Vakavotui na Veitikina Bibi

NA CAVA na veitikina bibi ni dua na vunau? E sega ni tiki bibi ni vunau na tikina lalai era vakamacalataki ga vakalekaleka, oqo era isaluaki ga ni ivakamacala. E tiki bibi ni vunau na veika bibi e dau taura na gauna mo vakamacalataka. Na veitikina o na sega ni rawa ni vakalutuma nira tokona sara ga na ulutaga o vosa tiko kina, qai vakamatatataka na nomu inaki.

Ke o vinakata mera votu mai na veitikina bibi ena nomu vunau, e dodonu mo digitaka vinaka na ka mo tukuna, mo na tuvana vinaka tale ga. Levu sara na itukutuku o na raica ena nomu vakekeli. O na kila vakacava na kena mo na vakayagataka?

Kena imatai, mo na vakasamataki ira na vakarorogo. Era kila vinaka na ulutaga o na vosa kina se sega? Vakacava era vakabauta kece na ka e tukuna na iVolatabu me baleta na ulutaga oqori, se so era sega ni duavata kina? Na cava e so na ka dredre era sotava e veisiga ena nodra saga mera muria na ka e kaya na iVolatabu me baleta na ulutaga o na vosa kina? Kena ikarua, me matata vei iko na nomu inaki ni o vosa vei ira na vakarorogo ena ulutaga o sa digia. Vakayagataka e rua na ivakavuvuli oqo ena nomu vakalewa na itukutuku o sa kumuna rawa, mo qai vakayagataka ga na kena era veiganiti dina.

Ke sa vakarautaki rawa na ulutaga mo vosa kina kei na lewe ni nomu vosa, muria sara vakavoleka. Ia, ena yaga vakalevu sara na ka o tukuna ke o nanuma tiko na veika e tukuni mai cake me baleta na vakamacalataki ni veitikina bibi. Ke sega ni vakarautaki vei iko nomu suinivosa, kena ibalebale ni o na qai digia ga na veitikina mo vakabibitaka.

Ke sa matata vei iko na veitikina mo na vakabibitaka, o sa tuvani ira vinaka, o tuvana tale ga e so na ikuri ni kena ivakamacala, sa na rawarawa sara ni o sa na vunau. Kena irairai ni na yaga vakalevu vei ira na vakarorogo.

Nomu Tuvana Nomu iVakamacala. Na ituvatuva ni lewe ni ivakamacala e vica tiko na kena mataqali. Ni o kilai ira na vica na mataqali oqo, sa na qai rawa ni o digia na kena mo vakayagataka mo rawata kina nomu inaki.

Dua na kena e rawarawa sara na vakayagataka oya na tuvai vakaiwasewase ni veitikina bibi. (E bibi na tikina bibi yadua ni na matata kina vei ira na vakarorogo na ka e via tukuni tiko, ra taura rawa tale ga kina na inaki ni nomu vosa.) Dua tale na tuvai veitaravi ni ka e yaco. (Me kena ivakaraitaki, e rawa ni vakamacalataki e liu na veika e yaco ni bera na Waluvu Levu, tarava yani na veika e yaco ni bera ni vakarusai o Jerusalemi ena 70 S.K., qai muria sara yani na ka e yaco tiko ena noda gauna sara ga oqo.) Na ikatolu ni kena icakacaka oya na vakamacalataki ni leqa e yaco kei na ka e vakavuna. (Oqo ena qai vakatau vei iko nomu vakamacalataka. Rawa ni o tekivu ena nomu vakamacalataka na ituvaki e sotavi tiko, na kena itinitini, mo qai lesu ena nomu vakamacalataka se a tekivu vakacava.) Na ikava ni kena icakacaka e okati kina na tukuni ni ka e veibasai. (Rawa mo veidutaitaka na ka e donu mai na ka e cala, se ka vinaka mai na ka ca.) E so na kena iwalewale oqo e rawa nira vakayagataki vata ena dua ga na vunau se vosa.

Ni beitaki vakailasu o Sitiveni ena matadra na Sanadrini, a qai biuta e dua na ivakamacala momona sara ena nona tuvana veitaravi na ka a yaco. Ni o wilika na Cakacaka 7:2-53, o na raica kina ni digitaka vinaka sara ga o koya na ka me tukuna. A vakamacalataka e liu na itukutuku makawa e sega ni dua e lecava. Sa qai kaya ni dina era cati Josefa na tacina, a vakayagataki koya ga na Kalou me vu ni bula. Tarava nona vakamacalataka nodra talaidredre na Jiu vei Mosese, na digitaki ni Kalou. Sa qai tinia ena nona tukuna ni yalo vata sara ga a tu vei ira na tukadra oqori era vakaraitaka na Jiu era vakamatei Jisu Karisito.

