“Sega ni Bau Rogoca e Dua me Vosa Vakataki Koya”

E se tiko ga o Jisu e Jerusalemi ena Soqo ni Valevakacevaceva (se Valetabanikau). E marau ni “levu na lewenivanua era vakabauti koya.” Ia era cudru na iliuliu ni lotu. Era mani tala eso era vaka na ovisa ni lotu mera vesuki koya. (Joni 7:31, 32) Ia e sega ni bau vuni o Jisu.

E vunau tiko ga e matanalevu o Jisu e Jerusalemi, e kaya: “Au na tiko tale vakalekaleka kei kemuni, au sa na qai lako vei koya e talai au mai. Oni na vaqarai au, ia oni na sega ni raici au, na vanua au na tiko kina oni na sega ni lako rawa kina.” (Joni 7:33, 34) Era sega ni taura rawa na Jiu na vosa i Jisu, era mani veikayaka: “E via lako i vei na tagane qo meda na sega ni raici koya kina? Ena via lako vei ira na Jiu era veiseyaki tu vei ira na kai Kirisi me lai vakavulici ira na kai Kirisi? Na cava na ibalebale ni ka e tukuna, ‘Oni na vaqarai au, ia oni na sega ni raici au, na vanua au na tiko kina oni na sega ni lako rawa kina’?” (Joni 7:35, 36) A vakaibalebaletaka tiko o Jisu na nona mate kei na nona vakaturi i lomalagi, era na sega ni rawa ni muri koya e kea na kena meca.

Qo e sa ikavitu ni siga ni soqo. Ena siga kece ni soqo, sa sova voli mai e veimataka na bete na wai mai na tobu o Sailoama me drodrova na yavu ni icabocabonisoro. A rairai via vakalesuya o Jisu na cakacaka qori ena nodra vakasama na lewenivanua, e kaya kina: “Ke dua e karamaca, me lako mai vei au me gunu. O koya e vakabauti au, me vaka e tukuni ena tikinivolatabu, ‘Ena drodro mai lomana na uciwai ni bula.’”—Joni 7:37, 38.

E vakaibalebaletaka tiko o Jisu na ka ena yaco nira lumuti na nona tisaipeli ena yalo tabu kei na nodra kacivi ena bula vakalomalagi. A tekivu na veilumuti qori ni mate oti o Jisu. Ena siga ni Penitiko ena yabaki tarava, sa tekivu drodro na wai ni bula nira sa vunautaka na ka dina na tisaipeli era lumuti ena yalo tabu.

Nira rogoca na lewenivanua na veivakavulici i Jisu, era kaya eso: “Qo dina na Parofita,” me vakaibalebaletaka na parofita e uasivi Mosese. Era kaya eso: “Qo na Karisito.” Ia era taroga eso tale: “Oi, ena lako mai Kalili na Karisito? Vakacava, e sega ni vakamacalataki ena tikinivolatabu ni na lako mai ena kawa i Tevita na Karisito, mai Peceliema tale ga na koro a tiko kina o Tevita?”—Joni 7:40-42.

Era sa veisei tu na lewenivanua. Eso era vinakata me vesu o Jisu, ia e sega ni dua e bau tarai koya. Nira lesu lala yani na ovisa vei ira na iliuliu ni lotu, era mani taroga na iliuliu ni bete kei ira na Farisi: “Cava oni sega ni kauti koya mai kina?” Era sauma na ovisa: “Keimami se sega ni bau rogoca e dua e vosa me vakataki koya.” Ena levu ni nodra cudru na iliuliu ni lotu, era vakalialiai ira na ovisa: “Oni sa vakacalai tale ga? Vakacava, sa vakabauti koya e dua vei ira na iliuliu se Farisi? Ia o ira na ilala levu qo era tamata cudruvi, era sega ni kila na Lawa.”—Joni 7:45-49.

Sa qai vosa ena vuku i Jisu o Nikotimo e dua na Farisi qai lewe ni Sanadrini. Ena rua veimama na yabaki yani e liu a golevi Jisu ena bogi o Nikotimo me vakaraitaka nona vakabauti koya. E kaya gona vei ira na lewe ni Sanadrini: “Na noda Lawa e sega ni vakatara me lewai e dua ni se bera ni rogoci mada e liu o koya, me kilai na ka e cakava, se vakacava?” Era qai sauma vua: “Oi, o kai Kalili tale ga o iko? Ni o vaqaqara ena iVolatabu o na raica ni sega ni dua na parofita ena basika mai Kalili.”—Joni 7:51, 52.

E sega ni tukuna vakadodonu na iVolatabu ni na basika mai Kalili na parofita. Ia e parofisaitaka na Vosa ni Kalou ni na laurai “na rarama levu” e “Kalili ni veimatanitu.” (Aisea 9:1, 2; Maciu 4:13-17) A parofisaitaki tale ga ni na sucu e Peceliema o Jisu, e kawa tale ga i Tevita. Era sa rairai kila tiko qori na Farisi, ra sa qai vakatetea e levu na itukutuku lasu me baleti Jisu.