Vakayagataki ni Gusunivosa

E KA ni sasaga vei ira na so nodra lakova na soqoni. Ia, ena qai yaga ga vei ira na soqoni kevaka era rogoca na ka e tukuni.

A sega na misini livaliva ni vosa ena nodra gauna na Isireli makawa. Ia, era qai rogoca ga vakacava na vica na milioni na Isireli na vosa nei Mosese vei ira ena buca o Moapi, ni bera nira curuma na Vanua Yalataki? A rairai vakarautaka o Mosese e so na tagane mera tuvani ena nodra keba taucoko na Isireli ena gauna e vosa kina, mera qai vakadewa vakaveitaravi yani na tagane oqo na ka e tukuna me yacovi koya sara na kena iotioti. (Vkru. 1:1; 31:1) Sega ga ni dede mai na nodra tekivu vakavua na Isireli na veivanua ena ra ni Joritani, a qai soqoni ira o Josua ena mata ni ulunivanua o Kirisimi kei Ipali, ra soqoni ena kena buca na Livai. E keri, era lai rogoca kece kina na Isireli na ka ni veivakalougatataki ena tauca vei ira o Jiova ke ra vakarorogo, kei na ca era na sotava ke ra talaidredre. (Josua 8:33-35) E vakabauti ni vakayagataka tale ga i ke o Josua na ivakarau ni vakadewa vosa a vakayagataka o Mosese, ia e vakarawarawataka tale ga na rogoci ni domona na ituvaki ni vanua era mai soqoni vata kina.

Oti tale e 1,500 na yabaki, era a soqoni vata mai e “lewe vuqa sara” ena bati ni Wasawasa o Kaleli mera mai rogoci Jisu. Sa qai vodo ena dua na waqa o Jisu, biliga yani me yawa toka vakalailai mai na matasawa, sa qai vosa vei ira ne lewevuqa. (Mari. 4:1, 2) Na cava me lai vodo sara kina i waqa o Jisu me qai vosa mai? E vakadinadinataki ni makare vinaka cake qai rogo vinaka na domo e voqa e dela ni wai.

Me yacova mai na itekitekivu ni ika20 ni senitiuri, se vakatau tiko ga ena kaukaua ni domona e dua e vosa tiko mai na buturara na levu ni tamata era na rogoca rawa na nona itukutuku. Ia, tekivu ena 1920 vakacaca, sa ra qai vakayagataka na iVakadinadina i Jiova ena nodra soqo lelevu na misini ni vosa e sa buli oti tu ena gauna oya.

Misini ni Vosa. Na misini ni vosa e rawa ni vakarogolevutaka na domoda, ia ena gauna vata oya me rogo matau tiko ga. Ena sega ni qai vinakati me kaila o koya e vosa. O ira tale ga na vakarorogo era sa na sega ni qai ogaoga voli ena nodra saga mera rogoca vinaka na ka e tukuni. Era sa na galala mera vakasamataka vakatabakidua na ka e tukuni mai.

E dau qarauni sara me rogoci vinaka kece na ka e talaucaki mai ena buturara ena veisoqo lelevu ni iVakadinadina i Jiova. E levu tale ga na noda vale ni soqoni e sa tu na kedra misini ni vosa me vakarogolevutaka na domodra o ira era vosa se wilivola mai na buturara. E so na ivavakoso era vakarautaka tale ga na gusunivosa mera na vakayagataka na lewe ni ivavakoso nira vakamacala ena gauna ni soqoni. Ke tiko oqo ena nomu ivavakoso, vulica sara na kena ivakavakayagataki dodonu.

Veika me Nanumi. Oqo e so na ka mo nanuma vinaka me baleta na nomu vakayagataka na gusunivosa: (1) Me via cagadua (se 10 ina 15 na sedimita) na yawa ni gusunivosa mai gusumu. Ke rui voleka i gusumu na gusunivosa, ena rogolevu na domomu ia ena sega ni kilai na ka o tukuna. Ke rui yawa mai gusumu, ena rogo lailai na domomu qai sega ni matata. (2) Me donuya na gusumu na gusunivosa, me kua ni tu vakababa. Ke o qara ina imawi se ina imatau mo qai vosa ga ni sa donuya na gusumu na gusunivosa. (3) Me kaukaua vakalailai na domomu ni o vosa, kua ga ni kaila. Baleta na itavi ni misini ni vosa me qai vakalevutaka na domomu me rogoci vinaka. (4) Ke o via terema ni o vosa tiko me tadola vinaka kina nomu itilotilo, se o via vu, se suru, qara tani mai na gusunivosa.

Ni O Vunau Mai na Buturara. Ni o lai duri mai mo vosa, ena tiko e dua ena lai tosoya na gusunivosa me ganiti iko. Ni cakava o koya nona cakacaka, e vinaka mo tucake ga vakavinaka qai qara vei ira na vakarorogo. Biuta nomu tikidua ni vunau ena itutunivunau, ia me kua ni vakalatilati e matamu na gusunivosa ni o raica na tikidua.

