Lesoni 10
iValavala e Cata na Kalou
Mo raica vakacava na veika e kaya na Kalou ni ca? (1)
Na mataqali veiyacovi vakacava e cala? (2)
Me raica vakacava na lotu Vakarisito na lasu? (3) na veimauilavo? (3) na butako? (3) na itovo kaukaua? (4) na vakacuru? (5) na mateni? (6)
Ena rawa vakacava vua e dua me biuta tani na ka ca e sa dau matau tu vua? (7)
1. Na tamata ni Kalou e dau lomana na ka e vinaka. Ia e dodonu me vulica tale ga me cata na ka e ca. (Same 97:10) E macala kina ni na cata na ivalavala e so e cata na Kalou. Na cava e so na ivalavala oya?
2. Veidauci: Na veiyacovi ni se bera na vakamau, veibutakoci, veiyacovi kei na manumanu, veiyacovi vakaveiwekani voleka, kei na veimoceri vakatagane se vakayalewa, era ivalavala ca levu ena mata ni Kalou. (Vunau ni Soro 18:6; Roma 1:26, 27; 1 Korinica 6:9, 10) Ke rau sa tiko vata e rua erau sega ni vakamau, e dodonu me rau tawase, ke sega me rau vakamau.—Iperiu 13:4.
3. Na Lasu, Veimauilavo, Butako: E sega vakadua ni lasu na Kalou o Jiova. (Taito 1:2) Mera kua ni dau lasulasu o ira na vinakata mera vakadonui. (Vosa Vakaibalebale 6:16-19; Kolosa 3:9, 10) Na veimauilavo ena kena mataqali cava ga ena kune kina na lomakocokoco. O koya gona, era na sega ni vakaitavi na lotu Vakarisito ena mataqali veimauilavo vakacava ga e caka, me vaka na lottery, veitau ose, kei na bingo. (Efeso 5:3-5) Era sega tale ga ni dau butako na lotu Vakarisito. Era na sega ni volia na iyaya era kila ni butakoci se mera taura na ka e se bera mada ni kerei.—Lako Yani 20:15; Efeso 4:28.
4. Cudrucudru, iTovo Kaukaua: Na cudru vakalialia e rawa ni lai tini ina itovo kaukaua. (Vakatekivu 4:5-8) Na tamata itovo kaukaua ena sega ni rawa me itokani ni Kalou. (Same 11:5; Vosa Vakaibalebale 22:24, 25) E cala na veisausaumitaka na ca era cakava beka vei keda na tani.—Vosa Vakaibalebale 24:29; Roma 12:17-21.
5. Na Vakadraunikau kei na Vakacuru: E so era kerea nodra veivuke na yalo de rawa nira vakabulai kina mai na kedra mate. E so tale era dau vakadraunikautaki ira na kedra meca mera tauvimate se mera mate sara ga kina. O koya e vu tiko ni ka kece oqo o Setani. Mera kua gona ni vakaitavitaki ira kina na lotu Vakarisito. (Vakarua 18:9-13) Na itataqomaki vinaka duadua ga mai na nodra via vakadraunikautaki keda na tani na noda kabiti Jiova matua tiko ga.—Vosa Vakaibalebale 18:10.
6. Na Mateni: E sega ni cala ke gunuvi vakalailai na waini, na bia, se alakaolo cava tale e dau gunuvi. (Same 104:15; 1 Timoci 5:23) Ia na gunu vakasivia ga kei na mateni e cala ena mata ni Kalou. (1 Korinica 5:11-13; 1 Timoci 3:8) Na gunu vakasivia e rawa ni vakaleqa nomu bula kei na nomu vuvale. E rawa tale ga ni vakavuna mo sikalutu rawarawa ina veitemaki.—Vosa Vakaibalebale 23:20, 21, 29-35.
7. O ira na cakava tiko na veika e kaya na Kalou ni ca era “na sega ni rawata na matanitu ni Kalou.” (Kalatia 5:19-21) Ke o lomana dina na Kalou o qai via vakamarautaki koya, o na rawa ni biuta tani na ivalavala kece oqo. (1 Joni 5:3) Bucina e lomamu mo cata na ka e cata na Kalou. (Roma 12:9) Dau soqoni wasoma kei ira na tamata era vakaitovotaka na itovo vakalou. (Vosa Vakaibalebale 13:20) O na vukei ke o dau veitokani kei ira na lotu Vakarisito matua. (Jemesa 5:14) Qai vakauasivi, vakararavi vua na Kalou me vukei iko ena nomu dau masu vua.—Filipai 4:6, 7, 13.
[iYaloyalo ena tabana e 20, 21]
Na Kalou e cata na mateni butako, veimauilavo, kei na itovo kaukaua