Vitu na Vakatutu me Yaga Kina na Wili iVolatabu

“Na iVolatabu e sega wale ga ni ivola volitaki vakalevu duadua ena itukutuku ni veigauna, e ivola volitaki vakalevu duadua tale ga e veiyabaki.”​—TIME MAGAZINE.

“Au wilika ena so na gauna na iVolatabu, ia e vakavucesa vei au.”​—KEITH, DAUNIVAKATAGI ROGO MAI IGILADI.

E DREDRE me vakabauti ni levu era vakaivolatabu, ia e sega so ni yaga na nodra wilika. Eso tale era mareqeta na ka era wilika ena iVolatabu. Me kena ivakaraitaki e kaya e dua na marama na yacana o Nancy: “Niu tekivu wili iVolatabu e veimataka au qai vakananuma, au kila niu rawa ni walia na leqa cava ga ena rairai basika ena dua na siga. Qori e yaga sara vakalevu ena noqu valuta na lomabibi ni vakatauvatani kei na veika tale eso au cakava ena loma ni 35 na yabaki sa oti.”

De o se sega ni wilika na iVolatabu, ia e bau vakavure vakasama vei iko ni sa yaga vei ira eso na nodra wilika na iVolatabu? Ke o sa dau wilika na iVolatabu, o taleitaka me yaga vakalevu sara nomu wiliwili? Ke vaka kina, tovolea mada e vitu na vakatutu e vakamacalataki ena ulutaga qo.

1 Me donu nomu inaki ni wiliwili

◼ O na rairai wili iVolatabu ga baleta ni ivola totoka, o nanuma ni dodonu mo wilika se ni nomu idusidusi ena vuravura leqaleqa qo. Ia ena yaga sara vakalevu nomu wiliwili ke nomu inaki mo vulica kina na ka dina me baleta na Kalou. O na vakalougatataki tale ga vakalevu ke nomu inaki mo kila se na tara vakacava nomu bula na itukutuku ena iVolatabu.

E bibi me donu na inaki ni wiliwili, e laurai qori ena kena vakatauvatani na iVolatabu ina dua na iloilo: “Ke dua e rogoca wale ga na vosa qai sega ni muria, e tautauvata kei na dua e ilova na matana ena iloilo. Ni ilovi koya a gole sara, e sa guilecava totolo se mataqali tamata vakacava o koya. Ia o koya e dikeva na lawa uasivi ni veisereki qai muria tiko ga, ena marau ni cakava tiko baleta ni sega wale ga ni dau rogoca na vosa, e dau muria tale ga.”​—Jemesa 1:​23-25.

O koya e tukuni tiko e keri e ilovi koya ena iloilo, ia a sega ni veisautaka e dua na ka ena kena irairai. De dua a titiro totolo ga se a sega ni vinakata me veisautaka e dua na ka. E va tale ga qori noda wili iVolatabu, ena sega so ni yaga ke da wiliwili vakavudua se da sega ni bulataka na ka eda wilika. Ena yasana adua, eda na kunea na marau dina ke inaki ni noda dikeva na iVolatabu meda “muria,” me moica noda vakasama kei na noda ivalavala na rai ni Kalou.

2 Digia na ivakadewa nuitaki

◼ O na rawa ni wiliwili ena levu na ivakadewa ni iVolatabu. E rawa ni yaga vei iko na ivakadewa kece ni iVolatabu, ia eso era vakayagataka na vosa ni gauna makawa se na kena era kila ga na vuli vinaka qai dredre vei ira na kena vo. (Cakacaka 4:13) Eso era vakatanitaka na ivakavuvuli savasava ena iVolatabu nira muria ga na nodra ivakavuvuli. Dua na kena ivakaraitaki e tukuni ena imatai ni vica na ulutaga ni mekesini qo, eso era sa sosomitaka na yaca ni Kalou, Jiova, ena icavuti me vaka na “Kalou” se “Turaga.” Ni o digia gona na ivakadewa mo wiliwili kina, vaqara na kena e vakadewataka vakadodonu na iVolatabu qai kilai rawarawa na vosa e vakayagataki kina, mo taleitaka tiko ga kina na wiliwili.

Era vakadinadinataka e milioni vakacaca e vuravura ni cakava qori na iVakadewa ni Vuravura Vou.a Raica mada na nona rai e dua na kena turaga mai Bulgaria. A soli vua e dua na ilavelave ni iVakadewa ni Vuravura Vou ni gole ina dua na nodra soqoni na iVakadinadina i Jiova. A qai tukuna emuri, “Sa vakayabaki noqu wilika tu na iVolatabu, ia se qai vakadua meu wilika e dua na ivakadewa e kilai rawarawa e tara sara ga na lomada.”

3 Masu

◼ Ena levu na ka o kila ena iVolatabu ke o kerei koya a vakavuna na kena volai me vukei iko me vaka ga a cakava na daunisame, a tukuna: “Mo ni vakamataraitaki au, me’u kunea na ka e veivakurabuitaki e na nomuni vunau.” (Same 119:18) Masu vua na Kalou ena gauna kece o wili iVolatabu kina, kerea me vukei iko mo kila na ka e tukuni ena nona Vosa. O rawa ni vakavinavinakataka tale ga vua na iVolatabu nida kilai koya rawa kina.​—Same 119:62.

