Vakayagataki Vinaka ni ka e Raici

NA CAVA mo vakayagataka kina na veika e raici ena nomu veivakavulici? Baleta ni na laulau cake kina nomu veivakavulici. Rau dau vakayagataka na Kalou o Jiova kei Jisu Karisito na veika e raici ena nodrau veivakavulici, e rawa nida vuli vei rau. Ena kasa na noda itukutuku nida vakaraitaka e so na ka e raici me lako vata kei na ka eda tukuna, era na vakatudaliga matua tale ga na vakarorogo. O na vakayagataka vakacava e so na ka e raici ena nomu tukuna na itukutuku vinaka? O na vakadeitaka vakacava ni o sa vakayagataka tiko vakavinaka?

Nodrau Vakayagataka na Ka e Raici na Qasenivuli Uasivi. E dau vakayagataka o Jiova na ivakaraitaki guiguilecavi dredre me kasa kina vei ira nona tamata e so na ivakavuvuli bibi. Dua na bogi a kauti Eparama i tautuba qai kaya: “Mo raici lomalagi mada, ka wilika na kalokalo kevaka ko sa wilika rawa. . . . Sa na vakakina na nomu kawa.” (Vkte. 15:5) E dredre beka mai na rai ni tamata na ka e yalataki oqo, ia e tarai Eparama na vosa i Jiova, oya na vuna e dei tu ga kina nona vakabauta. Dua tale na gauna a talai Jeremaia o Jiova me lako ina nona vale na dautuli bilo, me lai sarava kina nona bulia tiko na qele o koya na dautulituli. Oqo e dua na lesoni bibi e vakaraitaka na nona lewai keda o koya na Dauveibuli. (Jere. 18:1-6) Me qai guilecava vakacava o Jona na lesoni me baleta na yalololoma e vakavulica vua o Jiova ena nona vakayagataka na vunibele. (Jona 4:6-11) A tukuna sara mada ga o Jiova vei ira nona parofita mera vakayagataka e so na ka e tu vei ira mera dramataka kina nodra parofisai. (1 Tui 11:29-32; Jere. 27:1-8; Isik. 4:1-17) Na valeniveitavaki kei na valenisoro erau vakayagataki me rau ivakatakarakara, me matata kina vei keda na veika dina mai lomalagi. (Iper. 9:9, 23, 24) Levu tale ga na raivotu a vakayagataka na Kalou me vakadewa kina e so na itukutuku bibi sara.—Isik. 1:4-28; 8:2-18; Caka. 10:9-16; 16:9, 10; Vkta. 1:1.

E vakayagataka vakacava o Jisu na veika e raici me veivakavulici kina? Nira saga na Farisi kei na ilawalawa i Eroti mera vakacalai koya ena vosa, e qai kerea me soli vua e dua na pene, dusia sara na iyaloyalo kei Sisa e droinitaki tu kina. Sa qai kaya ni dodonu me soli vei Sisa na ka e nei Sisa, me soli vua na Kalou na ka e nona na Kalou. (Maciu 22:19-21) Ena nona via vakaraitaka ni dodonu meda doka na Kalou ena ka eda taukena, a dusia o Jisu e dua na yada dravudravua ena valenisoro a solia e rua na ilavo lalai me nona cau—na ilavo sara ga me bula kina. (Luke 21:1-4) Dua tale na gauna a vakayagataka e dua na gonelailai me ivakaraitaki ni yalomalumalumu kei na sega ni via rogo. (Maciu 18:2-6) A vakaraitaka tale ga o koya na yalomalumalumu dina ena nona vuya na yavadratou na nona tisaipeli.—Joni 13:14.

Vakayagataki ni Ka e Raici. Eda sega ni vakataki Jiova, ni o koya ga e rawa ni vakayagataka na raivotu. Ia, e levu sara na iyaloyalo vakavure vakasama e dau tabaki ena noda ivola. Vakayagataka mo vukei ira kina na tataleitaki mera raivakatayaloyalotaka na Parataisi e yalataka na Kalou me na yaco e vuravura. Ni o veivakavulici ena iVolatabu, e rawa mo vakamuai nomu gonevuli ina dua na itaba e lako vata sara ga kei na ka drau vulica tiko, qai tarogi koya me tukuna se cava e raica. Oqo sara ga na ka a cakava o Jiova ena gauna e vakaraitaka oti kina vua na parofita o Emosi e so na raivotu. E tarogi Emosi: “A cava ko sa raica, Emosi?” (Emosi 7:7, 8; 8:1, 2) Rawa ni o taroga tale ga na taro vaka oqo ni o veidusimaki tiko ina so na iyaloyalo e vakarautaki mai me vakataucokotaka na veivakavulici.

Ke o vola e so na fika me na cakacakataki se vola veitaravi na gauna kei na ka e dui yaco kina, oqo ena vakarawarawataka na kilai ni parofisai e so me vaka na “vitu na gauna” ena Taniela 4:16 kei na “vitusagavulu na wiki” ena Taniela 9:24. E levu na ka vaka oqo era sa volai oti tu ena noda ivola ni veivakavulici.

