Na Vuli Cava e Vakarautaki Vei Ira na Painia?

Keimami kilai na iVakadinadina i Jiova ena vuli vakalou. E tiko na vuli e baleti ira ga na vakaitavi vakatabakidua ena vunautaki ni itukutuku vinaka ni Matanitu ni Kalou me rawa nira ‘vakacavara sara vakavinaka na nodra itavi vakaitalatala.’​—2 Timoci 4:5.

Koronivuli ni Cakacaka Vakapainia. Ni oti e dua na yabaki nona painia tudei e dua na iVakadinadina i Jiova, ena tiko ena dua na vuli siga ono ena vakayacori ga ena Vale ni Soqoni. Qori me vakavolekati koya vei Jiova, me laulau kina nona cakacaka vakaitalatala qai yalodina tiko ga ena nona veiqaravi.

Koronivuli ni iTalatala ni Matanitu. E tuvanaki na vuli vula rua qo me baleti ira na painia matua era yalorawarawa mera biuta nodra vanua mera lai veiqaravi ena vanua e vinakati vakalevu kina na veivuke. E vaka ga era kaya tiko, “O yau qo! Moni talai au!” mera vakatotomuria kina na italatala gugumatua duadua me bau bula e vuravura o Jisu Karisito. (Aisea 6:8; Joni 7:29) Ena vinakati na bula rawarawa ke dua e via veiqaravi ena dua tale na vanua. Ena rairai duidui na itovo vakavanua, na draki, kei na kakana. De dua ena vinakati tale ga me vulica e dua tale na vosa. E yaga na vuli qo vei ira na tagane kei na yalewa era sega ni vakawati, kei ira na veiwatini e tiko nodra yabaki mai na 23 ina 65. Qori era na bucina kina na itovo vakayalo ena vinakati vakalevu ena nodra ilesilesi kei na ivakarau ni kilaka me vakayagataki ira kina vakavinaka o Jiova ena nona isoqosoqo.

Koronivuli o Kiliati. Na vosa vakaIperiu ni “Kiliati” e kena ibalebale “iBinibini iVakadinadina.” Me tekivu mai na tauyavu ni koronivuli o Kiliati ena 1943, e 8,000 vakacaca na gonevuli era sa tauri vola oti ra qai lesi mera daukaulotu gugumatua “ina iyalayala kei vuravura.” (Cakacaka 13:47) Nira yaco yani eso na gonevuli e Peru, se sega ni dua na ivavakoso ena vanua qori. Ia nikua sa 1,000 vakacaca. Nira tekivu veiqaravi e Japani eso na daukaulotu, se sega ni yacova na tini na iVakadinadina e kea. Nikua, sa 200 vakacaca na udolu. E vulici vakamatailalai sara ga na Vosa ni Kalou ena lima na vula ni vuli e Kiliati. Era sureti mera tiko ena vuli qo na painia lavotaki se daukaulotu, ira na veiqaravi ena valenivolavola ni tabana se ivakatawa ni tabacakacaka. Na vuli qo ena yaga vakalevu ena kena tosoi qai vakavinakataki tiko ga na cakacaka e vuravura raraba.

• Na cava na inaki ni Koronivuli ni Cakacaka Vakapainia?

• O cei e rawa ni vuli ena Koronivuli ni iTalatala ni Matanitu?