Vakasavasavataka o Jisu na Valenisoro

Ena vulaitubutubu ni yabaki 30 G.V., e lako o Jisu i Jerusalemi. Era lako tale ga yani e levu mera lai soqova na Lakosivia. Na soqo qori e okati kina na nodra cabora na isoro manumanu ena valenisoro. Eso era kauta ga yani nodra manumanu, eso tale era lai volia ga e Jerusalemi.

Ni lako ena valenisoro o Jisu, e raica ni volitaki tiko e kea na manumanu. Era sa lai rawailavo tiko ena vale e dau sokaloutaki kina o Jiova! Na cava e qai cakava o Jisu? E talia e dua na kuita ena dali qai cemuri ira tani na sipi kei na bulumakau mai na valenisoro. E vukica nodra teveli na dauveisauilavo qai sova nodra ilavo. E kaya o Jisu vei ira na volitaki ruve tiko: ‘Kauta laivi na ka kece qo! Ni kua ni veivoli tiko ena vale nei Tamaqu!’

Era kurabui na tu ena valenisoro ena ka e cakava o Jisu. Eratou nanuma sara na tisaipeli na parofisai e tukuni tu me baleta na Mesaia: ‘Au na guta vakalevu na vale i Jiova.’

Dua na gauna e muri, ena yabaki 33 G.V., e vakasavasavataka tale o Jisu na valenisoro. E sega ni vinakata me beci na vale i Tamana.