Vakarautaki ni iTavi ena Koronivuli

NI SOLI vei iko e dua na itavi ena koronivuli, oqo e gauna vinaka mo vakaraitaka kina nomu toso. Vakavakarau vinaka, o na vakila ni o maqosa cake tiko ga ena vosa, era na raica tale ga na tani. (1 Tim. 4:15) Ena toroya cake na koronivuli na taledi sa tu rawa vei iko.

O dau rere ni tukuni mo vosa e matadra na ivavakoso? E dau yacovi keda kece oqo, ena yacovi iko tale ga veitalia ke sa dede toka nomu curu ena koronivuli. Ia, e tiko e so na ka mo cakava mo kua soti kina ni rere. Dau wilivola i cake ni o tiko e vale. Dau vakamacala ena soqoni ni ivavakoso, ke o sa dautukutuku, lako vakawasoma ena cakacaka vakavunau. Oqo ena matau kina vei iko na vosa e matanalevu. Kena ikuri, vakarautaka vinaka na itavi e lesi vei iko, vakatovotovotaka ena nomu vosa i cake. Nanuma tiko ni o na vosa tiko ga vei ira na mataveitacini. Ni bera tale ga ni o tucake mo lai vakaitavi, masu vei Jiova. E tu vakarau me solia na yalona tabu vei ira nona tamata era kerea vua.​—Luke 11:13; Fpai. 4:6, 7.

Kua ni namaka vakasivia na ka. Ena taura na gauna mo qai maqosa ena vosa, se mo qasenivuli matua. (Maika 6:8) Ke o se qai curu vou ena koronivuli, kua ni nanuma me na totoka vakaoti na nomu itavi ena dua ga na gauna lekaleka. Lakova yadua na tikina e so o na vakasalataki kina. Vulica na wase ni ivola oqo e vakamacalataki kina. Ke rawa, vakatovotovotaka tale ga na veika era vakaturi ena wase oya. Oqo ena vakamatauni iko ena tikina o na dikevi kina ni bera ni o qai vakaitavi ena soqoni. Na toso ena qai laurai ga.

Ke O Lesi Mo Wilivola e Matanalevu

Ni o vakarautaka na ka mo na wilika, kua ni nanuma ni nomu itavi ga na wiliwili. Saga mo kila vinaka na ibalebale ni ka o wilika. Oqo sara ga na ka mo na vakasamataka tiko ni o lai vakawilika na tikina e lesi vei iko ni o taura oti ga nomu ilesilesi. Me matata vei iko na yatuvosa yadua, kei na ile ni parakaravu yadua, mo vakadewa na kena vakasama ena kena ibalebale dina kei na kena itautau dina. Ni basika e dua na vosa dredre, raica na volavosa mo kila kina na kena icavucavuti dodonu. Kila vinaka na ka o na wilika. Vei ira na itubutubu, de dua ena bibi mera vukei ira na luvedra ena tikina oqo.

O sa bau lesi mo wili iVolatabu se wili Vale ni Vakatawa? Ke sa tu ena kaseti na ka mo na wilika, ena vukei iko sara vakalevu na nomu vakarogoca me matata kina vei iko na icavucavuti ni vosa, matavosa mera wiliki vata, vosa me vakabibitaki, kei na veilutuyaki ni domomu. Muria sara oqo ena nomu wiliwili.

Ni o vakarautaka nomu itavi, kua ni guilecava mo vulica vinaka sara na lesoni ena ivola oqo e lesi mo cakacaka kina. Ke rawa, raica tale na lesoni oqo ni o sa vakatovotovotaka oti vakavica vata vakadomoilevu na nomu itavi. Saga ena nomu vinaka kece mo muria na ivakasala e volai mo cakacaka kina.

Oqo ena yaga sara vei iko ena nomu cakacaka vakaitalatala. Ni o vakaitavi ena cakacaka vakavunau, o na dau wilivola vakalevu vei ira na tani. E kaukaua na Vosa ni Kalou, e rawa ni veisautaka na bula ni tamata, e bibi kina mo wilika sara vakavinaka. (Iper. 4:12) Kua ni nanuma mo sa na kenadau ena wilivola ena imatai ga se ikarua ni nomu itavi. E vola na yapositolo o Paula vua e dua na qase ni ivavakoso vakarisito e sa vakayabaki nona dau wilivola e matanalevu: “Mo gumatua e na wilika na i Vola Tabu vei ira na lewe vuqa.”​—1 Tim. 4:13, VV.

Usutu kei na iTuvatuva

Na cava mo cakava ke itavi e lesi vei iko ena koronivuli e dodonu me dua na kena ituvatuva?

Tolu na ka lelevu mo na vakasamataka: (1) na usutu e lesi vei iko, (2) nomu ituvatuva kei koya drau na veivosaki, kei na (3) ivakasala ni vosa e lesi mo cakacaka kina.

Mo na kumuna na ivakamacala era tokona nomu usutu. Ia, ni bera ni o vakarautaka sara, vakasamataka mada na nomu ituvatuva kei koya drau na vakaitavi vata ni na rawa ni vakatau mai kina na lewe ni nomu ivakamacala kei na yasana o na via vakamacala mai kina. Na cava ena nomu ituvatuva? Mo vunau tiko beka vua e dua drau veikilai? Se mo vakaraitaka na ka e rawa ni yaco ni dua e sotavi ena imatai ni gauna? E qase vei iko o koya drau vakaitavi se gone vei iko? Cava beka nona vakasama ena usutu o nanuma mo drau veivosakitaka? Cava e sa na rairai kila rawa toka? Na itukutuku cava o na vinakata me matata vua ni oti nomudrau veivosaki? Era bibi sara na isaunitaro kece oqo ni na yavutaki mai kina nomu vakavakarau.

