya kina e so ni tiko vei Jisu na timoni?

▪ Na rai cava me baleti Jisu e tu vei ira na lewe i Jerusalemi?

▪ Ena vuku ni cava era vakabauti Jisu kina e lewe vuqa?