iTinitini e Veivakauqeti

O SA vakekeli vinaka sara beka ga, o sa tuvana vinaka tale ga na veitaravi ni lewe ni nomu vunau. O sa vakarautaka tale beka ga e dua na ikaunivosa e vakavure vakasama. Ia, se vo e dua na ka—me dua na itinitini e veivakauqeti. Kua ni nanuma ni sega so ni bibi. Baleta ni dau guiguilecavi dredre duadua na iotioti ni ka eda tukuna. E rawa ni sega ni yaga taucoko sara ga na nomu ivakamacala ke sega ni laulau na itinitini ni nomu vosa.

Vakasamataka mada: Dua na vosa ni vakadre momona a tauca o Josua vei ira na qase e Isireli ni sa voleka ni mate. E qai tinia vakacava nona vosa ni vakamacalataka oti na veika e dau cakava vei ira o Jiova me tekivu sara mai na gauna i Eparama? A sega ni taleva tale na veitikina bibi mai na nona ivakamacala. A vakamasuti ira ga na Isireli ena nona kaya: “Mo ni rerevaki Jiova, ka qaravi koya e na yalododonu ka vakaidina.” Wilika mo vakadinadinataka na itinitini ni nona vosa oqo ena Josua 24:14, 15.

Dua tale ga na vosa vinaka a tauca na yapositolo o Pita vei ira e so mai Jerusalemi ena Penitiko ni 33 S.K., e volai ena Cakacaka 2:14-36. E tekivuna nona ivakamacala ena nona kaya nira sa raica sara tu ga e matadra na ka a parofisaitaka o Joeli me baleta na sovaraki mai ni yalo ni Kalou. Tarava nona vakamacalataka ni salavata oqo kei na parofisai me baleta na Mesaia ena Same, e tukuni kina na vakaturi i Jisu Karisito kei na nona vakacerecerei ina liga imatau ni Kalou. Sa qai tinia o Pita ena nona vakaraitaka e dua na ka e dodonu me matata vei ira kece na tu e kea. E kaya: “O koya oqo, me kila sara kina na mataqali taucoko nei Isireli, ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.” Era qai taroga na tu e kea: “Oi kemudou na veiwekani, a cava me keimami kitaka?” Qai sauma o Pita: “Dou veivutuni, ka papitaisotaki, koi kemudou yadua, e na yaca i Jisu Karisito.” (Caka. 2:37, 38) E tarai ira sara ga na rauta na le 3,000 era vakarorogo tiko na ka era rogoca, ra ciqoma sara na ka dina me baleti Jisu Karisito.

Me Nanumi Tiko. Na ka o tukuna ena itinitini ni nomu vosa e dodonu me lakolakovata sara ga kei na nomu ulutaga. Me veimuri vinaka tale ga kei na nomu ivakamacala. E vakatau vei iko ke o na via vakayagataka e so na vosa mai na nomu ulutaga, se cavuta sara ga na ulutaga.

Na vosa kece e kena inaki me vakauqeti ira na vakarorogo mera cakava e dua na ka. Ia, e dua vei ira na inaki ni itinitini ni vosa me vakaraitaka vei ira na ka mera cakava. Ni o digitaka na ulutaga ni nomu vosa kei na kena veitikina bibi, o a vakasamataka tale beka ga na vuna e bibi kina me rogoci nomu itukutuku, vaka kina na inaki ni nomu itukutuku? Ke vaka kina, o sa kila rawa na ka o vinakata mera cakava. Kena gauna oqo mo vakamacalataka kina na ka mera cakava, kei na kena icakacaka.

Ni o sa vakaraitaka vei ira na vakarogoci iko na ka mera cakava, na nomu itinitini ni vosa me qai vakauqeti ira mera cakava sara. Me vakaraitaki tale ga ena itinitini ni vosa na vuna me caka kina kei na kena yaga. Ena vakataucokotaka sara na nomu vosa taucoko na iotioti ni vosa o cavuta ke o vakasamataka vinaka, o bulia vinaka tale ga.

