Yavutaka Nomu iVakamacala ena iVolatabu

NIDA dau tarogi ena ka e vauca na noda vakabauta, noda ivakarau ni bula, noda nanuma baleta na veika e yaco tu, kei na noda inuinui baleta na gauna se bera mai, eda dau vinakata ga me yavutaki ena iVolatabu na noda ivakamacala. Ena vuku ni cava? Baleta na iVolatabu e Vosa ni Kalou. E yavutaki mai kina na noda vakabauta, noda ivakarau ni bula, kei na noda nanuma me baleta na veika e sa yaco tu nikua e vuravura. Na noda inuinui tale ga me baleta na gauna se bera mai e yavutaki ena vosa ni yalayala ni Kalou e volai ena iVolatabu.—2 Tim. 3:16, 17.

Eda kila vinaka ni yacada e sega ni iukuuku wale ga. E noda Kalou o Jiova, eda nona iVakadinadina. (Aisea 43:10) Nida na sauma gona e so na vakatataro, eda na yavutaka ga na noda vakamacala ena Vosa i Jiova, na iVolatabu, sega ena vakasama vakatamata. O keda yadua e dui tu na noda rai, ia eda vakalaiva na Vosa ni Kalou me noda idusidusi baleta nida kila ni tiko kina na ka dina. Na iVolatabu tale ga e solia vei keda na galala meda dui vakatulewa ena levu na ka. Nida veivakavulici gona, meda kua ni suguraka vei ira na tani na noda rai, ia meda vakavulica ga na ivakavuvuli e koto ena iVolatabu, da qai laiva ga vei ira na galala ni vakatulewa. Me vakataki Paula ga, eda vinakata me yavutaki na nodra talairawarawa ena ka ga era sa rogoca ra qai vakabauta.—Roma 16:26.

E vakamacalataki ena Vakatakila 3:14 (VV) ni o Jisu Karisito e “i vakadinadina dina ka yalodina.” E sauma vakacava na taro e dau tarogi vua, na cava tale ga e cakava ena dui ituvaki e sotava? So na gauna, e dau cavuta e so na vosa vakatautauvata me uqeta kina nodra vakasama na vakarorogo. So tale na gauna e dau taro lesu me macala kina se vakacava nona kila e dua na tikinivolatabu o koya e taro. Vakalevu tale ga nona dau cavuqaqataka e so na tikinivolatabu se nona vakamacalataka ga, kei nona dau dusia e so na ka e volatukutukutaki ena iVolatabu me ka ni vuli. (Maciu 4:3-10; 12:1-8; Luke 10:25-28; 17:32) Ena imatai ni senitiuri, era dau maroroi tu ga ena veivalenilotu na ivolavivigi ni iVolatabu. E sega ni macala gona se a taukena tu o Jisu e so na ivolavivigi se sega, e macala ga vei keda ni buta vinaka o koya ena iVolatabu, e dau vakayagataka tale ga ena nona veivakavulici. (Luke 24:27, 44-47) Sa rauta me kaya o koya ni sega ni vakavulica na ka ga e nanuma. E tukuna ga na ka e rogoca vei Tamana.—Joni 8:26.

Eda vinakata meda muria na ivakaraitaki i Jisu. E dina nida sega ni rogoca na domo ni Kalou me vakataki Jisu, ia na iVolatabu e nona Vosa. Eda na vakaraitaka nida sega ni vinakata meda dokai ga nida vakayagataka na nona Vosa me yavu ni noda isaunitaro. Eda sega ni vinakata meda tukuna na rai ni tamata ivalavala ca, eda vinakata ga me vakaraitaka na Kalou na ka dina.—Joni 7:18; Roma 3:4.

E noda inaki meda vakayagataka na iVolatabu, ia meda vakayagataka me yaga vei koya e rogoci keda. Saga me tadola tiko ga nona vakasama me rawa ni rogoci iko. Ke o raica ni veiganiti, o rawa ni vakacuruma e dua na vakasama vakaivolatabu ena nomu taroga: “Oni vakabauta ni bibi meda vaqaqa se cava sara mada e kaya na Kalou?” Se rawa ni o taroga: “Oni kila na ka e kaya na iVolatabu me baleta na tikina oqori?” Ke sega ni vakabauta na iVolatabu o koya drau veivosaki tiko, ena via duidui toka na ka mo na tukuna. Rawa ni o tukuna: “Au na via vakaraitaka vei kemuni e dua na parofisai makawa oqo.” Se o na kaya beka: “Na ivola e veisoliyaki vakalevu duadua e vuravura e kaya . . . ”

So na gauna o na via cavuqaqataka e dua na tikinivolatabu. Ia, ena vinaka mo cega sara ga na iVolatabu mo qai wilika. E rawa tale ga ni o sureti itaukeinivale me wilika sara ga na tikinivolatabu mai na nona iVolatabu. Na vakayagataki vaka oqo ni iVolatabu e rawa ni tarai ira sara ga na vakarorogo.—Iper. 4:12.

Vei ira na qase ni ivavakoso, e gadrevi vakabibi sara vei ira mera vakayagataka na iVolatabu nira sauma nodra taro na lewe ni ivavakoso. E dua na yavu e lesi kina e dua me qase ni ivavakoso na nona rawa ni “taura dei na i vakavuvuli dina sa vakatavulici kina.” (Taito 1:9, VV) E bibi me yavutaki ena iVolatabu na nona ivakasala na qase ni ivavakoso, baleta na nona ivakasala e rawa ni vakavuna me lai vakatulewataka e so na ka bibi o koya e vakasalataki. Ke ra ivakaraitaki vinaka ena tikina oqo na qase, e rawa nira vuli tale ga kina na kena vo mera dau yavutaka tale ga ena iVolatabu na nodra veivakavulici.