Me Sauma na iVolatabu

E Rawa Vakacava ni Marau na Nomu Vuvale?

Ena veivosakitaki ena ulutaga qo eso na taro o rairai dau lomatarotarotaka tu, e tiko tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kedra isau.

1. E bibi beka na vakamau me marau kina na vuvale?

Na Kalou mamarau o Jiova a tauyavutaka na vakawati. E bibi qori ena vuvale mamarau ni rawa kina na veitokani, e vanua vinaka tale ga mera susugi kina na gone. Na cava na rai ni Kalou me baleta na vakawati? E vinakata me dei, me vakalawataki na nodrau vauci vata na tagane kei na yalewa. (Luke 2:1-5) E vinakata na Kalou me yalodina o tagane vua na watina, me cakava tale ga qori o yalewa. (Iperiu 13:4) E vakatara o Jiova me sereki watina e dua na lotu vaKarisito qai vakawati tale ke veibutakoci o kena isa.—Wilika Maciu 19:3-6, 9.

2. Me vakacava na nodrau ivalavala na veiwatini?

A bulia o Jiova na tagane kei na yalewa me rau dau cakacaka vata. (Vakatekivu 2:18) Ia ni ulunivuvale o tagane, e dodonu me vakarautaka na veika vakayago me baleta na nona vuvale qai vakavulici iratou ena veika me baleta na Kalou. Ena vakuai koya ena so na ka ni lomana dina na watina. E dodonu me rau veilomani rau qai veidokai na veiwatini. Ni rau sega ni uasivi, e vinaka me rau dauveivosoti na veiwatini me marautaki kina na vakawati.—Wilika Efeso 4:31, 32; 5:22-25, 33; 1 Pita 3:7.

3. Mo biuti watimu beka ke o sega ni marautaka na nomu vakawati?

Ke yaco eso na ituvaki dredre ena nomudrau vakawati, drau saga tiko ga mo drau veilomani. (1 Korinica 13:4, 5) E sega ni tukuna na Vosa ni Kalou ni iwali ni leqa ena vakawati na veibiu. Ia ena so na ituvaki ca sara, ena vakatulewataka kina na lotu vaKarisito e veiganiti se sega me biuti watina.—Wilika 1 Korinica 7:10-13.

4. Ra gone, na cava e vinakata na Kalou?

E vinakata o Jiova mo marau. Mo marautaka na nomu bula vakaitabagone, e vakarautaka na Kalou na ivakasala vinaka duadua. E vinakata mo vuli ena nodrau vuku kei na nodrau kila na nomu itubutubu. (Kolosa 3:20) Ni o talairawarawa vei rau na nomu itubutubu, e marau o Jiova.—Wilika Dauvunau 11:9–12:1; Maciu 19:13-15; 21:15, 16.

5. Ra itubutubu, cava moni cakava mera marau kina na luvemuni?

Moni cakacaka vakaukaua moni vakarautaka na kakana, na vale kei na nodra isulu na luvemuni. (1 Timoci 5:8) Ia mera marau, ena gadrevi moni vakavulici ira mera lomana na Kalou, mera vuli tale ga vua. (Efeso 6:4) Ena uqeti ira na luvemuni na nodra raica na nomuni lomana na Kalou. Ena vakadodonutaki na nodra rai na luvemuni ke oni yavutaka ena Vosa ni Kalou na nomuni veivakavulici.—Wilika Vakarua 6:4-7; Vosa Vakaibalebale 22:6.

Ena yaga vei ira na gone na veivakayaloqaqataki kei na veivakacaucautaki. Ena gadrevi mera vunauci ra qai vakadodonutaki. Qori ena taqomaki ira mai na ivalavala era na rarawa kina. (Vosa Vakaibalebale 22:15) Me kua ni sivia tale na veivunauci, me caka tale ga ena loloma.—Wilika Kolosa 3:21.

E tabaka na iVakadinadina i Jiova e levu na ivola e yavutaki ena iVolatabu me vukei ira na itubutubu kei na gone.—Wilika Same 19:7, 11.

Me ikuri ni ivakamacala, raica na wase 14 ni ivola qo, tabaka na iVakadinadina i Jiova.