Wase Tinikaciwa

Tukuna Tiko ga ena Doudou na Vosa ni Kalou

1. (a) Na itukutuku vinaka cava era kacivaka na tisaipeli i Jisu, ia na cava era cakava kina e so na Jiu? (b) Na taro cava soti e basika?

RAUTA ni 2,000 na yabaki sa oti, a lumuti kina na Luve ni Kalou, o Jisu Karisito, me na qai Tui kei vuravura taucoko. A vakamatei nira bukana na kena vere o ira na iliuliu ni lotu era kena meca, ia a qai vakaturi koya mai na mate o Jiova. Ena vuku gona ni mate i Jisu, sa na rawati kina na bula tawamudu. Ia nira sa kacivaka na itukutuku vinaka oya na tisaipeli i Jisu, era vakacacani sara. E so vei ira era bala i valeniveivesu, era warolaki ra qai vakaroti mera kua ni tukuni Jisu tiko. (Cakacaka 4:1-3, 17; 5:17, 18, 40) Na cava beka era na vakayacora? Vakacava o iko, ke o a bula ena gauna oya? O na vosa tiko ga yani ena doudou?

2. (a) Na itukutuku taleitaki cava e gadrevi me kacivaki ena noda gauna oqo? (b) O cei sa nodra itavi mera vunautaka na itukutuku vinaka?

² A vakatikori mai lomalagi ena 1914 o Jisu Karisito me Tui ni Matanitu ni Kalou, ‘me lewa ena kedra maliwa na kena meca.’ (Same 110:2) Oti, sa qai kolotaki sobu mai vuravura o Setani kei ira na nona timoni. (Vakatakila 12:1-5, 7-12) Sa tekivu e kea na iotioti ni veisiga ni ivakarau ca e tu nikua. Ni sa na cava na iotioti ni veisiga, sa na qai vurumemeataka na Kalou na ituvaki taucoko e lewa tu o Setani. (Taniela 2:44; Maciu 24:21) Sa na rawa vei ira na bula yani mera nuitaka na bula tawamudu ena vuravura ena qai yaco me parataisi. Ke o sa vakabauta na itukutuku vinaka oqo, tukuna sara yani. (Maciu 24:14) Ia, na cava mo na namaka tiko?

3. (a) Na cava o na sotava ni o vunautaka yani na itukutuku me baleta na Matanitu ni Kalou? (b) Na taro cava e bibi meda dui tarogi keda kina?

³ Ni o sa vunautaka na itukutuku vinaka ni Matanitu ni Kalou, o na raica ni so ga era na taleitaka, e levu era na sega ni kauai kina. (Maciu 24:37-39) E so era na vakalialiai iko se saqati iko. A kaya tale ga o Jisu ni o ira mada ga na wekamu era na tusaqati iko. (Luke 21:16-19) De dua, o na sotava na veitusaqati ena nomu vanua ni cakacaka se mai koronivuli. Era vakatabui tu vakamatanitu na iVakadinadina i Jiova ena so na yasa i vuravura. Vakaevei ke o sotava na ituvaki vaka oya, o na tukuna tiko ga ena doudou na Vosa ni Kalou, o qai “tu dei e na vakabauta”?​—1 Korinica 16:13.

Kua ni Nuitaka ga na Noda Kaukaua

4. (a) Ke da via qarava tiko ga na Kalou ena yalodina, na cava meda cakava? (b) Na cava e bibi kina meda dau tiko ena soqoni vakarisito?