Ni o tekivu vosa, tovolea mo rogoca na domomu e rogo tiko mai ena sipika. Sa rui voleka tale beka na gusumu ina gusunivosa, e sega ni matata kina na ka o tukuna? De dua ena vinaka mo toso vakalailai e muri ena rua ina lima na sedimita. Nanuma tiko mo vosa ga ena gauna o rai vakadodonu kina vei ira na vakarorogo se o rai cake, kua ni vosa ni o se raica sobu tu nomu tikidua ni vunau.

Ni O Wilivola Mai na Buturara. E vinaka mo taura tiko i cake na iVolatabu se ivola ona wilika mo qara tiko ga kina vei ira na vakarorogo. Me vaka ni na tiko mai matamu na gusunivosa, ena vinaka beka mo taura tiko ena yasana imawi se imatau na ivola ona wilika. Kaya mada ke o na taura nomu ivola ena yasana imawi, me toso vakalailai na ulumu ina yasana imatau, me gauna o raica kina na ivola ni o wiliwili, na gusumu ena donuya vinaka na gusunivosa.

Levu era lesi mera wili Vale ni Vakatawa era dau tucake mera wiliwili ena gusunivosa e vakaitutu. Era na cegu vakavinaka nira tucake, ena vakarawarawataka tale ga me bulabula na nodra wiliwili. Nanuma tiko ni wiliki ni Vale ni Vakatawa e taura e dua na gauna levu ni soqoni. O koya gona, na yaga ni soqoni vei ira na vakarorogo e vakatau tale ga vakalevu ena nodra rogoca na ka e wiliki.

Ni O Saumitaro ena Soqoni. Ke vakarautaki ena nomu ivavakoso na gusunivosa vei ira era saumitaro se vakamacala, e bibi mo kila ni se yaga tiko ga na vosa vakamatata, kei na vosa i cake. Ni o vosa, e vinaka mo taura i cake na ivola e vulici tiko se na iVolatabu. Oqo e kena inaki me vakarawarawataka na nomu raica tiko na ivola kei na nomu vosa tiko vakadodonu ena gusunivosa.

So na ivavakoso e sa dau tu ga o ira mera veikauyaka na gusunivosa vei ira era vakamacala ena soqoni. Ke caka oqo ena nomu ivavakoso, e vinaka mo na laveliga tu ga kevaka mada ga e sa kacivi na yacamu, oqo me solia na gauna vei koya e veikauyaka tiko na gusunivosa me raici iko. Ke sega ni vakadiana na gusunivosa, tu vakarau mo dodoka yani na ligamu mo taura. Kua ni tekivu vakamacala ke se sega ni yacovi iko na gusunivosa. Vakasuka vinaka na gusunivosa ni o vakamacala oti.

Ni O Veivosaki ena Buturara. Na vakayagataki ni gusunivosa ni caka na veivosaki ena buturara e dodonu me vakarautaki vinaka. Ke na coba tiko na gusunivosa ena kena itutu, sa na galala na ligamu ruarua mo taura kina na iVolatabu kei na nomu tikidua. Ia, ona galala mo yavala se veitosoyaki vakalevu cake ke o vakayagataka na gusunivosa e sega ni coba ena kena itutu, ia de dua ona via kerei koya na nomu itaukeinivale me taura vei iko. Oqo ena galala kina na ligamu mo taura nomu iVolatabu. Dodonu mo drau vakarautaka vakavinaka oqo kei koya ena nomu itaukeinivale me rawa ni matau kina vua nona taura na gusunivosa. Ni o vakaitavi tale ga mai na buturara, kua ni vakanadakui ira na vakarorogo, vakauasivi ni o vosa.

So na veivosaki e dau caka ena buturara ena Soqoni ni Cakacaka e dau lewe levu toka era vakaitavi kina, so tale era sega ni dau dabe tu ga vakadua na vakaitavi. Ena gadrevi beka kina me vica toka na gusunivosa e vakayagataki. Oqo e dodonu me vakarautaki rawa ena buturara, se me soli vei ira na vakaitavi ena gauna era lako kina ina buturara. E gadrevi na vakavakarau vinaka me veirauti kina na gusunivosa e vakarautaki, mera tu tale ga ena kedra vanua dodonu. Na vakarautaki ni veivosaki ena buturara ni bera na soqoni e gauna vinaka mera vakasalataki kina na vakaitavi ena ivakavakayagataki dodonu ni gusunivosa. Ke sega ni rawa ni lai caka oqo ena buturara, ena yaga mera taura toka na vakaitavi e so na ka me vaka toka beka me nodra gusunivosa nira vakatovotovo e vale, oqo ena vakamatauni ira ena kena itautauri. Ni oti na veivosaki ena buturara, me biu lesu vakamalua na gusunivosa, mera qarauna tale ga na vakaitavi mera kua ni tacaqe ena kena wa nira biubiu mai na buturara.

Dua na inaki levu eda lako mai kina ina soqoni meda veivakauqeti. Ia, ena rawa ga oqo ke rogoci noda vakamacalataka na Vosa ni Kalou. (Iper. 10:24, 25) O koya gona, e rui bibi meda kila vinaka na ivakavakayagataki dodonu ni gusunivosa.