Yalayala i Cei Mo Nuitaka?

“DUA na ka na levu ni nona yalayala ni se tu vua na kaukaua, ia e tawayaga na ka e cakava me vaka ga ni sa tawayaga tu nikua.”​—King Henry the Eighth, e vola o William Shakespeare.

Na vosa ni yalayala levu e vola oqo o Shakespeare a cavuta o Kadinala Thomas Wolsey, na turaga ni Igiladi e dau vakacolasau ena buturara ni politiki ena ika16 ni senitiuri. E so era na kaya ni tautauvata vinaka na ka e tukuna oqori o Shakespeare kei na levu na vosa ni yalayala nikua. Era dau yalataka na veiliutaki e levu na ka, ia era sega ni dau dina kina. Sa rauta mera dau vakatitiqataka na lewenivanua na vosa ni yalayala cava ga e cavuti.

Levu Era Vakanuinuikara

Kena ivakaraitaki, ena gauna e yaco sara tu ga kina na veivaluvaluti vakaloloma ena Balkan ena veiyabaki ni 1990, e tukuna na Matabose kei Vuravura ni “vanua vinaka” ni vakaruru o Srebrenica e dua na vanua ena tauni kei Bosnia. E vaka me ivakadei vinaka oqori vei ira na matanitu era lewe ni Matabose kei Vuravura. Era tokona na vakasama oqori e udolu vakacaca na isenivalu Musolomani era tu e Srebrenica. Ia, kena itinitini, e sega ni kune ena vanua oqori na vakacegu a yalataki vei ira. (Same 146:3) Ena Julai 1995, era botea yani na meca na vanua era yadrava na sotia ni Matabose kei Vuravura ra qai ravuravu ena tauni oya. Era yali kina e sivia e 6,000 na Musolomani, ra qai labati e rauta ni 1,200.

Sa ivakarau tu ni noda bula na yalayala lasu. Era vakila na tamata nira vakaisini ena “levu ni ivakamacala lasutaki qai veivakamuai cala” e tukuni vei ira edaidai. E vakayalolailaitaki ira tale ga na “nodra yalayala e levu na daunipolitiki ra qai sega ni dina kina.” (The New Encyclopædia Britannica, Volume 15, tabana e 37) O ira na iliuliu ni lotu era yalataka mera na karoni ira na nodra qelenisipi, era tini vakalolomataki ira tale ena sala torosobu sara. Ena vanua sara mada ga ni vuli se veiqaravi vakavuniwai—e dodonu me vakaraitaki kina na loloma kei na veinanumi—e so era sega ni dina ena ka e nuitaki vei ira, era veivakacacani, se ra tini labati ira sara ga na tamata e dodonu mera taqomaka. Sa rauta me vakaroti keda na iVolatabu meda kua ni vakabauta na vosa kece!—Vosa Vakaibalebale 14:15.

Vosa ni Yalayala Dina

Era tiko tale ga e levu na tamata era dau dina ina nodra vosa ni yalayala, so na gauna era bolea sara ga na ka mosimosi. (Same 15:4) E vauci ira tu na nodra vosa ni yalayala ra qai dau dina kina. E so tale era dau dina ina nodra vosa ni yalayala baleta nira dau via caka vinaka ga. Era dau tu vakarau qai lomadra dina mera cakava na ka era yalataka, ia e sega vei ira na kaukaua mera cakava dina kina. Dau veivakararawataki sara ga e so na ituvaki ni sega ni caka rawa kina na ka vinaka sa lalawataki tu.​—Dauvunau 9:11.

Ia, se mani vuna cava ga e tiko, era sa sega tu ga ni qai vakabauta e levu na tamata na nodra vosa ni yalayala e so. Sa qai vure gona kina na taro: E tiko beka na vosa ni yalayala e nuitaki? Io, eda rawa sara ga ni nuitaka na Vosa ni Kalou na iVolatabu. Ena veivosakitaki na tikina oqori ena ulutaga e tarava. O na rairai duavata tale ga kina kei ira e le vica vata na milioni nida rawa sara ga ni nuitaka na vosa ni yalayala ni Kalou.

[iTaba ni Credit Line ena tabana e 3]

AP Photo/Amel Emric