⁴ Ke da via qaravi Jiova tiko ga ena yalodina, e bibi meda vakayagataka e veigauna na veika vakayalo e vakarautaka mai o koya ena vukuda. Dua vei ira oqori na soqoni vakaivavakoso. E uqeti keda na iVolatabu meda kua ni vakaweleweletaka na soqoni. (Iperiu 10:23-25, VV) O ira na iVakadinadina i Jiova era yalodina tu mai ena dua na gauna balavu, era dau saga mera sosoqoni e veigauna kei ira era sokalou vata. Eda vakarabailevutaka ena veisoqoni oqori na noda kila na iVolatabu. Ena qai toso cake ga kina na noda taleitaka na ka dina eda sa kila rawa tu, ena matata cake tale ga vei keda na kedra ivakavakayagataki ena noda bula. Eda vakila nida volekati ira cake na tacida eda sokalou vata, da qai vakaukauataki meda cakava tiko ga na loma ni Kalou. E veidusimaki na yalo i Jiova ena ivavakoso, qai dau tiko rawa ena keda maliwa o Jisu ena vuku ni yalo tabu oqori.​—Maciu 18:20; Vakatakila 3:6.

5. Na cava era dau cakava na iVakadinadina i Jiova me baleta na nodra soqoni ni tiko na vakatatabu vakamatanitu?

⁵ O dau saga mo soqoni e veigauna, o saga tale ga mo muria sara na ka e veivosakitaki kina? So na gauna nira vakatabui vakamatanitu na iVakadinadina i Jiova, e dau ganita mera sosoqoni vakaiwasewase lalai ga ena vale vakaitaukei. De na veiveisau na vanua ni soqoni kei na kena gauna, qai dredre ni lakovi e so nira dau caka vakabogilevu. Ia se mani dredre vakacava se rerevaki vakacava na kena lakovi, era dau tovolea ga vakaukaua na mataveitacini yalodina mera tiko ena soqoni kece.

6. Eda na vakaraitaka vakacava nida nuitaki Jiova dina, ia ena vukei keda vakacava oqori meda vosa tiko ga ena doudou?

⁶ Ke da vinakata me dei na noda dau nuitaki Jiova, e bibi meda masu wasoma vua mai vu ni lomada, nida kila tiko ni ganiti keda na veivuke ni Kalou. O dau vakayacora beka oqori? Vica vata na gauna a masu kina o Jisu ni vakayacora voli nona cakacaka vakaitalatala e vuravura. (Luke 3:21; 6:12, 13; 22:39-44) Ena iotioti ni bogi ni se bera ni vakamatei, a uqeti ira na nona tisaipeli ena vosa oqo: “Dou vakatawa ka masu, me kakua ni rawai kemudou na vere.” (Marika 14:38) Ke da vunautaka tiko na Matanitu ni Kalou ra qai sega ni kauai e levu, e rawarawa sara ni tuburi keda na yalodatuvu. Ke da vakalialiai se vakacacani, eda na via qamugusu meda kua kina ni kilai. Ia kevaka eda masuta vagumatua na yalo ni Kalou me vakadoudoutaki keda, eda na vukei me kua kina ni rawai keda na yalo oya.​—Luke 11:13; Efeso 6:18-20.

Kilai Nira Dau Vunau ena Doudou

7. (a) Na cava e yaga kina vei keda na itukutuku e volai ena Cakacaka? (b) Sauma na taro era tarogi ena icavacava ni parakaravu oqo, kauta cake mai na veitikina ena yaga vei keda.

⁷ E yaga dina vei keda kece na kedra itukutuku na lotu Vakarisito taumada e volai ena Cakacaka. E talanoataki kina na nodra ulabaleta na veika dredre kei na nodra vakadinadinataki Jiova tiko ga ena doudou o ira na yapositolo kei ira na tisaipeli taumada​—era tamata ga vakataki keda. Meda dikeva mada e dua na iwase ni itukutuku oya nida vakayagataka e vica na taro kei na veitikinivolatabu era volai toka oqo. Nida sa vakayacora oqori, tei vakasamataka se yaga vakacava vei iko na ka o wilika tiko.

