Rogorogo ni Domo

NA YAGA ni ka eda rogoca e sega ni vakatau wale ga ena ka e tukuni, e vakatau tale ga ena kena itukutukuni. O keda kece eda taleitaka na vosa e rogo vinaka, e tau ena dela ni loloma, veikauaitaki, kei na veinanumi, mai na vosa e tau kaukaua se tau sabalia.

Na rogo vinaka ni domo e sega ni vakatau wale ga ena gacagaca ni domoda. E rawa ni vakatau tale ga ena noda itovo. Ni dua e vulica na ka dina mai na iVolatabu qai bulataka, ena laurai na veisau ena nona ivosavosa. Ena vakilai ena irogorogo ni domona na itovo me vaka na loloma, reki, kei na yalomalua. (Kala. 5:22, 23) Ena vakilai tale ga ena irogorogo ni domona ke dau veikauaitaki. Ni vakavinavinaka qai sega ni didi se kudru, ena kilai oqo ena vosa e cavuta kei na kena irogorogo. (Lele 3:39-42; 1 Tim. 1:12; Juta 16) Ke o sega mada ga ni kila na vosa e vosataka tiko e dua, na irogorogo ga ni domona o sa na kila kina ke dokadoka, e veisaqa, e vakalelewa, se cudru, mai vei koya e yalomalua, vosota, yalovinaka, e dau loloma.

Na tauvimate se ibulicaki ni yago e rawa ni vakavuna me sega ni rogo vinaka na domodra e so. E so vei ira oqori sa na sega ni wali na kedra mate ena gauna oqo. Ia, e rawa ni vinaka cake na rorogo ni domodra ke ra vulica e so na sala mera vakayagataka vinaka kina na gacagaca ni domodra.

E vinaka me matata vei keda ni na duidui ga na rorogo ni domoda. O koya gona, kua ni saga mo vukica na irogorogo ni domomu me tautauvata kei na dua tale. Ka ga mo cakava mo vakavinakataka na irogorogo ni domomu, de dua e rawa ni rogo vinaka sara. Na cava ena vukei iko ena nomu cakava oqo? E rua na ka bibi mo na cakacaka kina.

Maninitaka na Cagi O Ceguva. Ke o vinakata me rogo vinaka na domomu, e dodonu me levu na cagi o ceguva, mo qai maninitaka na cagi oqori. Ke sega, ena rogo malumu sara na domomu, ena cacavukavuka tale ga na nomu vosa.

Na rabalevu ni suinitabada era nanuma kina e so ni noda yatevuso e levu i cake lailai na botona. Ia, na yatevuso e rabalevu na botona, ena vanua erau sota kina kei na ilatikoso. Na ilatikoso e kabi toka ena batinisereda e ra, e toka ena maliwa ni keteda kei na sereda.

Ke o vakatawana wale ga na nomu yatevuso i cake ena gauna o cegu kina, sega ni dede sa na oti tale na cagi o ceguva. Ena malumalumu na rorogo ni domomu, o na ceguoca totolo. Ke o vinakata mo vakatawana vinaka nomu yatevuso, dabe se tucake vakadodonu, dreta i muri na vatuvatu ni tabamu. Ni o cegu mo vakarau vosa, saga sara mo kua ni vakatawana wale ga na seremu i cake. Vakatawana mada e liu na boto ni nomu yatevuso. O na vakila ni o sa vakayacora oqo ke cere mai na seremu ena gauna o cegu kina. Ena sudra sobu na ilatikoso ena gauna vata oqo, lai biliga sobu sara na kete kei na iwawa, o na vakila sara ni via oso na nomu beleti se isulu o dara donuya na ketemu. Ni tiko e loma ni seremu na nomu yatevuso, e rawa ni o tara na batiniseremu ruarua mo vakila kina ni rau cere mai ena gauna o cegu kina vakavinaka. Ena yasana adua, ke kino na ketemu ena gauna o cegu kina, qai talave cake na vatuvatunitabamu, oqo e vakaraitaka ni o sega ni tawana vinaka nomu yatevuso.

