E Yaga Vei Iko?

“Ena sega ni oti na dauvola nai vola,” e kaya o Solomoni rauta na 3,000 na yabaki sa oti. (Dauvunau 12:12) Se dina tiko ga oqori ena gauna oqo. Sa tiko mada e so na ivolaqoroi era se volai makawa, ia era tabaki e veiyabaki e vicavata tale na udolu. Ni levu dina tu na ivola me wiliki, na cava mo wilika kina na iVolatabu?

E LEVU era wilivola me vakamarautaki ira, mera kilaka kina, se ena vuna ruarua oya. E vaka tale ga kina na wili iVolatabu. E rawa ni veivakauqeti, e vu ni marau tale ga. Ia e sega ni o koya ga oqori. E dua na ivurevure duatani duadua ni vuku na iVolatabu.​—Dauvunau 12:9, 10.

E sauma na iVolatabu na taro era se vakataroga voli mai na tamata ena dua na gauna balavu—na taro me baleta na noda gauna sa oti, noda gauna oqo, kei na noda gauna mai muri. Era taroga e levu: Eda vu mai vei? Na cava na inaki ni bula? Eda na marau vakacava? Ena tawani tiko ga na vuravura? Ena vakacava na noda gauna mai muri?

Na isoqoni kece ni veika e tukuni ena ivola oqo e vakadeitaka vakasigalevu ni dodonu qai dina na iVolatabu. Sa da raica oti na sala e yaga kina na kena ivakasala nikua, me vakainaki kina noda bula, me mamarau tale ga. Ni veivakacegui na veika e kaya me baleta na bula ni gauna oqo, sa macala kina ni kilikili tale ga meda raica na ka e kaya me baleta na veigauna sa oti kei na veiparofisai me baleta na gauna se bera mai.

Na Sala me Yaga Vakalevu Kina

E levu era tekivu wilika na iVolatabu, ia era cegu tale nira yacova e so na wase e dredre na kedra ibalebale. Ke yacovi iko tale ga, de na yaga e vica na ka oqo.

igia e dua na ivakadewa vinaka e vakayagataki kina na vosa ni gauna oqo, me vaka na New World Translation of the Holy Scriptures.a E so era tekivu wiliwili mai na Kosipeli ni bula i Jisu. Ena nona ivakavuvuli vuku, me vaka na kena ena Vunau ena Ulunivanua, e laurai kina ni kilai keda vinaka o Jisu qai tukuna na sala e rawa ni vinaka sara kina noda bula.—Raica na Maciu wase e 5 ina 7.

Me ikuri ni kena wiliki tasevu na iVolatabu, ena yaga tale ga ke o vulica vakaiulutaga. O na vakadikeva kina na ka e kaya na iVolatabu me baleta e dua na ulutaga. O na rairai kurabui ena ka o vulica me baleta na ka e kaya na iVolatabu ena ulutaga me vaka na yalo, lomalagi, vuravura, na bula, kei na mate, vaka kina na Matanitu ni Kalou—na cava mada na matanitu oqo kei na ka ena kauta mai.b E dua tiko na nodra porokaramu ni vuli iVolatabu vakaiulutaga na iVakadinadina i Jiova, e sega ni saumi. Ke o via kila na porokaramu oqo o rawa ni volavola mai ena valenivolavola o voleka kina me vaka e volai koto ena tabana e 2.

Nira dikeva na kena ivakadinadina, era kaya e levu ni iVolatabu e vu ga mai vua na Kalou, e tukuni ena iVolatabu me o “Jiova.” (Same 83:18) De o se sega sara ni vakabauta ni vu vakalou na iVolatabu. Vakacava mo dikeva mada ga o iko? E vakabauti ni gauna o dikeva kina, o qai vakasamataka, de o vakadinadinataka sara na yaga ni ivakasala vuku e sega ni madra rawa e tiko kina. O na qai rawa ni kaya ni iVolatabu e noda ivola kece—e nomu ivola tale ga.

[iVakamacala e ra]