Yalayala ni Matanitu ni Kalou​—Vakavoui na ka Kece

O BETIA e dua na apolo dreu, boica na kena iboi totoka ni bera ni o biuta ena basikete e sinai tu e yasamu. Sa dede nomu cakacaka tiko, ia o sega ni oca o qai tu vakarau mo cakava eso tale na itavi. E beti apolo tiko o tinamu ena dua na vunikau voleka, qai marau ni veitalanoa kei ira na wekamu kei na itokani era veivuke tiko ena tatamusuki. E rairai bulabula o tinamu me vaka ga na kena irairai ena gauna o se gone kina. E dredre mo vakasamataka lesu nona bula vaqase ena vuravura sa takali, ni o raica sara ga na nona tauvimate, o tiko sara ga e yasana ena gauna e mai vakacegu kina, qai dua na ka na nomu tagicaki koya ena nona ibulubulu. Ia me vakataki ira na kena vo, e sa vakaturi tale, qai bulabula!

Eda kila ni sa voleka sara na veisiga qori. Eda vakadeitaka qori nida kila ni dau yaco kece na yalayala ni Kalou. Ena iwasewase qo, eda na raica na kena vakayacori eso na yalayala ni Matanitu ni Kalou ena veigauna se bera mai, me yacova yani na ivalu na Amaketoni. Ena railesuvi tale ga eso na yalayala vakatubuqoroqoro ena yaco ni oti na ivalu qori. Dua na ka noda marau nida na raica ni sa veiliutaki e vuravura na Matanitu ni Kalou qai vakavoui na ka kece!