Oti, mo sa qai qarauna nomu vakayagataka na cagi o sa ceguva. Vakayagataka vakavuku me kua ni maumau. Maninitaka. Ia, ni o cakava oqo, kua ni vakaukauataka nomu itilotilo, ni na rawa ni wakiki se watatagi tale kina na domomu. E vakatau ena uaniketemu kei na uaniseremu na curu i tuba ni cagi, ia na ilatikoso e sa qai lewa na kena totolo.

Era dau tereni na daucici, o ira tale ga na dauvosa mai na buturara e dodonu mera “tereni” se vakamatauni ira mera dau vakayagataka vinaka na cagi era ceguva. Tucake vakadodonu qai dreta i muri na vatuvatu ni tabamu, cegu me tawa vinaka na boto ni nomu yatevuso, tekivu wiliwili vakamalua mo raica se na yaco e vei na levu ni nomu wiliwili ena dua ga na nomu cegu. Cakava tale, ia ena gauna oqo mo wilivola.

Me Cegu na Yagomu. Oqo e dua tale na ka e rawa ni vakavinakataka na rorogo ni domomu. O na kurabuitaka na rogo vinaka ni domomu ke cegu vinaka na yagomu ni o vosa. E dodonu me cegu vinaka tale ga na vakasama, ni rawa ni tadre na yago se oca ke curuoso na vakasama.

Ena cegu nomu vakasama ke donu nomu raici ira na vakarorogo. Ke o vakarau vosa vua e dua ena cakacaka vakavunau, nanuma tiko ni kevaka mada ga e se qai vula vica nomu vuli iVolatabu, o sa kila e so na ka me baleti Jiova o rawa ni wasea. O lako tale ga yani vei ira ni dodonu mera vukei, se ra kila tiko oqo se sega. Ena yasana adua, ke o vosa tiko ena Kingdom Hall, e levu ga vei ira na rogoci iko era tamata i Jiova. Era nomu itokani, era vinakata tale ga mo cakava vinaka nomu itavi. Sega tale ni dua na vanua eda na kunei ira kina na dauvakarorogo vinaka me vakataki ira ena Kingdom Hall.

Ni o vosa tiko, kua ni guilecava me cegu tiko ga na ua ni nomu itilotilo. Nanuma tiko ni na vanini na uanidomomu ni curu i loma se curu i tuba na cagi. Ena wakiki na rorogo ni domo ke tadre na uanidomo, ena rogo malumu tale ke cegu. E vaka ga na rorogo ni wa ni qita se ukalele nida wirica me kaukaua se vakalesuya me malumu. Ni o vakamalumutaka na uanidomomu, ena malumu vinaka na rorogo ni domomu. Ena tadola vinaka tale ga na loma ni ucumu ke cegu vinaka tu na uanidomomu, oqo ena vakilai sara ga ena rogo vinaka ni domomu.

Me cegu na yagomu kece—na durumu, ligamu, tabamu, kei na domomu. Oqo ena voqa vinaka kina na domomu. Na voqa vinaka ni domomu ena vakatau ena yagomu taucoko, ia e rawa ni basika na leqa ke sega ni cegu na yagomu. Na vu ni rorogo e tiko ena loma ni katonidomo, ia na kena voqa vinaka ena vakatau ena lomaniucu, saresare, bati, dokanigusu kei na qaraniucu. Ena sega ni voqa vinaka na rorogo ni qita ke o bika na dagona ni o qiria tiko; me kua ni dua na ka e bika na dago ni qita ke vinakati me voqa vinaka na rorogo e lomana. E via vakatale ga oqo na yagoda—na sui kei na ua e tauri ira vata. Ena voqa vinaka na domomu ke cegu na yagomu, o na vakarogotaka tale ga vakavinaka na duidui rorogo o via vakavotuya. O na sega tale ga ni kaila ni o vosa vei ira e lewe levu.