Vosa Vakatautauvata e Yavutaki ena Ka e Kilai

SE VOSA vakatautauvata cava ga o vakayagataka, e bibi me ganita na ulutaga o vosa kina. Ia, me qai yaga sara, e dodonu me ganiti ira na vakarorogo.

Na cava e so na ka mo nanuma me baleta na vosa vakatautauvata ni o digitaka tiko na ka ena ganita vakavinaka e dua na ilawalawa? Na cava a cakava o Jisu Karisito? E sega vakadua ni vakayagataka o Jisu na veika e dau yaco ena taudaku kei Isireli me yavutaka mai kina nona vosa vakatautauvata vei ira na lewevuqa se vei iratou nona tisaipeli. Baleta ni na sega ni matata na kena ibalebale. Me kena ivakaraitaki, a sega ni cavuta na nodra ivakarau ni bula na tui kei Ijipita, se na ivakarau ni qaravi kalou mai Idia. E vakayagataka ga ena nona vosa vakatautauvata na ka e kilai ena veivanua kece. E cavuta na veika me vaka na cula isulu, veivoli, yali ni dua na iyau talei, kei na soqo ni vakamau. E kila o koya na ka eda na cakava ena dui ituvaki, oqo sara ga na ka e vakayagataka. (Mari. 2:21; Luke 14:7-11; 15:8, 9; 19:15-23) A vunau vakatabakidua sara tiko ga o Jisu vei ira na Isireli, o koya gona, e vakayagataka vakalevu ena nona vosa vakatautauvata na iyaya kei na veika e tiki ni nodra bula e veisiga na Isireli. A dau cavuta gona na veika me vaka na teitei, talairawarawa ni sipi vei ira na kedra ivakatawa, kei na vakayagataki ni kuli ni manumanu me maroroi kina na waini. (Mari. 2:22; 4:2-9; Joni 10:1-5) E dau vakayagataka tale ga na itukutuku kilai levu e so me vaka na nodrau buli na imatai ni veiwatini, na Waluvu ena siga i Noa, nodrau rusa o Sotoma kei Komora, kei na mate nei wati Loti. (Maciu 10:15; 19:4-6; 24:37-39; Luke 17:32) Vakacava o iko, o dau vakasamataka na ka era cakava na vakaitikotiko ena nomu vanua kei na nodra ivalavala ni bera ni o digia na vosa vakatautauvata ena ganiti ira?

Ia, vakacava ke o vosa tiko ga vua e dua, se na le vica ga? Digia e dua na vosa vakatautauvata ena ganita sara ga vakatabakidua na ilawalawa lailai oqori. Ni vunau o Jisu vua na yalewa ni Samaria ena tobu mai Saika, a cavuta na “wai bula,” ‘sega ni via gunu tale,’ kei na ‘wai e tovure yani ina bula tawa mudu’—na vosa kece oqo era baleta sara tiko ga na nona cakacaka na yalewa oya. (Joni 4:7-15, VV) Ni vosa vei ira na tagane era vuya tiko na nodra lawa, a digitaka na vosa vakatautauvata me baleta na cakacaka vagonedau. (Luke 5:2-11) A rawa ni vakayagataka na vosa vakatautauvata me baleta na iteitei ena rua na ituvaki oqo, baleta nira bula o ira oqo ena vanua ni teitei. Ia e vakayagataka ga na ka era dau cakava e veisiga baleta nira na kauaitaka cake vakalevu. Vakacava, o dau saga tale ga mo vakayacora oya?

A vunau voli o Jisu vei ira “na sipi ni mataqali i Isireli era yali tu,” ena yasana adua, o Paula e sega ni talai ga vei ira na Isireli, vei ira tale ga na veimatanitu. (Maciu 15:24; Caka. 9:15) E veisau beka kina na ivakarau ni vosa i Paula? Io. Ni volavola vei ira na lotu Vakarisito mai Korinica, a tukuna na veitaucici, na laukana ni kakana e cabori vei ira na matakau, kei na taqa ni qaqa, na veika era kila vinaka na veimatanitu tani.—1 Kor. 8:1-10; 9:24, 25; 2 Kor. 2:14-16, NW.

Vakacava, o ucui Jisu kei Paula ena nomu digia vinaka na vosa vakatautauvata o vakayagataka ena nomu veivakavulici? O dau kauaitaka na kedra ituvaki na rogoci iko, na ka era dau cakava e veisiga? E macala ni sa veisau vakalevu sara o vuravura ni vakatauvatani kei na imatai ni senitiuri. Levu era sa sarava sara tu ga ena retioyaloyalo na ka e yaco tu ena veiyasa i vuravura. Sa ra sega kina ni qai vulagi ena ka e yaco tu mai vanua tani. Ke dina oqo ena vanua eda tiko kina, e sega ni leqa ke da vakayagataka e so na ka e yaco tu mai vanua tani ena noda vosa vakatautauvata. Ia, ena tarai ira vakalevu duadua na vakarorogo na ka e baleta na nodra bula ena veisiga—me vaka na nodra itikotiko, nodra vuvale, nodra cakacaka, kakana era kania, kei na draki ena vanua era tiko kina.

Ke lai balavu tale nomu vakamacalataka nomu vosa vakatautauvata, e rawa ni vakaraitaka oqo ni o tukuna tiko e dua na ka era sega ni kila vinaka na vakarorogo. Na vosa vakatautauvata vaka oqo e rawa ni lai ubia tale na ka o via vakabibitaka. Era nanuma beka na vakarorogo na nomu vosa vakatautauvata, ia era guilecava na ka dina mai na iVolatabu o a vinakata tiko mo tukuna.

E sega ni dau vakayagataka o Jisu na vosa vakatautauvata vereverea, e dau tukuna ga na veika rawarawa, na ka e dau sotavi sara ga e veisiga. E vakayagataka na veika lalai me vakamatatataka na veika lelevu, na veika rawarawa me vakamatatataka na veika dredre. Ena nona vakayagataka na veika e dau caka ga e veisiga me ivakavuvuli, sa vukei ira kina na lewenivanua o Jisu mera kila vinaka ra qai nanuma matua na veika dina vakayalo e dau vakavulica. Sa ivakaraitaki vinaka dina meda muria!