Era Vakabulai Nira Vakarorogo

A VEIVAKASALATAKI o Jisu Karisito me baleta na ivakataotioti ni ituvaki ni veika vakajiu e liutaki tiko mai na valenisoro e Jerusalemi. E sega ni tukuna na siga ena yaco kina. Ia e vakamacalataka ga na veika ena yaco ni bera na veivakarusai. E uqeti ira kina na nona tisaipeli mera yadra tiko ra qai dro tani mai na vanua leqataki oya.

E parofisaitaka o Jisu: “Ni dou sa raica ni ra sa vakavolivoliti Jerusalemi na veimataivalu, dou kila sara ni sa voleka mai na kena vakarusai.” E kaya tale ga: “Ni dou sa raica na ka vakasisila e dauveivakarusai ni sa toka e na yasana vakatabui . . . me ra dro sara ko ira era tiko e Jiutia ki na veiulunivanua.” A uqeti ira o Jisu mera kua ni lesuva na nodra iyau. Ke ra via bula, mera na dro ena kena totolo duadua.​—Luke 21:20, 21, VV; Maciu 24:15, 16, VV.

Me tarova nodra saqati ira voli na veiliutaki na lewe i Jerusalemi, a liutaka kina o Cestius Gallus na matasotia ni Roma me kaba na koro oqo ena 66 S.K. Era curuma sara na koro ra qai lai viribaita toka na valenisoro. Era veilecayaki na lewenikoro. O ira na yadra tiko era siqema sara ni sa voleka na veivakarusai. Ia e rawa beka mera dro? E veivakidroataki nodra suka vakasauri na sotia nei Cestius Gallus. Era cici muri ira yani na Jiu dauveitusaqati. Oya sara ga na gauna vei ira na yadra tiko mera sa dro tani kina mai Jerusalemi kei Jutia taucoko!

Ena yabaki ga e tarava, era suka tale mai na sotia ni Roma rau liutaka o Vespasian kei luvena o Titus. E mai valuti o Jutia taucoko. Ena itekivu ni yabaki 70 S.K., era a mai viria na kai Roma e dua na bai e vakayagataki kina na kau momoto me yavokiti Jerusalemi. Sa sega tale ni qai dua e dro rawa. (Luke 19:43, 44) Era veivakamatematei na duidui ilawalawa ena loma ni koro. O ira na vo ni lewenikoro era sa qai vakamatei se kau vakavesu vei ira na kai Roma. E rusa vakadua na koro kei na kena valenisoro. E kaya na dauvolaitukutuku ni veika vakajiu ena imatai ni senitiuri o Josephus nira mate kina e sivia na duanamilioni na Jiu. E sega ni qai tara tale na valenisoro oya.

Ke ra tu ga e Jerusalemi na lotu Vakarisito ena 70 S.K., ke ra vakamatei se kau vakavesu tale ga. Ia era vola na dauvolaitukutuku makawa nira rogoca na ivakasala ni Kalou na lotu Vakarisito, nira biuti Jerusalemi kei na veivanua e Jutia mera dro ina veiulunivanua ena tokalau ni uciwai na Joritani. So era lai vakaitikotiko e Pela ena yasana o Perea. Era biuti Jutia ra qai sega ni suka tale kina. Era vakabulai nira rogoca na ivakasala i Jisu.

O Dau Taura Vakabibi na iVakasala e Nuitaki?

E levu era sega ni kauaitaka na ivakasala baleta ni levu na ivakasala era dau rogoca e sega ni yaco. Ia, e rawa ni vakabulai iko na nomu rogoca na ivakasala.

Ena 1975, a soli e dua na ivakasala me baleta na kena vakabauti ni na kurei Jaina e dua na uneune. Era maqusa sara na vakailesilesi vakamatanitu. Ra veitokoni tale ga na lewenivanua ena nodra muria na ivakasala. Era mani vakabulai e vica vata na udolu.

Ena Epereli 1991, era tekivu raica na veikoro ena yatu Filipaini era koto ena yasa ni ulunivanua o Pinatubo ni sa ceburaka tiko mai na ulunivanua oqo na kubou kei na dravusa. Ni oti e rua na vula ni vakadidike, eratou sa vakaraitaka na tabana e dau dikeva na ulunivanua kama mai Filipaini na Institute of Volcanology and Seismology, ni sa voleka sara ni kacabote na ulunivanua. Sega ni bera nodra sa tokitaki mai na vanua oya e vicasagavulu na udolu. Ena mataka ni 15 June, e lalata na vanua na kacabote ni ulunivanua oqo qai kaburaka i macawa na dravusa e walu na kilomita na kena raba, kei na kena cere. E qai mai robota tu na dravusa oqo e dua na yasa ni vanua levu. Era vakabulai e vica vata na udolu nira vakarorogo.

E vakasalataki keda na iVolatabu me baleta na kena sa voleka na ivakataotioti ni ituvaki kei vuravura. Eda sa bula sara tiko ga oqo ena iotioti ni veisiga. O yadra tiko ni sa voleka sara na ivakataotioti? Ena nomu ivakarau ni bula, e laurai beka ni o qarauna tiko mo kua ni lesu tale ina vanua leqataki? Ni sa lekaleka na gauna, o vakasalataki ira tiko e so tale mera cakava tale ga vaka kina?

[iYaloyalo ena tabana e 20]

Levu era vakabulai nira rogoca na ivakasala ena gauna sa ceburaka tiko kina na dravusa na ulunivanua o Pinatubo

[iYaloyalo ena tabana e 21]

Era vakabulai na lotu Vakarisito era rogoca na ivakasala i Jisu ni vakarusai o Jerusalemi ena 70 S.K.