LESONI 01
Ena Vukei Iko Vakacava na iVolatabu?
Voleka ni o keda kece eda dau vaqaqa na veika me baleta na bula, rarawa, mate kei na veigauna se bera mai. Eda kauaitaka tale ga noda bula ni veisiga, me vaka na cakacaka kei na marau ni noda vuvale. Levu era raica na yaga ni iVolatabu ena kena saumi na taro bibi me baleta na bula. E vakarautaka tale ga na ivakasala yaga me baleta na bula ni veisiga. O kila e dua ena yaga vua na iVolatabu?
1. Na cava eso na taro e sauma na iVolatabu?
Na iVolatabu e sauma eso na taro bibi qo: Eda vu mai vei? Na cava na inaki ni bula? Na cava eda dau rarawa kina? Na cava e yaco nida mate? Eda vinakata kece na sautu, ia na cava sa rui levu kina na ivalu? Na cava ena yaco e vuravura ena veigauna se bera mai? E uqeti keda na iVolatabu meda vaqara na kena isau. E vica vata na milioni era sa lomavakacegu ena kena isau.
2. Ena yaga vakacava na iVolatabu meda marautaka noda bula?
Na iVolatabu e vakarautaka na ivakasala vinaka. Kena ivakaraitaki, e vakavulica na vuvale ena sala me rawati kina na marau dina. E vakarautaka na ivakasala ena kena wali na lomaocaoca kei na sala meda marautaka kina na noda cakacaka. O na vulica na ka e kaya na iVolatabu me baleta na ulutaga qo kei na levu tale ni toso tiko nomu vuli. O na vakadinadinataka ni ‘yaga na iVolatabu kece.’—2 Timoci 3:16.
Na ivola qo e sega ni sosomitaka na iVolatabu. E vukei iko ga mo kila vinaka na iVolatabu. Koya gona, e vinaka mo wilika na tikinivolatabu kece ena lesoni yadua qai vakatauvatana kei na ka o vulica tiko.
VAKEKELI
Vulica na sala e yaga kina na iVolatabu vei ira eso tale, na sala mo marautaka kina na nomu wilika, kei na vuna e vinaka kina me vukei iko e dua mo kila na iVolatabu.
3. Na iVolatabu ena dusimaki keda
Na iVolatabu e vaka tiko na cina ramase. Ena dusimaki keda meda vakatulewa vinaka qai tukuna vei keda na veika ena yaco ena veigauna se bera mai.
Wilika Same 119:105, qai veivosakitaka na taro qo:
Na cava e nanuma na daunisame me baleta na iVolatabu?
Na cava nomu rai me baleta na iVolatabu?
4. Na iVolatabu ena sauma noda taro
E sauma na iVolatabu na veika e dau lomatarotarotaka tu e dua na marama me vica vata na yabaki. Sarava na VIDIO, qai veivosakitaka na taro qo.
Ena vidio, na taro cava e vakataroga na marama qo?
E yaga vakacava nona vulica na iVolatabu?
E uqeti keda na iVolatabu meda dau taro. Wilika Maciu 7:7, qai veivosakitaka na taro tarava:
Na cava o dau lomatarotarotaka e rawa ni sauma na iVolatabu?
5. O rawa ni taleitaka na wili iVolatabu
Levu era dau taleitaka na wili iVolatabu era sa vakila tiko na kena yaga. Sarava na VIDIO, qai veivosakitaka na taro qo.
Ena vidio, na cava nodra rai na itabagone me baleta na wilivola?
Na cava e veisau kina nodra rai me baleta na wili iVolatabu?
Na iVolatabu ena vakacegui keda, da qai rawata kina na inuinui. Wilika Roma 15:4, qai veivosakitaka na taro qo:
O via kila na veika e yalataka na iVolatabu me baleta na vakacegu kei na inuinui?
6. Ena vukei keda eso tale meda kila na iVolatabu
E levu era wili iVolatabu vakataki ira, ia era raica ni yaga vakalevu nodra veivosakitaka kei na so tale. Wilika Cakacaka 8:26-31, qai veivosakitaka na taro qo:
Eda na kila vakacava na iVolatabu?—Raica na tikina e 30 kei na 31.
E vinakata na veivuke na turaga ni Iciopea me kila na iVolatabu. Levu nikua era vakila na yaga ni kena veivosakitaki na iVolatabu kei ira eso tale
KA ERA KAYA ESO: “E vakalusi gauna na vuli iVolatabu.”
Na cava o na kaya? Na vuna?
KA O VULICA
Na iVolatabu e vakarautaka na ivakasala me baleta na bula ni veisiga, e sauma na taro bibi, e vakarautaka tale ga na vakacegu kei na inuinui.
Railesuvi
Na ivakasala cava e tiko ena iVolatabu?
Na cava eso na taro e sauma na iVolatabu?
Na cava o via vulica ena iVolatabu?
IKURI
Vakasamataka na yaga ni ivakasala ni iVolatabu nikua.
“Yaga Tawamudu na iVakavuvuli ena iVolatabu” (Na Vale ni Vakatawa Nb. 1 2018)
Raica na sala e vukea kina e dua na turaga na iVolatabu, e dredre me vakaraitaka na lomana ni se gone.
Dikeva na ivakasala vakaivolatabu me baleta na bula vakavuvale.
Vulica na sala e vakadodonutaka kina na iVolatabu na rai cala me baleti koya e liutaka tiko na vuravura.