Eratou vuli vinaka beka na yapositolo? Eratou kilai beka ni ratou tamata yatedei ena ituvaki cava ga e basika? (Joni 18:17, 25-27; 20:19; Cakacaka 4:13)

Na cava a vosa doudou rawa kina o Pita ena nodra mataveilewai na Jiu a beitaka na Luve ni Kalou? (Maciu 10:19, 20; Cakacaka 4:8)

Na cava eratou a cakava voli na yapositolo ni se bera sara ni ratou kau yani me ratou rairai vei ira na lewe ni Sanadrini? (Cakacaka 1:14; 2:1, 42)

Na cava erau kaya o Pita kei Joni nira sa vakarota na veiliutaki me ratou kua ni qai vunau tale tiko ena yaca i Jisu na yapositolo? (Cakacaka 4:19, 20)

Ni ratou sa sereki na yapositolo, ratou a lai kere veivuke tale vei cei? Ratou a masulaka beka me tarovi na veivakacacani? (Cakacaka 4:24-31)

Na veivuke cava a vakarautaka o Jiova nira saga na dauveitusaqati mera tarova na cakacaka vakavunau? (Cakacaka 5:17-20)

Eratou vakaraitaka vakacava na yapositolo ni ratou sega ni lecava na vuna eratou a sereki kina? (Cakacaka 5:21, 41, 42)

E dina nira veiseyaki e levu na tisaipeli ena vuku ni veivakacacani, ia na cakacaka cava era tomana tiko ga? (Cakacaka 8:3, 4; 11:19-21)

8. Na vua vakatubuqoroqoro cava era rawata na tisaipeli taumada ena nodra cakacaka vakaitalatala, ia eda mai vakaitavi tu kina vakacava o keda?

⁸ A sega ni tawayaga na nodra vunautaka na itukutuku vinaka na lotu Vakarisito taumada. Rauta ni 3,000 na tisaipeli era papitaiso ena Siga ni Penitiko 33 S.K. “Sa vakaikuritaki vakalevu vua na Turaga na tamata eso era vakabauta, era lewe vuqa na tagane kei na yalewa.” (Cakacaka 2:41; 4:4; 5:14) A mai lotu Vakarisito tale ga e dua a dau vakacacani ira vakaca na tamata ni Kalou, o Saula na kai Tarisu. Sa qai tekivu vunautaka sara yani ena doudou na ka dina. A qai kilai e muri me o Paula na yapositolo. (Kalatia 1:22-24) E sega ni cegu na cakacaka a tekivutaki ena imatai ni senitiuri. Sa qai bula ga ena iotioti ni veisiga oqo, qai teteva yani na veiyasa i vuravura kece. Sa noda itavi dokai meda vakaitavi tale ga kina, ia nida cakava oqori, meda vuli mai na nodra ivakaraitaki na ivakadinadina yalodina era a liu vei keda.

9. (a) Dau vunau ena vanua cava soti o Paula? (b) Na sala cava soti o dau vakatetea kina na itukutuku ni Matanitu ni Kalou?

⁹ Ni sa mai kilai Jisu Karisito o Paula, na cava a qai cakava? “Sa vunautaka sara . . . ni sa Luve ni Kalou na Karisito.” (Cakacaka 9:20) A marautaka dina ni sa lomani koya na Kalou, qai liaca ni itukutuku vinaka e sa ciqoma e dodonu mera rogoca na tamata kece ga. O Paula e dua na Jiu, ia me vaka ga na nodra ivakarau na Jiu ena gauna oya, a curu ina valenilotu me lai vunau kina. A vunau tale ga e veivale, vaka kina vei ira na tamata era tiko ena vanua ni veivoli. Qai sega ni tu vakasuka me gole ina veiyalava vovou me vunautaka kina na itukutuku vinaka.​—Cakacaka 17:17; 20:20; Roma 15:23, 24.

10. (a) A vakaraitaka vakacava o Paula ni sega wale ga ni yalodoudoutaka na nona cakacaka vakavunau, ia a yalomatuataka tale ga? (b) Eda na vakatotomuri Paula vakacava nida vunau vei ira na wekada, vei ira eda cakacaka vata, se o ira eda vuli vata?