Me Kua ni Sivia na Ka O Vakabibitaka. Ni o sereka na ulutaga e soli vei iko—se mani ulutaga vakacava—e vica wale ga na ka e ganita mo vakabibitaka. E rawa ni lima na ka o vakabibitaka ke mani levu sara. E okati e ke na vosa e 5 na miniti na kena balavu, 10 na miniti, 30 na miniti, se mani sivia. Ke rui levu na ka o vakabibitaka, ena sega ni yaga ni na sega ni kasa kece vei ira na vakarorogo. Mo nanuma tale ga ni balavu ga ni vunau, na kena gadrevi tale ga me matata vinaka sara na kena veitikina bibi.

E vakatau vei iko na levu ni tikina o vakabibitaka, ia e dodonu mo sereki ira vinaka. Solia na gauna vei ira na vakarorogo mera vakasamataka kina na veitikina bibi yadua, me rawa kina ni kasa ena nodra vakasama.

Se mani balavu vakacava na gauna e soli mo vosa kina, e dodonu ga mo saga me rawarawa nomu ivakamacala. Ia, ena vakatau oqo ena wasewasei vinaka ni veitikina bibi yadua kei na kena ivakamacala, me qai sereki yadua ni vakacagau tiko na vunau. Na vunau vaka oqo ena rawarawa na muria, dredre na guilecava.

Me Matata na Tikina O Vakabibitaka. Ke o sa tuva vinaka na lewe ni nomu ivakamacala, ena sega ni dredre na kilai ni tikina o vakabibitaka ena gauna o vosa kina.

Dua na sala levu ena vakamatatataki kina e dua na tikina bibi oya ena nomu kauta cake mai e so na tikina me tokona, so na tikinivolatabu, kei na ile tale e so me vakavotuya mai na tikina bibi oqo. Na veitikina lalai tale e so e dodonu me vakamakaretaka, vakadinadinataka, se vakamatatataka na tikina bibi. Kua ni kuria tale e so na itukutuku e sega ni ganita na ka o vosa kina, veitalia ke ra itukutuku rogo vinaka. Ni o vakamacala, me matata tiko ga na veisemati ni ka o tukuna kei na tikina mai na nomu vunau o vakabibitaka tiko. Kua ni laiva mera qai lai saga tiko na vakarorogo mera semasema na nomu ivakamacala. Dodonu mo sa semasema rawa yani o iko, o na vakayacora oqo ena nomu tokaruataka na vosa bibi e so mai na tikina o via vakabibitaka, se nomu cavuta sara tiko ga na vakasama bibi e so e kovuta.

E so na dauvunau era dau nabataka sara ga na tikina era via vakabibitaka. Oqo e dua na sala e rawa ni vakamatatataki kina na tikina bibi, ia ena mana ga na iwalewale oqo ke veitaravi vinaka na kedra ituvatuva, ra qai veisemati vinaka na vakasama.

De dua o na via tukuna rawa na tikina o via vakabibitaka ni bera ni o sereka. Oqo ena vakavuna mera nanamaki na vakarorogo ina nomu ivakamacala, ena vakavotuya tale ga mai na tikina bibi oqori. De dua ena qai matata sara na tikina bibi oqori ke o lesuva tale ni o sa sereka oti.

Ena Cakacaka Vakavunau. Na veika e veivosakitaki mai cake e sega ni yaga wale ga ena vunau mai na buturara, e yaga tale ga ena cakacaka vakavunau. Ni o vakavakarau, vakasamataka na ka era na leqataka tiko vakalevu ena nomu yalava. Digia e dua na ulutaga o na rawa ni vakayagataka kina na iVolatabu ena kena wali na leqa oqori. Rawa ni o digia e rua ga na tikina bibi me vakamatatataki kina na ulutaga oqori. Digia rawa na tikinivolatabu mo na vakayagataka me tokona. Oti mo qai vakasamataka se o na tekivuna vakacava na veivosaki. Na vakavakarau vaka oqo ena vakarawarawataka nomu veivosaki. O na tukuna rawa tale ga kina na ka ena kasa vei koya na itaukeinivale.