E Rawa ni Marau Vakacava na Nomu Vuvale?

1. Me marau na vuvale, na cava e bibi kina na vakamau?

E vu mai vua na Kalou mamarau o Jiova na itukutuku vinaka, e vinakata me marau na vuvale. (1 Timoci 1:11) A tauyavutaka na vakawati. E bibi me vakalawataki na vakawati me marau kina na vuvale baleta ni vanua vinaka mera susugi kina na gone. E bibi mera doka na lotu vaKarisito na lawa ni nodra vanua me baleta na vakalawataki ni vakawati.​—Wilika Luke 2:1, 4, 5.

Na cava na rai ni Kalou me baleta na vakawati? E vinakata me dei na nodrau vauci vata na tagane kei na yalewa. E vinakata o Jiova me yalodina o tagane vua na watina, me cakava tale ga qori o yalewa vei tagane. (Iperiu 13:4) E cata na veisere. (Malakai 2:16) Ia e vakatara me sereki watina na lotu vaKarisito qai vakawati tale ke veibutakoci o kena isa.​—Wilika Maciu 19:3-6, 9.

2. Me vakacava nodrau ivalavala na veiwatini ena nodrau bula vakawati?

A bulia o Jiova na tagane kei na yalewa me rau dau cakacaka vata. (Vakatekivu 2:18) Ni ulunivuvale o tagane, e dodonu me vakarautaka na veika vakayago me baleta na nona vuvale qai vakavulici ratou ena veika me baleta na Kalou. Ena vakuai koya ena so na ka ni lomana na watina. E dodonu me rau veilomani rau qai veidokai na veiwatini. Ni rau sega ni uasivi, e bibi me rau dauveivosoti me marautaki kina na vakawati.​—Wilika Efeso 4:31, 32; 5:22-25, 33; 1 Pita 3:7.

3. Mo biuti watimu ke o sega ni marautaka na nomu vakawati?

Ke yaco eso na ka dredre ena nomudrau vakawati, e bibi mo drau saga mo drau dau veilomani. (1 Korinica 13:4, 5) E sega ni tukuna na Vosa ni Kalou ni veibiu e iwali ni leqa e dau yaco ena vakawati.​—Wilika 1 Korinica 7:10-13.

4. Ra gone, na cava e vinakata na Kalou?

E vinakata o Jiova moni marau qai vakarautaka na ivakasala vinaka duadua moni marautaka kina na nomuni bula vakaitabagone. E vinakata moni vuli ena nodrau vuku kei na nodrau kila na nomuni itubutubu. (Kolosa 3:20) E vinakata tale ga o Jiova moni vakila na marau e rawati ni vakayacori na ka e vinakata na Dauveibuli kei na Luvena.​—Wilika Dauvunau 11:9–12:1; Maciu 19:13-15; 21:15, 16.

5. Ra itubutubu, era na marau vakacava na luvemuni?

Moni cakacaka vakaukaua moni vakarautaka na kakana, na vale kei na nodra isulu na luvemuni. (1 Timoci 5:8) Ia mera marau, e bibi moni vakavulici ira mera lomana na Kalou, mera vuli tale ga vua. (Efeso 6:4) Ena uqeti ira vakalevu na luvemuni nira raica na nomuni lomana na Kalou. Ena vukei ira tale ga na nomuni yavutaka ena Vosa ni Kalou na nomuni veivakavulici.​—Wilika Vakarua 6:4-7; Vosa Vakaibalebale 22:6.

Ena yaga vei ira na gone na nomuni dau veivakayaloqaqataki kei na nomuni veivakacaucautaki. E gadrevi tale ga mera dau vunauci ra qai vakadodonutaki. Qori ena taqomaki ira mai na ivalavala era na rarawa kina. (Vosa Vakaibalebale 22:15) Ia me kua ni voravora se kaukaua na veivunauci.​—Wilika Kolosa 3:21.

E tabaka na iVakadinadina i Jiova e levu na ivola vakaivolatabu e vakarautaki sara ga me vukei ira na itubutubu kei na gone.​—Wilika Same 19:7, 11.