Na Cava e Vinakati ena Nodra Susugi na Gone?

ERA vakaitavi na itubutubu kece ena dua na itavi e sa bau veivakurabuitaki sara ga. Erau solia na itubutubu e dua na tiki ni yagodrau me lai tubu tiko vei tina me yacova ni sa buli vakaoti e dua na tamata. Sa rauta me dau kainaki ni nona sucu e dua na gone e “cakacaka mana.”

Ia na vakasucumi ni gone e se qai itekitekivu ga ni nodrau itavi na itubutubu. Mai na gauna e sucu kina e sa bula vakararavi sara tu ga na gone dramidrami, ia ni tubu cake tiko, ena toso cake tale ga na veiqaravi e gadreva. E gadrevi mera vukei tale ga me tubucake na nodra vakasama, na ivalavala ni lomadra, na nodra itovo, kei na nodra taleitaka na veika vakayalo.

E bibi tale ga ena nodra tubu vinaka na gone na nodrau veikauaitaki na itubutubu. Dina ga ni bibi na vosa e tauci e vakaraitaka na nodrau loloma, ia e dodonu me vakadinadinataki ena veika erau cakava. Io, ena yaga sara vei ira na gone na nodrau ivakaraitaki vinaka na itubutubu. E vinakati mera dusimaki na gone me baleta na nodra ivalavala, na ivakavuvuli mera muria ena nodra bula. E bibi oqo nira se gonelalai. Ena yaco na veika mosimosi ke berabera nodra vukei.

E tiko ena iVolatabu na ivakavuvuli vinaka duadua. E sega ni vakatauvatani rawa na yaga ni ivakasala e yavutaki mai kina. Nira vakavulici kina na gone, era na kila ni veika e tukuni tiko e sega ni ivakavuvuli ni tamata, ia e nona vosa ga na Dauveibuli, na Tamadra vakalomalagi. Oqo ena vakarawarawataka vei ira mera ciqoma na ivakasala, mera kua ni raica ga vakamamada.

E vakauqeti ira na itubutubu na iVolatabu mera gumatua ena nodra vakavulici ira na luvedra ena ivakavuvuli dodonu ena gauna era se gone kina. Nira sa tubu cake tiko na gone, sa dau dredre vei ira na itubutubu mera veivosakitaka kei ira na gone e so na veika bibi. E tabaki na ivola oqo, Vuli Vua na Qasenivuli Levu, me vukea me kua ni yaco na leqa oya. E tabaki kina na ivakamacala vakaivolatabu mera wilika vata kei luvedra. Kuria oya, e vakarautaki tale ga me vakarawarawataka na nodrau veitalanoa o gone kei koya erau wilika vata na ivola.

Na ivola oqo e dau tarogi ira tale ga na gone. E levu sara na taro veiganiti e tarogi kina. Ni o taroga na veitaro oya, o na raica e dua na itoqa balavu vaka oqo (—). Oqo e ivakatakilakila ni nomu cegu, me rawa kina ni vakamacala o gone. Era dau via vakaitavi tale ga na gone. Kevaka era sega ni vakaitavi, era na sega ni taleitaka na ka o wilika.

Ia na ka e bibi cake, na veitaro oqo ena vukei iko mo kila na ka e nanuma o gone. De dua ena cala ena so na gauna na nona isaunitaro. Ia na veika e volai tarava na taro oqori ena vukea na gone me veisautaka nona rai me salavata kei na iVolatabu.

E kilai tani na ivola oqo baleta ni tiko kina e sivia na 230 na iyaloyalo. E levu na ivakamacala ni iyaloyalo oqo era taro me rawa kina ni vakamacalataka o gone na ka e raica kei na ka e wilika. Ena vinaka gona ke drau veitalanoataka kei gone na iyaloyalo kece. Oqo e ivukevuke totoka ni veivakavulici e vakabibitaka na ka e vakavuvulitaki tiko.

Ni sa wilivola rawa na gone, uqeti koya me wilika na ivola qai wilika tale ga vei iko. Na levu ga ni nona wilika, na levu tale ga ni kena kasa ina nona vakasama kei na lomana. Ia me rawa ni qaqaco vinaka na nomudrau veilomani kei na veidokadokai, drau dau wilika vata vakawasoma na ivola oqo kei luvemu.

Ena vica na yabaki sa oti a sega ni vakabauti ni na tu vakarawarawa vei ira na gone nikua na itukutuku me baleta na veiyacovi dukadukali, na vakatevoro, kei na so tale na itovo vakasisila. E vinakati kina mera taqomaki na gone, oya na ka e cakava na ivola oqo ni vakayagataki kina na vosa e tau vakadodonu qai rakorako. Ia, e vinakati ga mera vakamuai na gone vua na vutu ni vuku, na Tamada vakalomalagi, na Kalou o Jiova. E dau veivakamuai tale ga vaka oqori na Qasenivuli Levu. E nuitaki ni na vukei kemuni kei na nomuni vuvale na ivola oqo me veisautaka na nomuni bula, me vakamarautaki Jiova, mo ni marau tale ga kina me tawamudu.