¹⁰ Dina ni dau kacivaka ena doudou o Paula na itukutuku vinaka, ia a yalomatuataka tale ga na kena ivalavala. Me vaka tale ga oya o keda. Ni vunau vei ira na Jiu o Paula, a vakamasuti ira ena yavu ni veika a yalataka na Kalou vei ira na nodra qase. Ni vunau vei ira na kai Kirisi, a vosa vei ira ena veika e sa macala rawa tu vei ira. So na gauna ni vunautaka na itukutuku vinaka, e dau talanoataka sara ga na veika a sotava. A kaya kina oqo: “Ka’u sa cakava na ka kecega e na vuku ni tukutuku-vinaka, me’u rawata vata kina kei kemudou na kenai sau.”​—1 Korinica 9:20-23; Cakacaka 22:3-21.

11. (a) Na cava e cakava o Paula me kua ni coqai ira tiko ga kina na dauveisaqati? (b) Ena gauna cava soti ena ka vakayalomatua kina vei keda meda vakatotomuria na ivakaraitaki i Paula, ia eda na cakava vakacava oqori? (c) O cei e dau vakaukauataki keda meda vosa tiko ga kina ena doudou?

¹¹ Ni sa raica o Paula ni yaga me toki me lai vunau ina dua tale na vanua ni sa rui kaukaua na veitusaqati, a cakava vaka kina. A sega ni lomana me coqai ira tiko ga na dau veitusaqati. (Cakacaka 14:5-7; 18:5-7; Roma 12:18) Ia a sega ni madua vakadua me vunautaka na itukutuku vinaka. (Roma 1:16) Sega ni rawarawa vei Paula me vosota na nodra vosa ni veivakalialiai kei na nodra itovo kaukaua na dau veisaqati, ia a ‘doudou ena vuku ni noda Kalou’ me vunau tiko ga. E kaya: “Sa tu vata kei au na Turaga, a sa vakaukauwataki au; me kilai sara e na vukuqu na ka sa vunautaki.” (1 Cesalonaika 2:2; 2 Timoci 4:17) E dau vakaukauataki keda tale ga o Jisu, na Ulu ni ivavakoso vakarisito, meda cakava rawa kina na cakacaka sa tukuna oti tu o koya ni na vakayacori ena noda gauna.​—Marika 13:10.

12. Eda na vakaraitaka vakacava nida lotu Vakarisito doudou, ia na cava me yavu ni noda doudou?

¹² E tu na vuna vinaka meda tukuna tiko ga kina ena doudou na Vosa ni Kalou, me vakataki Jisu ga kei ira na tamata yalodina ni Kalou ena imatai ni senitiuri. Sega ni kena ibalebale oqo nida na tawaveinanumi se da veivakasosani ena ivalavala ni noda vunautaka na itukutuku vinaka. Ia ke mani vakacava na nodra sega ni kauai na lewenivanua eda na sega ga ni yalodatuvu; eda na sega tale ga ni galu ke mani kaukaua vakacava na nodra veitusaqati na meca. Eda vakabibitaka me vakataki Jisu, ni matanitu ga e dodonu me lewai vuravura taucoko na Matanitu ni Kalou. Eda vosa ena doudou nida kila nida matataki Jiova tiko, na Turaga Sau ni lomalagi kei vuravura, da kila tale ga ni itukutuku eda kacivaka e sega ni noda, e nona. Ia me usutu levu mada ga ni noda via vakacaucautaki Jiova na noda lomani koya.​—Filipai 1:27, 28; 1 Cesalonaika 2:13.

Railesuvi

• Na cava e bibi kina meda vunautaka na itukutuku ni Matanitu ni Kalou vei ira kece ga eda rawata, ia na cava e yaga meda kila rawa tiko?

• Eda na vakaraitaka vakacava nida sega ni nuitaka ga na noda kaukaua meda qaravi Jiova kina?

• Na tikina yaga cava soti eda vulica mai na ivola na Cakacaka?

[iYaloyalo ena tabana e 173]

Me vakataki ira ga na tamata i Jiova e liu, o keda nikua eda dau tukuna tale ga ena doudou na vosa ni Kalou