Nanuma tiko ni sa vakarau cava na nomu vosa. Oqo e dodonu me vakilai ena ka o tukuna. Me veiganiti tale ga na totolo ni nomu vosa. Ia, me kua ni tasoro tu ga na nomu vosa me qai tini vakasauri. Ena yasana adua, me kua ni matemate na domomu. Me rogo levu vinaka, ia me kua ni kaukaua sivia tale. E dodonu me kilai ena irogorogo ni domomu ni sa vakarau cava nomu vosa. Me vakilai ena kena itautau ni o vakabauta dina na ka o tukuna, e tara na lomamu. Ni o vakarautaka na nomu itavi, kua ni guilecava mo vakarautaka tale ga na itinitini ni nomu vosa.

Me vakacava na balavu ni nomu itinitini ni vosa? E sega ni dua na kena gauna tudei. Me kua ga ni yaraki. Ke ra kidacala na vakarorogo sa oti tale nomu vosa, e vakaraitaka oya ni rui lekaleka nomu itinitini ni vosa. Ke ra nanuma ni sa dodonu me oti ia o se vosa tiko ga, e vakaraitaka oya ni sa rui balavu. E vinaka taudua na itinitini ni vosa e lekaleka ga, rawarawa, qai matata. E rawa ni totoka tale ga na itinitini ni vosa e balavu vakalailai ni okati kina e dua na vosa vakatautauvata, ia e vakatau oqo ena kena vakarautaki vinaka. Vakatauvatana mada na itinitini lekaleka ni ivola taucoko na Dauvunau e volai ena Dauvunau 12:13, 14, kei na itinitini e via balavu ni Vunau mai na Ulunivanua, e volai ena Maciu 7:24-27.

Ena Cakacaka Vakavunau. E duatani duadua na cakacaka vakavunau ni o na tinia e vica vata na vosa ena dua tiko ga na gauna lekaleka. Ni o vakavakarau vinaka, salavata kei na nomu veikauaitaki, e rawa ni vuavuaivinaka sara nomu cakacaka. Ia, na ivakasala e sa cauraki oti yani e yaga tale ga ena noda veivosaki kei ira na tamata yadua.

Ena lekaleka sara beka na veivosaki. De osooso tiko o itaukeinivale. E rawa ni dua beka ga kina na miniti na dede ni veivosaki. Ke veiganiti, e rawa ni o tukuna vaka oqo: “Au kila ni oni osooso. Ia, dua na tikina au via laiva toka vei kemuni. E vakaraitaka na iVolatabu ni dua na ka e nakita na Dauveibuli me cakava—me vukica na vuravura oqo me rawa ni bula tawamudu kina na tamata. E rawa nida bula ena Parataisi oya, ia e dodonu meda kila na ka e vinakata vei keda na Kalou.” Se rawa mo vakaraitaka ni o na marau mo na lesuvi koya mai ena dua na kena gauna vinaka.

Ke tini koso na veivosaki ni sega ni taleitaka o itaukeinivale se veibeci, kua ni yalolailai. Nanuma na ivakasala ena Maciu 10:12, 13 kei na Roma 12:17, 18. Nomu sauma ena yalomalua e rawa ni veisautaka nona rai baleti keda na iVakadinadina i Jiova. Ena daumaka sara ke o rawata oqo.

Ena yasana adua, e rawa ni toso vinaka nomu veivosaki kei na dua na itaukeinivale. Ena yaga mo taleva na tikina o via vakabibitaka vua. Vakauqeti koya tale ga me cakava sara kina e dua na ka.

Ke o raica ni rawa mo drau veivosaki ena dua tale na gauna, tukuna vua ena kena itukutukuni me namaka kina na gauna oqori. Taroga e dua na taro—mo na qai sauma vua mai na ivola na Reasoning From the Scriptures se dua na ivola e dau vulici kina na iVolatabu. Nanuma tiko na nomu inaki, me vaka a tukuna o Jisu ena Maciu 28:19, 20.

Vakacava ke o tinia tiko e dua na iwasewase ni vuli iVolatabu? Ena nanuma vinaka nomu gonevuli na ka o vakabibitaka ke o taura na gauna mo lesuva kina na ulutaga drau se qai vulica oti, kei na nomu tarogi koya lesu ena so na ka drau a veivosakitaka. E rawa ni vakaibalebale na ka e vulica ke o taroga se na yaga vakacava vua, kei na sala cava e rawa ni wasea kina.—Vkai. 4:7.

Nanuma tiko—ena qai yaga ga na ivakamacala vinaka o vakarautaka ke veivakauqeti na itinitini ni nomu vosa.