Wase e 102

Curu ena Qaqa ko Karisito ki Jerusalemi

ENA mataka ni siga ka tarava, Siga Tabu, 9 Naisani, sa biuti Pecani mai ko Jisu kei ira nona tisaipeli ka lako sivia na Ulunivanua ni Veiolive vaka ki Jerusalemi. E sega ni dede era sa volekati Pecifaki yani, ka tara koto ena Ulunivanua ni Veiolive. A vakasalataki rau sara e rua na nona tisaipeli ko Jisu:

“Drau lako ki na koro lailai sa donui kemudrau, ka drau na kunea sara e dua na asa sa noka tu, ka sa tu vata kaya na luvena: Drau sereka, ka kauta mai: Ia kevaka e dua sa vosa kina vei kemudrau, drau kaya, Erau sa yaga vua na Turaga: ena qai solia sara kina ko koya.”

Na kena i rairai taumada me vaka e rau sega ni kila na tisaipeli na i vakasala oqo e veisotari kei na i vakayaco ni parofisai ena i Vola Tabu, e muri era sa qai kila ni vakakina. Sa tukuna tu mai vakailiu na parofita ko Sakaraia ni Tui yalataki ni Kalou ena vodo yani ki Jerusalemi ena dua na asa, ia, “e na asa, io e na luve ni asa.” A vodo vakatalega kina ko Tui Solomoni ena dua na luve ni asa ena siga a lumuti kina me tui.

Ni rau sa yaco yani ki Pecifaki na tisaipeli ka sereka mai na luve ni asa tagane kei na tinana, era qai kaya mai e so era duri tu e kea: “A cava drau sa sereka kina na luve ni asa?” Ia ni sa kainaki ni vinakata na Turaga, era sa laiva me rau kauta na tisaipeli vei Jisu. E rau tevuka na nodrau i sulu e sau na tisaipeli ki na dela ni tina ni asa kei luvena, ia a mani vodoka ga ko Jisu na luve ni asa tagane.

Ni sa vodo yani vaka ki Jerusalemi ko Jisu, sa tekivu me ra muri koya mai e lewe vuqa. Era sa tevuka na lewe vuqa na nodra i sulu e sala, ka lewe vuqa tale era musumusuka na draunikau ka tevuka talega. “Sa kalougata ko koya sa lako mai e na yaca i Jiova!” era kacivaka lako. “Me tu mai lomalagi na veivinakati, kei na vakarokoroko e na veiyasana ecake sara.”

E so vei ira na Farisi era lako maliwai ira voli na lewe vuqa e vakacudrui ira sara na veika era kailavaka na tamata sa ra qai cudruvi Jisu: “Vakavuvuli, vunauci ira na nomu tisaipeli.” Ia sa qai sauma ko Jisu: “Au sa kaya vei kemudou, Kevaka era sa tiko lo ko ira oqo, ena qai qoqolou mai na veivatu.”

Ni sa toro voleka yani ki Jerusalemi ko Jisu, sa vakatekivu me raica na koro ka tagicaka, ka kaya, “Isa! ke ko a kila, io ko iko, e na nomu gauna oqo, na veika ni nomu vakacegu! ia sa qai vuni ga vei iko.” Mai na nona talaidredre nakita, sa na sauma ga na kena i sau ko Jerusalemi, me vaka a tukuna tu e liu ko Jisu:

“Ena viribaiti iko kina ko ira na nomu meca [o ira na kai Roma ena veiliutaki i Jenarali Taitusi], ka buku druadrua ka sogolati iko e na veiyasana kece ga, ka na vakalolovirataki iko kira, kei ira na luvemu ena kemu maliwa, ka na sega ni vo vei iko na veivatu me veitaqataqai.” Na rusa kei Jerusalemi a tukuna vakailiu ko Jisu a qai vakayacori dina ena loma ni 37 tale na yabaki ka tarava, ena 70 S.K.

Ena loma ga ni vica na macawa yani ki liu, e vuqa vei ira era a raici Jisu ni a vakaturi Lasarusa. Era veikayaka voli ga o ira oqo vei ira na tani na cakamana oqori. Ni qai curu yani ko Jisu ki Jerusalemi, sa tu yavavala na koro taucoko. “O cei li oqo?” era via kila na tamata. Era kaya tikoga yani na tamata: “Oqo ko Jisu na parofita mai Nasareci e Kalili!” Ni ra sa raica na veika sa yaco tiko era sa lelevaka na Farisi ni ra sa sega ni rawata rawa e dua na ka, ena nodra kaya: “Sa muri koya na kai vuravura kecega.”

Me vaka ga na nona i valavala ni dausikovi Jerusalemi, a mani lako yani ki na valenisoro ko Jisu me laki veivakatavulici! Mai keri era a lako yani vua na mataboko kei na lokiloki, ka vakabulai ira! Ni ra sa raica na bete i liuliu kei na vunivola na cakacaka mana sa vakayacora ko Jisu ka ra rogoca na nodra kaila na gone tagane lalai ena valenisoro, “Osana vua na Luve i Tevita!” e vakacudrui ira sara vakalevu. “O sa rogoca na ka era vosataka tiko ko ira oqo, se segai?” era kudruvaka yani.

“Io,” e sauma yani ko Jisu. “Dou sa sega beka ni wilika, Mai na gusudra na gonelalai kei ira sa sucu tiko, ko sa cakava me vinaka sara na vakarokoroko?”

E tomana nona veivakatavulici ko Jisu ka vakaraica na veika kece ena loma ni valenisoro. Sa yaco me sa yakavi talega mai na vanua. A biuta o koya na tikina oqori, kei iratou na lewe 12, ka taubale lesu tale ki Pecani e rauta ni 3 na kilomita se sivia. E laki moce kina ena bogi ni Siga Tabu, ena vale beka i Lasarusa na nona i tokani vinaka. Maciu 21:1-11, 14-17; Marika 11:1-11; Luke 19:29-44; Joni 12:12-19; Sakaraia 9:9.

▪ Na gauna cava kei na i valavala vakacava a curu yani kina ko Jisu ki Jerusalemi me vaka na Tui?

▪ Na cava e bibi kina me ra vakacaucautaki Jisu na lewe vuqa?

▪ E vakacava na loma i Jisu ni sa raici Jerusalemi, kei na parofisai cava e qai cavuta?

▪ Na cava e yaco ni sa lako yani ko Jisu ki na valenisoro?