Ka Mo Okata ena Nomu iVakamacala

E KAYA na iVolatabu ni ivavakoso vakarisito e vaka na yago. E bibi na veitikiniyago kece, ia e “duidui na nodra i tavi.” O koya gona, e dodonu meda raica vakabibi na itavi cava ga e lesi vei keda. Kena ibalebale eda na ciqoma, da vakarautaka vinaka tale ga na noda itavi ni veivakavulici kece, meda kua ni raica vakamamada e so na ulutaga nida nanuma ni vinaka cake e so tale. (Roma 12:4-8, VV) E itavi ni dauveiqaravi yalodina ka vuku me vakarautaka na kakana vakayalo “e na kena gauna dodonu.” (Maciu 24:45, VV) Eda vakaraitaka nida doka na ituvatuva oqo kevaka eda vakayagataka noda taledi nida vakarautaka noda ivakamacala, da qai muria na idusidusi e soli vei keda. O keda kece meda cakava oqo me rawa ni cici vinaka tiko ga kina na ivavakoso.

Ka me Okati ena Nomu iVakamacala. Ni lesi vei iko e dua na ulutaga ena koronivuli, sereka ga na ulutaga oqori, kua ni lai vakamacalataka e so tani tale na ka. Levu na gauna sa na vakarautaki rawa na vanua mo kauta mai kina nomu ivakamacala. Ke sega ni vakarautaki, kena ibalebale ni soli vei iko mo qai vakasaqara ga. Ia, ni o vakarautaka nomu itavi, nanuma tiko ni nomu ivakamacala taucoko e dodonu me sota vinaka kei na ulutaga e lesi vei iko. E bibi tale ga mo na nanumi ira tiko na vakarorogo ni o vakalewa se cava mo na okata ena nomu ivakamacala.

Vulica vinaka na lewe ni ivakamacala sa lesi mai, vakasamataka na veitikinivolatabu era volai kina. Qai vakasamataka se o na vakayagataka vakacava me yaga vei ira na vakarorogo. Digia e rua se tolu na tikina mo na vakabibitaka mai na lewe ni ivakamacala e lesi vei iko. Digia tale ga mai kina na tikinivolatabu mo na wilika, mo vakamacalataka tale ga.

Me vakacava na levu ni ka o vakamacalataka? Me rauta ga na kena o rawa ni sereka vinaka. E bibi ga mo veivakavulici, e sega na betena ke levu na ka o vakatukuna qai sega na ka e vulici kina. Ke so na ivakamacala ena sega ni salavata vinaka kei na ka o na via vakabibitaka, kauta laivi. Vakayagataka ga na veitikina o na rawata kina nomu inaki. Digitaka ga mai na vanua e lesi vei iko na veika ena vakaibalebale, ena yaga vei ira na vakarorogo. Na lesoni oqo e sega ni kena inaki me vakauqeti iko mo raica na levu ni ka o rawa ni okata ena loma ni nomu gauna yalataki, me vukei iko ga mo digia na itukutuku o rawa ni vakayagataka mai na ivakamacala ga e lesi vei iko.

E sega tale ga ni kena inaki mo mai vakadewataka ga na ka e sa volai oti tu. Saga mo vakamacalataka e so na tikina bibi, sereka, bulia e so na kena vosa vakatautauvata, rawa ni o vakaraitaka sara e so na kena ivakavakayagataki. Na ivakamacala tale e so o kauta mai e dodonu mera vakamatatataka na veitikina bibi, me kua ni sosomitaka.

Toso na gauna, o ira na tacida era sa vakadinadinataka nira qasenivuli maqosa e sa rawa nira veivakavulici ena Soqoni ni Cakacaka. Sa ra kila o ira ni bibi mera vakayagataka ga vakavinaka na ivakamacala e vakarautaki mai, mera kua ni okata tale e so na ivakamacala tani. O ira tale ga na sa dau vakaitavi ena vunau soqovi levu e dau soli vei ira na suinivunau mera vakayagataka. Na suinivunau oqo e solia vei ira na galala mera vakamacalataka e so tale na ka, ia e vakamatatataka vei ira na veitikina mera vakabibitaka, na ile mera vakayagataka me tokona na veitikina bibi oya, kei na kedra veitikinivolatabu. E tiki bibi ni nona vakatovolei e dua e rawa ni soli vua na itavi ni veivakavulici na kena raici ni dau vakayagataka ga na ivakamacala e lesi vua.

Ena yaga tale ga na ka o vulica ena lesoni oqo ena nomu vuli iVolatabu. O na vulica mo dau dei ga ena ka e vulici, mo kua ni lai kauta mai e so na ivakamacala e sega ni tiko ena ulutaga e vulici, era tikina vinaka beka ia era sega ni na vakamatatataka na ka e vulici tiko. Ena yasana adua, e macala ni tiko ga na gauna ena gadreva kina e so na ikuri ni ivakamacala na nomu vuli iVolatabu. E sega ni vakacalai oqori ena lesoni oqo.