WASE 35
Rawa Vakacava Niu iTokani ni Kalou?
Na ituvaki rarawataki e sotava o Jeremy e vakavuna kina me mareqeta nona veitokani kei na Kalou. E kaya, “Niu sa yabaki 12, e biuti keitou o tamaqu. Dua na bogi niu vakarau moce au vakamasuti Jiova me lesu mai o tamaqu.”
Ena levu ni nona rarawa, e tekivu wilika o Jeremy na iVolatabu. E uqeti koya sara ga nona wilika na Same 10:14. E tukuni ena tikinivolatabu ya me baleti Jiova: “E vakanuinui tu vei kemuni o koya e kalouca, oni dauvukea na gone e sega ni vakatamani.” E kaya o Jeremy: “Au vakila ni vosa tiko vei au o Jiova, e vakaraitaka ni na vukei au, e Tamaqu. O cei tale e tautauvata kei koya, e tama vinaka duadua?”
DE DUA o sotava tale ga na ituvaki qori. E vakaraitaka na iVolatabu ni vinakata o Jiova mo nona itokani. E kaya na iVolatabu: “Toro voleka vua na Kalou ena qai toro voleka mai vei kemuni o koya.” (Jemesa 4:8) Vakasamataka mada na vosa qori, o sega ni raici koya rawa se me drau tautauvata, ia e sureti iko tu na Kalou o Jiova mo nona itokani!
Ena vinakati kina na sasaga. Ke dua tiko nomu senikau e vale, o kila ni na sega ni tubu ga vakataki koya. Me bulabula tiko ga ena vinakati mo suya wasoma, qai biu ena vanua me tubu vinaka kina. E dina tale ga qori nida veitokani kei na Kalou. Na cava mo cakava me qaqaco kina nomudrau veitokani?
Na Bibi ni Vuli
E vinakati na vakarorogo kei na veivosaki ena veitokani. E dina tale ga qori ena noda veitokani kei na Kalou. Eda vakarorogo vua na Kalou nida wilika qai vulica na iVolatabu.—Same 1:2, 3.
De dua e sega ni matau mo dau vuli. Levu na itabagone era taleitaka na sara tivi, qito, se veimaliwai kei na nodra itokani. Ia e tiko na ka mo cakava ke o vinakata mo veitokani kei na Kalou. E bibi mo vakarorogo vua ni o vulica na nona Vosa.
Kua ni leqataka soti. Sega ni tukuni me vakacauoca na vuli iVolatabu. O rawa ni marautaka ke o sega mada ga ni matau ena vuli. Na imatai ni ka mo cakava mo lokuca na gauna mo vuli iVolatabu kina. E kaya e dua na goneyalewa o Lais, “E tiko noqu ituvatuva. Na imatai ni ka au cakava ena veimataka oya meu wilika e dua na wase ena iVolatabu.” O Maria e yabaki 15 e duidui nona ituvatuva. E kaya, “Au wilika vakalailai na iVolatabu ni bera niu moce ena bogi.”
Me tekivu nomu porokaramu ni vuli, raica na kato na kena ulutaga “Dikeva Nomu iVolatabu.” Oti mo vola e ra na gauna o rawa ni vakayagataka kina e 30 na miniti se sivia mo vulica na Vosa ni Kalou.
․․․․․
Na imatai ni kalawa nomu tuvanaka na gauna. Ni o tekivu vuli o na raica ni sega ni rawarawa na wili iVolatabu. O na rairai duavata kei Jezreel e yabaki 11, e tukuna vakadodonu, “Eso na wase ni iVolatabu e dredre qai vakavucesa na wilika.” Ke va qori nomu rai, kua ni soro. Mo raica nomu vuli iVolatabu me gauna o vakarorogo kina vua na Kalou o Jiova, nomu itokani. Kena itinitini, na levu ga ni nomu gumatua na vulica na iVolatabu, o na marautaka vakalevu, ena levu tale ga na ka o kila!
Bibi na Masu
Eda vosa vua na Kalou nida masu. Vakasamataka mada na isolisoli talei ni masu. O rawa ni vosa vua na Kalou o Jiova ena gauna cava ga ena siga se bogi. E dau tu vakarau me rogoci iko. Kena ikuri, e vinakata me rogoca sara ga na ka o tukuna. Oya na vuna e uqeti iko kina na iVolatabu, “Na ka kece me vakaraitaki vua na Kalou ena masu kei na kerekere salavata kei na vakavinavinaka.”—Filipai 4:6.
Me vaka e vakaraitaka na tikinivolatabu qo, e levu na ka o rawa ni tukuna vei Jiova. E wili kina nomu leqa kei na nuiqawaqawa, rawa ni okati tale ga kina na ka o vakavinavinakataka. Me vaka ga nomu dau vakavinavinakataki ira nomu itokani ena ka vinaka era cakava, o rawa ni cakava tale ga qori vei Jiova. E cakava vei iko e levu sara na ka ni vakatauvatani kei ira nomu itokani.—Same 106:1.
Vola eso na ka o vakavinavinakataki Jiova kina.
․․․․․
Macala ni so na gauna o na rere qai lomaleqa. E kaya na Same 55:22: “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.”
Vola eso na ka o lomaleqataka o na vinakata mo masulaka.
․․․․․
Ka o Sotava
E tiko e dua tale na ka e dodonu mo raica vakabibi ena nomu veitokani kei na Kalou. E vola na daunisame o Tevita: “Tovolea mada qai raica ni vinaka o Jiova.” (Same 34:8) Ni vola na ika34 ni Same o Tevita, sa qai oti ga nona sotava e dua na ituvaki rerevaki. E drovaki Tui Saula ni via vakamatei koya. Ia e lai vuni vei ira na kena meca, na kai Filisitia. A voleka sara ga ni vakamatei o Tevita, e mani lasutaka ni lialia qai dro rawa sara kina.—1 Samuela 21:10-15.
