Dau Veidokai

E UQETI keda na iVolatabu meda “doka na tamata kecega,” meda “kakua ni vosavakacacataka e dua.” (1 Pita 2:17; Taito 3:2) O ira kece eda sotava “era a buli me ra veiucui kei na Kalou!” (Jeme. 3:9, VV) E mate tale ga o Karisito ena vukuda kece. (Joni 3:16) Na tamata kece tale ga e dodonu me rogoca na itukutuku vinaka, de dua ena moica nodra bula e so, ra vakabulai sara kina. (2 Pita 3:9) Ena yasana adua, e tiko e so e dodonu mera dokai vakalevu sara ena vuku ni nodra yabaki se nodra itutu.

Ia, e dau dredre vei ira e so mera dokai ira na tamata kece ga. Na cava na vuna? Na vanua beka era bula kina era dokai ga na tagane. O ira tale ga era dokai e vakatau ena nodra ivakatagedegede ni bula, roka ni yagodra, kedra ituvaki, nodra yabaki, iyau era taukena se nodra itutu. Na nodra veidabui tale ga e levu na iliuliu e vakavuna nodra sega ni dokai na veiliutaki. Ena so na vanua, e levu era sa vakacauoca ena nodra bula e veisiga, ra cakacaka ena siga kei na bogi mera bula rawa mada ga, ra qai maliwai ira na tamata era sega ni dau veidokai. Era coriti na itabagone ena vakailala mera vorati ira na qasenivuli se vorati ira na veiliutaki. Levu era vuli vakaca ena porokaramu ni retioyaloyalo e dau vakaraitaki kina nodra beci na itubutubu. Na veika vaka oqo e rawa ni veisautaka noda rai, meda sega ni dokai ira kina e so. Ia, ke da saga meda dokai ira na tamata kece ga, ena rawarawa sara noda vosa vei ira, ena rawarawa tale ga nodra talaucaki ira mai.

Veidokai ni O Torova e Dua. E namaki vei koya e vakaitavi ena cakacaka vakalotu me veidokai na nona isulusulu kei na nona ivukivuki. E duidui na vanua, duidui tale ga na ka e okati ena dui vanua me veidokai. So na vanua e ka beci ke o torova e dua o qai vakaisala tu ga se o tara taga. E so tale na vanua e sega sara ga ni dua na ka ke o cakava oqo. Vakasamataka gona na vanua o bula kina kei na kena itovo. Ni o cakava oqo, ena sega ni yaco e dua na ka me vakaleqa nomu vunautaka na itukutuku vinaka.

E bibi tale ga na nomu ivosavosa, vakauasivi ke o vosa vei ira na qase cake. E dau sega soti ni matau mera kacivi ira na qase na itabagone ena imatai ni yacadra, vaka vo ke vinakata o koya e kacivi. So na vanua e namaki tale ga vei ira na qase mera kua ni kacivi ira na vulagi ena imatai ni yacadra. E levu tale ga na vosa e vuravura era vakayagataka na vosa e dau cavuti ga vei ira na lewe levu me vaka na “kemuni,” mera cavuta vua e le dua me vakaraitaka na veidokai vei ira na qase cake se vei ira na veiliutaki.

Na Veidokai e Okati Kina Nomu Veikauaitaki. E kena ivakarau ena so na vanua mera kauaitaki o ira eda sotava e salatu se o ira era tiko ena dua na lomanivale nida curu yani. E vakaraitaki oqo ena vakabula, matadredredre, se deguvacu mada ga. E itovo veibeci ke o sega ni kauaitaki koya o sotava.

E so era na kaya ni o sega ni kauaitaki ira veitalia mada ga ke o sa vakabula, deguvacu, se matadredredre. Ena vuku ni cava? Baleta nira nanuma ni o sega ni kauaitaki ira dina, e sega na betedra, ra qai tawayaga. Kena ivakaraitaki, era kilai levu beka e so ena itikotiko nira lokiloki, se bulicaki vakatani na yagodra. Era sega ni dau kauaitaki o ira oqo, ra sega ni galeleti. Ia, na Vosa ni Kalou e vakaraitaka vei keda na sala meda lomani ira, da dokai ira kina na vaka oqo. (Maciu 8:2, 3) E sega ni dua vei keda e galala mai na ivalavala ca i Atama. O na vakila beka ni o dokai ke dau tukuni ga vakalevu na ka o malumalumu kina, mate e tauvi iko, se kemu ibulibuli ke o lokiloki? Se na vinaka cake vei iko mo kilai cake ena veika o vinaka kina, nomu itovo vinaka, se kemu totoka?

Na veidokai e okati tale ga kina nodra kauaitaki na ulunivale. Ena so na vanua e vuravura, e kena ivalavala meda veivosaki e liu kei koya na ulunivale, qai muri noda veivosaki kei ira na vo ni lewenivale. E dina ni lesi keda o Jiova meda vunau, meda veivakavulici, ia eda kila tale ga ni Kalou e lesi rau na tubutubu me rau tuberi ira, vakadodonutaki ira, me rau dusimaki ira tale ga na gone ena loma ni vuvale. (Efeso 6:1-4) Nida siko gona yani ena dua na vale, e vinaka meda vosa mada e liu vei rau na itubutubu ni bera nida qai lai veivosaki tiko kei ira na gone.

