Wase e 103

Sikova Tale na Valenisoro

ERA bogi tolu oti nodra tiko voli mai Pecani ko Jisu kei ira na nona tisaipeli ena nodra lako tiko mai Jeriko. Ia ena malamalawa ni mataka caca ena Siga Moniti, 10 Naisani, sa ra lako yani ena sala ki Jerusalemi. E sa via kana ko Jisu. Ni sa raica e dua na vu ni lolo kei na drauna, sa qai lako me raica de so na vua ni lolo.

E tubu totolo ga mai na drauna ka ni sega ni vula i lolo, na Jiune sara na kena gauna, ia e se qai voleka ni cava ga na vula ko Maji. Sa nanuma ko Jisu ni sa tubu totolo mai na drauna, ena rairai vua totolo talega. Ia e vakararawataki koya. E veivakacalai na kau ena i rairai ni drauna. Sa qai cudruva na kau ko Jisu, ka vaka: “Me kakua tale ni dua me kana lolo vei iko ka tawa mudu.” Na veika e yaco ena ka e vakayacora oqo ko Jisu e qai kilai ena mataka ni siga ka tarava.

Era tomana tikoga na nodra i lakolako, ka sega ni dede sa ra tadu yani ki Jerusalemi ko Jisu kei ira nona tisaipeli. E lako sara o koya ki na valenisoro, a sikova oti ena yakavi ni siga kadua. Edaidai sa qai yavala me vakayacora e dua na ka, ka tautauvata ena tolu na yabaki sa oti ena nona a lako mai ki na Lakosivia ena 30 S.K. Sa qai vakasavi ira tani na veivoli ena valenisoro ka vukica na nodra teveli na dauveisau i lavo kei na nodra i dabedabe na volitaki ruve. E sega ni vakatara mada ga me dua e colata e dua na i yaya ena loma ni valenisoro.

E vakacalai ira era veisau i lavo kei ira na dauvolitaki manumanu ena loma ni valenisoro, e kaya: “Sa volai, A noqu vale ena vakatokai me vale ni masu, ia dou sa cakava me nodra qara na daubutako.” Era daubutako baleta ni ra lavaka vakasivia na ka me ra sauma o ira e lailai na nodra i lavo me ra voli manumanu ena i soro era gadreva. Sa raica oqo ko Jisu ni cakacaka vakabisinisi ni kove i lavo se daubutako.

Ni ra sa rogoca na bete i liuliu, kei ira na vunivola kei ira na turaga lelevu na veika sa vakayacora ko Jisu, era sa qai saga e dua na sala me ra vakamatei koya kina. Era vakadinadinataka ni ra na sega ni veisau rawa. Ia e sega ga ni ra kila na sala me ra vakamatei Jisu rawa kina, ni ra sa muri koya na tamata kecega ena nodra vakarorogo vua.

E sega ni o ira ga na Jiu vakayago era lako yani ki na Lakosivia, o ira talega na kai Veimatanitu Tani. O ira oqo era sa tavuki mai ki na nodra lotu na Jiu. Era lako yani e so na kai Kirisi, era sa tavuki beka mai, ki vei Filipi ka kerei koya ni ra via raici Jisu. Sa qai lako yani ko Filipi ka tukuna vei Adriu se dodonu beka na veisotari o ya se sega. E tiko voli mai na valenisoro ko Jisu, na vanua e rawa ni ra raici koya kina na kai Kirisi.

Sa kila ko Jisu ni sa vo ga e vica na siga na nona bula, sa qai vakatauvatana vinaka na i tuvaki me baleti koya: “Sa qai yaco mai na gauna me vakarokorokotaki kina na Luve ni Tamata. E dina, e dina, au sa kaya vei kemudou, Kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu.”

E dua na vua ni sila e lailai sara na kena yaga. Ia, vakaevei kevaka sa tei ki na qele ka “mate,” ka muduki na kena a bula voli me vaka na sore ni tei? Sa oti oqori sa qai kadre ka tubu ka laki vuataka vakalevu sara mai na sila. Sa vakatalega kina ko Jisu e duabau na tamata savasava. Ia kevaka e mate ena yalodina ki vua na Kalou, ena yaco me solia na bula tawamudu o koya vei ira na tamata yalodina ka tautauvata na yalo ni nodra soli ira me vaka ka tu vua. Sa qai kaya vakakina ko Jisu: “O koya sa lomana na nona bula, ena vakayalia; ia ko koya sa cata na nona bula e vuravura oqo, ena maroroya ki na bula tawa mudu.”

E macala ni sega ni nanumi koya tikoga ko Jisu, ni vakamacalataka tarava: “Kevaka sa qaravi au e dua, me muri au ga; ia na vanua ka’u sa tiko kina, ena tiko talega kina ko koya sa qaravi au: Ia kevaka sa qaravi au e dua, e na vakarokorokotaki koya ko Tamaqu.” Sa dua dina na i covi totoka e vu mai na nona muri ko Jisu kei na veiqaravi vua! Oqo na i covi ni nona veivakarokorokotaki na Tamana me na veitomani kina e dua kei Karisito ena Matanitu.

Ni vakasamataka na rarawa levu ena sotava kei na mate vakararawa e sa waraki koya, sa qai tomana ko Jisu: “Sa qai rarawa na lomaqu; Ia ka cava me’u kaya? Na Tamaqu, vakabulai au mai na gauna oqo?” Kevaka walega me rawa ni levei na ka e waraki koya tiko! Ia, e segai, ni qai kaya o koya: “Ia na ka oqo ka’u sa lako mai kina ki na gauna oqo.” E duavata tu ko Jisu kei na i tuvatuvanaki kece ni Kalou, e vauci talega kina na nona mate vakaisoro. Maciu 21:12, 13, 18, 19; Marika 11:12-18; Luke 19:45-48; Joni 12:20-27.

▪ Na cava e namaka kina na vua ni lolo ko Jisu e dina ga ni se bera ni kena gauna o ya?

▪ Na cava e vakatokai ira kina na volivolitaki tiko ena valenisoro ko Jisu me ra “daubutako?”

▪ Ena sala cava e tautauvata kina ko Jisu kei na sila me mate?

▪ E vakacava mada na nona dikeva ko Jisu na rarawa kei na mate e sa waraki koya tu mai?