E sega ni tukuna o Tevita ni dro bula ena vuku ni nona sasaga, ia e vakavinavinakataki Jiova ga. Ena itekitekivu ni Same sa cavuti oti mai, e vola: “Au vakatarogi Jiova, e qai rogoci au o koya. E vakabulai au mai na ka kece au rerevaka.” (Same 34:4) Rawa ni uqeti ira eso tale o Tevita mera “tovolea qai raica ni vinaka o Jiova”a baleta ni a vakadinadinataka sara ga.
O rawa ni vakasamataka e dua na ituvaki o sotava e vakaraitaka ni kauaitaki iko o Jiova? Ke vaka kina, vola sara. Vakatutu: Sega ni tukuni me dua na ituvaki levu sara, e rawa ni so na ka ni veivakalougatataki ni veisiga eda dau raica tu vakamamada.
․․․․․
De dua rau vakavulici iko nomu itubutubu ena iVolatabu. Qori na ka ni veivakalougatataki. Ia se vinakati tiko ga mo veitokani voleka kei na Kalou. Ke o se bera ni cakava qori, rawa ni vakayagataka na veika e volai ena wase qo mo tekivu kina. Ena vakalougatataka o Jiova nomu sasaga. E kaya na iVolatabu: “Kerekere tiko ga, ena qai soli vei kemudou, vaqaqara tiko ga, dou na qai kunea.”—Maciu 7:7.
[iVakamacala e ra]
a Eso na iVolatabu e vakadewataka na matavosa “tovolea qai raica” me “kunea vakataki iko,” “vaqaqa vakataki iko,” kei “o na qai kila ni o sotava.”—Contemporary English Version, Today’s English Version, kei The Bible in Basic English.
TIKINIVOLATABU BIBI
“Era marau o ira na kauaitaka nodra bula vakayalo.”—Maciu 5:3.
VAKATUTU
Ke o wilika mada ga e va na tabana e veisiga, o na wilika oti na iVolatabu ena dua na yabaki.
O BAU KILA . . .?
Nomu wilika tiko na ivola qo kei na nomu bulataka na ivakasala vakaivolatabu e volai kina, e dusia ni kauaitaki iko o Jiova.—Joni 6:44.
KA MO CAKAVA!
Me yaga noqu vuli vakataki au, au na ․․․․․
Me wasoma noqu masu, au na ․․․․․
Na cava au na via taroga vei rau noqu itubutubu me baleta na ulutaga qo? ․․․․․
CAVA O NANUMA?
● O na marautaka vakacava nomu vulica vakataki iko na iVolatabu?
● Na cava e via rogoca kina o Jiova nodra masu na tamata ivalavala ca?
● O na vakavinakataka vakacava nomu masu?
[Tikina bibi]
Niu se gone e duadua tu ga na ivakarau ni noqu masu. Qo au sa dau masulaka na ka vinaka kei na ka ca e yaco e veisiga. Ni duidui na ituvaki au sotava e veisiga, e sega ni duadua tu ga na ka au masulaka.’’—Eve
[iYaloyalo]
Dikeva Nomu iVolatabu
1. Digia e dua na italanoa mai na iVolatabu o via wilika. Masulaka na vuku mo kila vinaka kina.
2. Wilika vinaka. Kua ni vakatotolo. Vakasamataka na ka o wilika. Raitayaloyalotaka ni o tiko kina: Saga mo raica na ka e yaco, rogoca na domodra na vosa, ceguva na cagi, tovolea na kakana, kei na so tale, me vaka sara ga ni o tiko kina!
3. Vakasamataka na ka o wilika oti. Rawa ni taroga eso na taro, me vaka:
● Na cava e okata kina na itukutuku qo o Jiova ena nona Vosa?
● O cei e ganita meu vakatotomuria, o cei e ivakaraitaki ca meu vuli kina?
● Na cava na ka yaga au vulica ena italanoa qo?
● Na cava au vulica me baleti Jiova kei na sala e cakava kina na ka?
4. Masu vakalekaleka vei Jiova. Tukuna vua na ka o vulica ena nomu vuli iVolatabu kei na sala mo bulataka kina. Dau vakavinavinakataki Jiova ena iloloma e solia vei iko, ya nona Vosa na iVolatabu!
[iYaloyalo]
“Na nomuni vosa na cina ina yavaqu, kei na rarama ena noqu sala.”—Same 119:105.
[Kato/iYaloyalo]
Liu ga na Ka me Liu
O sega ni masu ni o rui osooso? Sega na gauna ni vuli iVolatabu? E vakatau tiko qo ena ka o vakabibitaka.
Tovolea mada qo: Taura e dua na vokete, biuta e loma e vica na vatu lelevu. Oti sova yani na nuku me sinai sara. Sa tawa tu ena vokete na vatu kei na nuku.
Vakalala na vokete qai tawana tale: Sova e liu na nuku, biuta yani na vatu. E rauta? Sega. Ni o sova e liu na nuku.
Ka ni vuli? E kaya na iVolatabu: ‘Moni vakadeitaka na veika era bibi sara.’ (Filipai 1:10) Ke o vakaliuca na veika lalai me vaka na ka ni veivakamarautaki, ena sega na gauna mo cakava kina na veika e bibi cake, ya na veika vakayalo. Ia ni o muria na veivakadreti ni iVolatabu, o na raica ni o rawa ni cakava ruarua na veika bibi kei na so na ka ni veivakamarautaki. Ena vakatau tiko ga ena ka o tawana e liu ena vokete!
[iYaloyalo]
Me vaka na senikau, ena vinakati na sasaga me dei kina noda veitokani kei na Kalou