E bibi tale ga mera dokai na qase ni levu na ka era sa kila. (Jope 32:6, 7) E sega ni lecava oqo e dua na goneyalewa painia mai Sri Lanka ni sikova e dua na kena turaga. A cudruvi koya na kena turaga oqo ena nona kaya: “O se qai sucu ga e nanoa o sa mai via vakavulici au ena iVolatabu!” Ia, e sauma na goneyalewa: “Au sega ni lako mai meu mai vakavulici kemuni, e dua ga na ka au vulica e vakamarautaki au dina, e lomaqu kina meu mai wasea vei kemuni.” E tarai koya sara ga na kena turaga na nona veidokai na painia. “Na cava o vulica, tukuna mada vei au,” a kerea na turaga oqo. E sauma o goneyalewa, “Au sa vulica na ka meda cakava, meda rawata kina na bula tawamudu.” Tekivu vuli iVolatabu sara ga kei ira na iVakadinadina i Jiova na kena turaga oqo. O keda kece eda vinakata meda dokai, o koya gona meda dau vakaraitaka oqo ena veigauna kece.

Ia, e so e dau sivia tale na nodra veidokai. Ena noda Pasifika kei na so tale na vanua, e tu ga na vosa ni vakarokoroko e dau vakayagataki nira torovi na turaga ena noda veikoro. Na vakayagataki ni vosa vaka oqo e dau vakarawarawataka noda ciqomi, ra rogoca kina noda ivakamacala na turaga kei ira na lewenivanua. Ia, e sega ni dodonu, e sega tale ga ni vinaka meda dau cavuta na vosa ni veicavilaki. (Vkai. 29:5) So na vosa ni vanua e tu ga na kena vosa ni vakarokoroko, ia na lotu Vakarisito ena sega ni sivia tale nona vakayagataka na vosa ni vakarokoroko vaka oqo.

Vosa ena Veidokai. E uqeti keda na iVolatabu meda vakamacalataka na vu ni noda inuinui ena “yalo malumalumu kei na vakarokoroko.” (1 Pita 3:16, VV) So na gauna e rawarawa sara nida dusia na cala ni nona ivakamacala e dua, ia meda qarauna meda kua ni cakava meda vakamaduataki koya kina. Ena vinaka cake meda rogoci koya ga vakamalua, de dua e rawa nida taroga na vuna e vaka kina oya nona nanuma, da qai kauaitaka tiko na vuna oqori nida vakamacala vua mai na iVolatabu.

Noda veidokai nida veivosaki kei na dua e dodonu meda vakaraitaka tale ga nida vosa mai na buturara. O koya e dokai ira na vakarorogo vua ena sega ni vakalewai ira vakaca se vaka me tukuna tiko vei ira ‘nira rui gogo, oya ga na vuna era sega ni cakava tiko kina na ka e dodonu mera cakava.’ Na mataqali vosa vaka oqo e veivakayalolailaitaki wale ga. Meda nanuma tiko ni o ira era rogoci keda era lomani Jiova, era via qaravi koya! Meda vakatotomuri Jisu gona ena noda nanumi ira era malumalumu tu beka vakayalo, o ira na sega so ni vuku, kei ira e sega ni totolo sara nodra muria e so na ivakasala vakaivolatabu.

Era na kila na vakarorogo ni dokai ira o koya e vosa tiko ke okati koya ena nona ivakamacala ni gadrevi tale ga vua me bulataka taucoko sara na ivakasala ena Vosa ni Kalou. E ka vukutaki kina vei koya e vosa ke kua ni cavuta vakawasoma na “iko” se “kemuni” ni vakamacalataka na ivakavakayagataki ni dua na tikinivolatabu. Kena ivakaraitaki na duidui ni rua na taro oqo, “O sa cakava tiko na ka kece o rawa ni cakava?” kei na kena oqo, “E bibi meda tarogi keda yadua: ‘Au sa cakava tiko na ka kece au rawa ni cakava?’” E tautauvata ga na ka e tarogi, ia na kena imatai e sega ni okati koya kina o koya e vosa. Na kena ikarua e sa okati koya kei ira na vakarorogo, mera dui liaci ira kei na nodra inaki.

Kua ni vakalasalasa vei ira na vakarorogo ni o vinakata wale ga mo vakadredrei ira. Oqo ena rawa ni tauri kina vakamamada na ivakasala mai na iVolatabu. E dina, e dodonu me ka marautaki vei keda noda qarava na Kalou. E so sara beka na tiki ni noda vosa ena vakavu dredre. Ia, era sega ni dokai na vakarorogo, e sega tale ga ni dokai na Kalou ke vukici me ka ni dredre na veika e bibi.

Me laurai mada ga ena noda torovi ira na wekada, noda itovo, kei na noda ivosavosa nida veidokai me vaka ga e vakavulici keda kina o Jiova.