Wase e 82

Lako Tale ko Jisu ki Jerusalemi

SEGA soti ni dede sa baci tekivu toso tale ko Jisu, me veivakatavulici ena veikoro lelevu kei na veikoro lalai. E kena i rairai ni tiko voli o koya mai na yasayasa vaka-Peria ena tai kadua ni Joritani mai Jutia. Ia e lako vaka ki Jerusalemi.

Na nodra i vakavuvuli vuku na Jiu ni vakaiyalayala ga na kedra i wiliwili era na vakabulai e rairai vakavuna me taroga kina e dua na tamata: “Turaga, era na lewe lailai wale beka ga era na vakabulai?” Ena nona sauma, e vakayavalati ira na tamata ko Jisu me ra vakasamataka na ka e gadrevi me ra vakabulai rawa kina: “Ni gumatua sara [a ya, ni sautamoqemoqe, se gu, veitalia na mosi] mo ni curu e na katuba qiqo.”

Na sasaga kaukauwa vakaoqori e bibi sara me vaka e tomana ko Jisu, ni ra “lewe vuqa era na saga me ra curu ki loma ka ra na sega ni rawata.” Na cava era na sega ni rawata kina? Sa qai vakamacalataka o koya ena gauna sa na tucake kina na i taukeinivale, ka lokataka na katuba ka ra tu ga e tautuba na tamata, ka tukituki ena mata ni katuba, ka kaya, “Turaga, ni dolava mada vei keimami!” ena qai kaya ko koya: “Au sega ni kila se ko ni lako mai vei; ni lako tani, ni ko ni tamata i valavala ca!”

O ira era sogolati oqori mai tautuba era dui lako ga mai ena gauna e dui ganiti ira ga vakataki ira. Ia ena gauna era na qai yaco yani kina sa na sogo ka lokataki tu na katuba ki na i covi. E dina ga ni rairai sega ni ganiti ira me ra a vakayacora vakakina ia e dodonu ga me ra a lako totolo ke ra a via curu ki loma. Io, e dina, e dua na i tinitini rarawa sa waraki ira tu era vakadaroya tiko me ra vakaliuca duadua ena nodra bula na sokalou vei Jiova!

A talai yani ko Jisu me laki qaravi ira na Jiu, ia e lewe vuqa sara era sega ni bau kauwaitaka na gauna rawarawa e tadola tu vei ira me ra ciqoma kina na i solisoli ni veivakabulai ni Kalou. Sa qai kaya ko Jisu ni ra na tagi ka vakasequruquru bati ni ra na biu tani ki tautuba. Ena yasana ka dua, o ira na tamata mai “na tu i cake, mai ra talega, mai na mata ni tokalau talega, kei na mata ni ceva,” io, mai na veimatanitu kecega, “a ra na dabe sobu e na matanitu ni Kalou.”

E tomana ko Jisu: “Eso sa muri [na tamata sevaki era sega ni Jiu, ka vakakina na Jiu era beci] era na qai liu; eso talega era sa liu [o ira na Jiu era sa tiko vinaka tu vakayago ka vakalotu] era na qai muri.” Na nodra yaco me ra mai tu sara e muri sa kena i balebale ni o ira oqo era sa vucesa, sega ni dauvakavinavinaka ka ra na sega ni rawata na Matanitu ni Kalou.

Era qai lako mai vei Jisu ena gauna vata o ya na Farisi ka kaya: “Lako tani eke; ni sa via vakamatei iko tiko ko Eroti [Anitipasa].” Rairai tekivuna na i rogorogo oqo ko Eroti me rawa ni dro tani kina ko Jisu mai kea. Sa rerevaka beka ko Eroti me baci vakaitavi tale ena mate ni dua tale na parofita ni Kalou me vaka na nona a vakamatei Joni na Dauveipapitaiso. Ia sa qai tukuna vei ira na Farisi ko Jisu: “Dou la’ki tukuna vua na fokise ko ya, Raica, au sa vakasevi ira na timoni ka ia na veivakabulai edaidai kei na sabogibogi, au na qai vakaotia ga e nai katolu ni siga.”

Ni sa vakayacora oti mai kea na nona cakacaka ko Jisu, sa qai tomana na nona i lakolako ki Jerusalemi ka vakamacalataka, “sa sega ni dodonu me mate e dua na parofita e na dua na vanua tani, mai Jerusalemi duadua ga.” A cava e namaki me vakamatei kina ko Jisu mai Jerusalemi? Baleta ni koro turaga ko Jerusalemi, na vanua e tiko kina na Sanadrini, na mataveilewai levu ka ra 71 na lewena, na vanua talega e daucabori kina na i soro manumanu. Ena vuku ni ka o ya, ena sega kina ni dodonu vua “na Lami ni Kalou” me vakamatei ena duatani tale na vanua, mai Jerusalemi duadua ga.

“Isa, Jerusalemi! Jerusalemi! Ko iko ko a dauvakamatei ira na parofita, ka vakaviriki ira e na vatu ko ira era a talai yani vei iko,” e lelevaka ko Jisu, “sa vakavuqa na noqu vakasoqoni ira vata na luvemu, me vaka na vakasoqoni ira vata na luvena na tina ni toa e na ruku ni tabana, ia ko ni a sega ga ni vinakata! Raica, sa biu wale tu ka laladidi na nomuni veivale.” Na nodra cata na Luve ni Kalou, ena rusa kina na matanitu!

Ni tomana yani na nona i lakolako ki Jerusalemi ko Jisu, e qai sureti ki na nona vale e dua vei ira na nodra i liuliu na Farisi. Na Siga ni Vakacecegu oqori, ka ra sa vakaraici koya matua na tamata, me vaka ni tiko voli e kea e dua na tagane buketevatu, e rairai sosokumuni na wai ena ligana kei na yavana. Sa qai vosa vei ira na Farisi kei na daunilawa era tiko voli e kea ko Jisu, ka tarogi ira: “Sa tara li me caka na veivakabulai e na Siga ni Vakacecegu se sega?”

Era sega ni kaya rawa e dua na ka. Sa qai vakabula na tagane ko Jisu ka kaya vua me lako. Oti oqori sa qai tarogi ira: “Ke dua vei kemuni e lutu ki na toyevu na luvena tagane se na nona bulumakau e na Siga ni Vakacecegu, e na sega beka li ni la’ki vueta mai vakatotolo e na siga tiko ga koya?” Era sega tale ni baci kaya rawa e dua na ka. Luke 13:22–14:6; Joni 1:29.

▪ Na cava e vakaraitaka ko Jisu ni gadrevi me rawati kina na veivakabulai, ia ena vuku ni cava sa lewe vuqa kina era sa tu mai tuba ka lokataki vei ira na vale?

▪ O cei o ira era “muri” mai sa yaco me ra liu, kei ira era “liu” era na muri?

▪ Ena vuku beka ni cava e kainaki kina ni a via vakamatei Jisu ko Eroti?

▪ Na cava e sega ni vakatarai kina me vakamatei ena duatani tale na vanua, vakavo ga mai Jerusalemi e dua na parofita?