E dau rogoca na Kalou na masu ni kere veivuke? Qo na ka e rau sotava na veitacini yalewa itabagone mai Uruguay. E sega ni matata vei rau na ka e tukuna na iVolatabu ena Taniela 2:44 rau qai masuta na Kalou me tala yani e dua me lai vakamacalataka na kena ibalebale. A se dola toka ga nodrau iVolatabu na goneyalewa, rau sa tukituki yani na iVakadinadina i Jiova. Erau wilika na tikinivolatabu vata ga rau a masuta na goneyalewa me rau kila na kena ibalebale, rau qai vakamacalataka na iVakadinadina ni Matanitu ni Kalou ena sosomitaki ira na matanitu kece vakatamata.b Erau vakadeitaka na veitacini ni a sauma na Kalou na nodrau masu ni kere veivuke.

4 Wilika e veisiga

◼ E levu era dau wilika ga na Vosa ni Kalou nira sotava na leqa. Kena ivakaraitaki, e raica e dua na dautabaivola ni “vakasauri nodra voli iVolatabu vakalevu na lewenivanua” ni oti na nodra vakacaca na batikadi e Merika ena 11 Sepiteba 2001. Ia eda uqeti ena iVolatabu meda wilika e veisiga, e kaya: “Ai vola ni vunau oqo me kakua ni yali e na gusumu; ia mo vakanananu kina e na siga kei na bogi, mo vakabauta kina mo cakava me vaka na ka kecega sa volai kina: ko na qai kalougata e na nomui valavala, ia ko na qai tamata yaco.”​—Josua 1:8.

Na bibi ni wili iVolatabu e veisiga e vakatauvatani ina dua na turaga e tauvi mateniuto, qai vakatulewataka me sa kania ga na kakana bulabula. Ena yaga vua ke kania ga na kakana bulabula ni sa mosi kaukaua na serena? Sega. Ena yaga vakalevu ga ke kania e veigauna na kakana bulabula. E va tale ga qori na wili iVolatabu, o na “tamata yaco” ke o wilika e veisiga.

5 Veiveisautaka na kena iwalewale

◼ E vinaka na wiliwili mai na Vakatekivu ina Vakatakila, ia o na rairai taleitaka eso tale na kena iwalewale. Qo eso na vakatutu.

Wilika na kena italanoa e dua ena iVolatabu. Wilika na wase kece se ivola ena iVolatabu e vakamacalataki koya e dua na dauveiqaravi ni Kalou, me vakataki:

• Josefa: Vakatekivu 37-50.

• Ruci: Ruci 1-3.

• Jisu: Maciu 1-28; Marika 1-16; Luke 1-24; Joni 1-21.c

Digia e dua na ulutaga. Wilika na tikinivolatabu me baleta na ulutaga qori. Kena ivakaraitaki, vakekeli ena ulutaga me baleta na masu, wilika na kena ivakasala vakaivolatabu vaka kina eso vei ira na masu era volai ena iVolatabu.d

Wiliwili e cake. Ena yaga sara vakalevu vei iko nomu wilika e cake na iVolatabu. (Vakatakila 1:3) E rawa ni dou cakava qori vakavuvale, dou yadua na tikina se ra lesi na lewenivuvale mera wilika na ka era tukuna eso era volatukutukutaki ena iVolatabu. Eso era taleitaka mera rogoca na wili iVolatabu katoni. A tukuna e dua na yalewa, “A dredre meu wilika na iVolatabu, au mani tekivu ena noqu rogoca na kena e katoni. Au sa qai raica qo ni kamica cake na wili iVolatabu mai na wiliki ni dua na ivola ni talanoa vinaka.”

6 Vakananuma

◼ Na bula osooso nikua kei na levu ni ka e dau veivakawelei ena vakadredretaka noda vakananuma na ka eda wilika ena iVolatabu. Eda kila ni bibi me qaqi vinaka na ka eda kania me qai yaga e yagoda, e bibi tale ga meda vakananuma na ka eda wilika ena iVolatabu me yaga kina vei keda. Eda cakava qori ena noda vakasamataka na ka eda wilika nida taroga na taro va qo: ‘Na cava au vulica eke me baleti Jiova? E yaga vakacava vei au? Au na vukei ira kina vakacava eso tale?’

Ke da dau vakasama va qori, ena tara sara ga na lomada na ka eda wilika ena iVolatabu qai vakamarautaki keda vakalevu. E tukuna na Same 119:97: “A ka vakaidina na noqu loloma ki na nomuni vunau! Au sa vakanananu kina e na siga taucoko ka bogi.” Ni vakananuma na daunisame na ka e wilika ena iVolatabu, sa qai taleitaka vakalevu ga na ka e vulica.

7 Kere veivuke

◼ E sega ni namaka o Jiova meda kila ga vakataki keda na nona Vosa. Na iVolatabu mada ga e tukuna ni volai kina “eso na ka e kilakilai dredre.” (2 Pita 3:16) E vakamacalataki ena Cakacaka ni a sega ni kila e dua na turaga ni Iciopea na wase ni iVolatabu a wilika tiko. A tala sara na Kalou e dua nona dauveiqaravi me lai vukei koya, oti ya ‘a gole sara ena levu ni nona marau’ na turaga ni Iciopea.​—Cakacaka 8:​26-39.

Ena yaga vakalevu tale ga vei iko nomu wili iVolatabu ke o kerea e dua me vukei iko mo kila na ka o wilika. Kerea e dua na iVakadinadina i Jiova ena nomu itikotiko se volavola ina itikotiko ena tabana e 4 ni mekesini qo mo vulica wale na iVolatabu.

[iVakamacala e ra]