Wase e 75

Na iVurevure ni Mamarau

ENA nona cakacaka voli vakaitalatala mai Kalili ko Jisu, a vakayacora kina o koya na cakamana, ka baci mai cakava tale oqo e Jutia. Me kena i vakaraitaki, e vakasava tani mai vua e dua na tamata na timoni ka vakavuna voli nona galu. Era qoroqoro na lewe vuqa, ia o ira na dauveivakalewai era vakavurea na mataqali taro vata ga a tarogi mai Kalili. “Sa vakasevi ira na tevoro ko koya e na kaukauwa i Pielisipupi na nodra turaga na tevoro,” era tukuna. E so tale era gadreva me vakalevutaka ko Jisu na nona i vakadinadina, se o cei mada o koya, sa ra qai vakatovolea ena nodra kerea vua me dua na i vakatakilakila mai lomalagi.

Ni sa kila na veika era vakasamataka tiko, e solia kina ko Jisu vei ira oqo e Jutia na i sau ni taro vata ga a solia vei ira na dauveivakalewai mai Kalili. E kaya o koya ni matanitu yadua era veisei vakataki ira na lewena ena bale ga. Sa qai taroga, “kevaka tale ga era na veisei vakai ira na lewe ni matanitu i Setani e na tudei vakaevei na nona matanitu?” Sa qai vakaraitaka na i tutu rerevaki era tu kina o ira era vakalewai koya ena nona kaya: “Ia kevaka ka’u vakasevi ira na timoni e nai qaqalo ni Kalou, sa qai yaco dina vei kemudou na matanitu ni Kalou.”

Sa dodonu me ra ciqoma na cakamana i Jisu o ira era raica ena sala vata ga era a vakayacora kina o ira na raici Mosese ni cakava e dua na cakamana ena vica vata na senitiuri e liu. Era a kaya, “Oqo nai qaqalo ni Kalou.” Sa vakatalega kina “nai qaqalo ni Kalou” ka ceuta na i Vunau e Tini ena vatu raraba. Ia “nai qaqalo ni Kalou”​—⁠na nona yalo tabu, se i gu dauvakayaco ka⁠—​e rawa me vakasevi ira tani kina na timoni ko Jisu ka vakabulai ira na tauvimate. Sa yaco dina vei ira na dauveivakalewai oqo na Matanitu ni Kalou, me vaka ni sa tu sara ga ena kedra maliwa ko Jisu, o koya sa lesi tu me Tui ni Matanitu.

Ena gauna o ya e vakaraitaka ko Jisu ni nona rawata me vakasevi ira na timoni sa i vakadinadina ni nona kaukauwa cake mai vei Setani, me vaka ga na nona lako mai e dua na tamata e qaqa cake ka vakamalumalumutaka e dua na tamata vakaiyaragi ka yadrava tu na nona vale vakatui. E tukuna tale na vosa vakatautauvata a tukuna oti mai Kalili me baleta na yalo velavela. Ni sa takali tani mai vua na tamata na yalo velavela, na nona sega ni vakasinaita na veitikina e lala tu ena veika vinaka, sa qai lesu tale mai na yalo velavela ka kauta mai e vitu tale, sa yaco e muri me ca cake sara na tamata o ya mai na nona bula e liu.

Ena nona vakarorogo tiko ki na veivakavulici oqo, sa qai tabalaka cake mai na domona e dua na yalewa mai vei ira na lewe vuqa: “Sa kalougata na kete ko ni a sucu mai kina, kei na sucuna ko ni a sucuma.” Me vaka ni ra gadreva kece na yalewa Jiu me ra bau tina mada ga ni dua na parofita ka vakauasivi o koya na Mesaia, sa rauta me vosa vakakina na yalewa oqo. E sega ni vakabekataki ni nanuma o koya ni dodonu me marau ko Meri ni mai tina i Jisu.

Ia, e totolo sara nona vakadodonutaka na yalewa oqo ko Jisu me baleta na i vurevure dina ni mamarau. E sauma yani o koya, “Era sa marau cake ga ko ira era rogoca na vosa ni Kalou ka muria!” A sega ni bau tukuna vakalailai ko Jisu, me soli na veidokai e lavotaki vei Meri na tinana. Me kena i sosomi, e vakaraitaka ni marau dina ena vakavu ga mai na nona yaco e dua me dauveiqaravi yalodina ni Kalou, e sega ena vuku ni veiwekani vakayago se veika e vakayacora rawa.

Me vaka ga na nona a cakava mai Kalili, sa qai vunauci ira na tamata mai Jutia ena nodra kerea me dua na i vakatakilakila mai lomalagi. Sa qai tukuna vei ira ni na sega ni dua na i vakatakilakila ena soli vei ira vakavo ga na i vakatakilakila i Jona. E yaco me i vakatakilakila ko Jona, ena nona tiko siga tolu ena loma ni ika kei na nona vunau voli ena yalodoudou, ka ra veivutuni kina na kai Ninive. E qai kaya ko Jisu, “Ka raica sa dua eke sa uasivi cake vei Jona.” Sa vakatalega kina, na Radi ni Sipa e qoroqoro ena vuku sa tu vei Solomoni. E kaya tale ko Jisu, “Ia raica sa dua eke sa uasivi cake vei Solomoni.”

Sa qai vakamacalataka ko Jisu ena gauna e tutuvaka kina na cina e dua na tamata, ena sega ni laki biuta ena dua na tikina vuni se ena ruku ni dua na kato, ia ena kena i tutu ga me rawa vei ira na tamata me ra raica kece na rarama. E rairai vakatakila tiko ni veivakavulici kei na cakamana e cakava tiko vei ira na tamata yalodredre oqo era mai vakarorogo oqo e vaka ga ni kena vunitaki na rarama ni cina. Na matadra na vakararai tu mai e sega ni rawarawa se ra sega ni rai vinaka, e lekati gona kina na i naki ni nona cakamana.

E se qai vakasava oti ga na timoni ko Jisu, ka vakavuna me vosa e dua na galu. Oqo e dodonu me uqeti ira na tamata e rawarawa tu, se rai vinaka tu na matadra me ra vakacaucautaka na cakacaka lagilagi oqo ka vakarogoya yani na kena i rogorogo vinaka! Ia, vei ira na dauvakalelewa oqo, e sega ni yaco me vakakina. Sa qai tinia ko Jisu: “O koya mo qai vakaraica de sa butobuto mai na rarama sa tu e lomamu. O koya oqo, kevaka sa rarama na yagomu taucoko, ka sega na tikina sa butobuto, ena rarama kece sara, me vaka ni sa cinavi iko na cina sa caudre vinaka sara.” Luke 11:14-36; Lako Yani 8:18, 19; 31:18; Maciu 12:22, 28.

▪ E vakacava na i vakarau ni kena ciqomi na nona vakabulai koya na tamata ko Jisu?

▪ Na cava na “i qaqalo ni Kalou,” ia ena sala cava e yaco dina kina vei ira era vakarorogo tiko vei Jisu na Matanitu ni Kalou?

▪ Na cava na i vurevure ni mamarau dina?

▪ E rawa vakacava vua e dua na tamata me rawarawa na matana?