O na raica e vei na lewe ni ulutaga e lesi vei iko? Ena yaga vei iko na ka e vakamacalataki ena taqana e 33 ina 38 ni ivola oqo me baleta na “iVakarau ni Vakekeli.” Wilika, oti oya vakayagataka sara na iyaya ni vakekeli e tu vei iko. Vakalevu ga me levu tale na itukutuku eda kumuna e lailai na kena eda rawa ni vakayagataka. Me bau levu toka na ka o vakawilika me rabailevu kina na itukutuku o kumuna. Ia, ni o vakayacora oqo, nanuma tiko na ituvatuva o na vakayagataka, vaka kina o koya drau na veivosaki. Toqa ga na tikina e veiganiti mo vakayagataka.

Ni bera ni o tuvana na nomu vosa, ni bera tale ga ni o digia na veitikina mo vakayagataka, wilika mada na ivakamacala ni ivakasala ni vosa e lesi mo cakacaka kina. E dua na vuna levu e soli kina vei iko na nomu itavi me na dikevi na nomu taurivaka na ivakasala ni vosa.

Ke o vinakata mo vakayacora vinaka nomu itavi me yacova sara na kena itinitini, e bibi mo na cakava ga ena loma ni gauna e soli vei iko, baleta ni na tarovi iko koso o qasenivuli ke sa oti nomu gauna. Ia, ena noda cakacaka vakavunau, e sega ni dau leqataki soti na balavu ni gauna meda vosa kina. Ni o vakarautaka gona nomu itavi ena koronivuli, me nomu inaki mo veivakavulici, se mani vakacava na balavu ni gauna e soli vei iko.

iTatau me Baleta na iTuvatuva. Dikeva na ituvatuva era vakaturi ena taqana e 82, qai digitaka e dua ena yaga ena cakacaka vakaitalatala, o na vakayagataka vinaka tale ga kina na ulutaga e lesi vei iko. Ke sa dede nomu vakaitavi ena koronivuli, vakayagataka na gauna oqo mo vakavinakataka tiko ga kina na nomu cakacaka vakaitalatala.

Ke sa lesia rawa mai na ituvatuva mo cakacaka kina na ivakatawa ni Koronivuli ni Vuli Vunau, ciqoma. E levu na ituvatuva e baleta tiko ga na noda vunau. Ke o se bera vakadua ni vunau vua e dua ena ituvatuva e lesi vei iko, taro ivakasala vei ira na dautukutuku era sa sotava oti na ituvaki vaka oqo. Ke rawa, tovolea mada ena cakacaka vakaitalatala na ituvatuva o nanuma mo na vakayagataka ena koronivuli. Ni o vakayacora oqo, o sa na rawata kina e dua na inaki bibi ni nomu vakaitavi ena koronivuli.

Ke O Lesi Mo Vosa

Ke o tagane, o na lesi beka mo vosa vakalekaleka ena matadra na lewe ni ivavakoso. Ni o vakarautaka nomu vosa, e tautauvata ga na ka mo na vakasamataka kei na ka e sa vakamacalataki oti vei ira na yalewa era dau vakaitavi ena koronivuli. Kena duidui ga ni o iko o sega ni lai veivosaki kei na dua tale ena buturara. O na vosa sara ga vakadodonu vei ira na lewe ni ivavakoso.

Na itavi o vakarautaka e dodonu me yaga vei ira kece na vakarorogo. E levu era rogoci iko era sa kila tu na yavu ni ka dina ena iVolatabu. De dua era buta vinaka ena ulutaga e lesi vei iko. Nanuma tiko na ka era sa kila rawa tu ena ulutaga mo na vosa kina. Saga me dua na sala me yaga kina vei ira na ka o na talaucaka. Tarogi iko: ‘Au na vakayagataka vakacava na ulutaga oqo meu vakatitobutaka kina o yau kei ira na rogoci au, na neimami kilai Jiova? Na cava e kaya na ulutaga oqo me baleta na loma ni Kalou vei keda? Ena vukei keda vakacava na ulutaga oqo meda vakatulewa vakadodonu ena vuravura e sa solegi tu ena gagadre vakayago?’ (Efeso 2:3) Era na qai saumi vinaka ga na taro oqori ke da vakekeli. Ni o vakayagataka na iVolatabu, kua ni wiliwili wale ga. Vakamacalataka na vuna o vakayagataka kina, qai vakaraitaka na sala e tokona kina na nomu ile. (Caka. 17:2, 3) Me kua ni sivia na tikina o vakamacala kina. Ni o sa lai vosa, tauca ena kena itautau me na rawarawa kina nodra nanuma na vakarorogo na ka o tukuna.

Me tiki tale ga ni nomu vakavakarau na nomu vakarautaka na itukutukuni ni ka o na tukuna. Kua ni vakawaletaka na tikina oqo. Vakatovotovotaka vakavica na nomu itavi ena nomu tukuna vakadomoilevu. Ena laurai vakalevu sara na nomu toso ke o saga mo vulica, mo qai vakayagataka sara na veimataqali iwalewale ni vosa. Se o vou ena vosa ena buturara se o sa dau vakaitavi makawa kina, e bibi ga mo vakavakarau vinaka mo yatedei kina ni o mai vosa, me momona tale ga na nomu ivakamacala. Ni o vakayacora nomu itavi ena koronivuli, nanuma tiko ni inaki levu ni nomu vakayagataka na isolisoli ni vosa e solia vei iko o Jiova mo dokai koya kina.​—Same 150:6.