Ena nomudou vuli iVolatabu vakavuvale, ena rawarawa sara nomudou veivosakitaka na veika me vaka na valeniveitavaki, valenisoro mai Jerusalemi, kei na valenisoro a raivotutaka o Isikeli ke dou raica sara ga na kedra droini. Era na laurai na droini vaka oqo ena Insight on the Scriptures, na appendix se ivakamacala e muri ni New World Translation of the Holy Scriptures—With References, kei na so na itabataba ni Vale ni Vakatawa.

Ni dou wili iVolatabu vakavuvale, dou dau vakayagataka tale ga na mape. Dou vakamuria ena mape na sala e muria o Eparama mai Uri i Karana me lako sobu sara i Peceli. Dikeva tale ga na vanua era muria na Isireli nira biuti Ijipita mera lako ina Vanua Yalataki. Raica ena mape na vanua e wasei me nodra na dui yavusa kei Isireli. Raica na veivanua a lewa o Solomoni. Raica tale ga na sala e muria o Ilaija ni dro mai Jeserieli me yaco sara ina veitokaitua ena saula kei Pierisepa, ni via vakamatei koya o Jesepeli. (1 Tui 18:46–19:4) Raica na veikoro lelevu kei na koro lalai a dau vunau kina o Jisu. Dikeva tale ga na vanua a dau sikova o Paula e vakamacalataki ena ivola na Cakacaka.

E yaga tale ga noda vakayagataka na veika e raici nida vakamacalataka tiko vei ira na vuli iVolatabu na veika e baleta na ivavakoso. O na via vakaraitaka beka vei koya na gonevuli e dua na porokaramu ni soqo ni tabacakacaka se soqo ni tikina mo vakamacalataka kina na veika e dau cauraki kina. Levu era qoroqoro nira lai sarava na Kingdom Hall se valenivolavola ni iVakadinadina i Jiova. Nodra sarava sara ga na veika oqo e rawa ni kauta laivi na nodra rai cala me baleta na noda cakacaka kei na kena inaki. Ni o vakasarasarataka tiko e dua ena Kingdom Hall, vakaraitaka na kena duidui mai na vanua ni sokalou tale e so. Vakabibitaka ni vakarautaki sara ga vakatabakidua me vanua ni veivakavulici. Dusia na veika e so e vakarautaki sara ga me baleta noda cakacaka vakaitalatala—vanua e dau soli kina na ivola, mape ni vunau, kei na kato ni cau (sega ni vaka na veleti ni soli ena veilotu tale e so).

Rawa ni o vakayagataka tale ga na tepi ni vidio e vakarautaka na iLawalawa Dauvakatulewa me vukei ira na gonevuli mera nuitaka na iVolatabu, mera kila kina na noda cakacaka na iVakadinadina i Jiova, me uqeti ira tale ga mera bulataka na ivakavuvuli ena iVolatabu.

Vakayagataki ni Veika e Raici ena iVavakoso. E rawa ni tarai ira sara ga na vakarogoci iko na nomu ivakamacala ke o kuria ena nomu vakaraitaka vei ira e dua na ka o sa vakarautaka yani vakavinaka. E so na ka o rawa ni vakaraitaka vei ira e sa vakarautaka rawa mai na dauveiqaravi yalodina.

Na ulutaga vulici ena Vale ni Vakatawa e sa dau vakarautaki rawa yani kina e so na iyaloyalo e rawa ni vakayagataka o koya e veituberi me vakavotuya mai kina na veika e dodonu me vakabibitaki. Era vaka tale ga oqo na ivola e dau vakayagataki ena Vulivola ni iVavakoso.

E so na vunau soqovi levu ena laulau sara ke vakayagataki kina e so na ka e raici. Ia, e sega ga ni dua e uasivia na noda vakamuai ira na vakarorogo ina ka ena tiko sara beka ga e ligadra—na iVolatabu. Ke mani ganita ena so na gauna mo vakaraitaka mai e dua na iyaloyalo, se mo vola ena papaloaloa e vica na tikina o via vakabibitaka, mo raica mada e liu nira sa raica kece (se wilika rawa kece) na vakarorogo era dabe sara tiko mai muri. Ia, me kua ga ni vakayagataki tale vakasivia na kena iwalewale oqo.

Nida vakayagataka ena noda vunau se veivakavulici e so na ka e raici, e sega ni noda inaki meda veivakalasai. Noda vakaraitaka yani e so na ka e rakorako ena vakadeitaka tale na tikina e dodonu me vakabibitaki. Ena yaga sara na veika eda vakaraitaka ke vakamatatataka na ka eda cavuta, rawarawa kina na kena kilai, kevaka tale ga e vakadeitaka tale e dua na ka eda tukuna. Nida vakayagataka vinaka, na veika eda vakaraitaka vei ira na vakarorogo mera raica, kei na tikina eda via vakabibitaka kina, ena rawa ni kasa tu vei ira ena dua na gauna balavu.

Erau tiki bibi ruarua ni vuli na noda rogoca na ka kei na noda raica sara ga. Nanuma tiko na nodrau vakayagataka na rua na ka oqo o Jiova kei Jisu, o rau na qasenivuli uasivi. Saga sara mo vakatotomuri rau ena nomu veivakavulici.