Vosa ni Yalayala Meda Nuitaka

EKILA na parofita ni Kalou o Maika ni sega ni dau nuitaki ena so na gauna na vosa ni yalayala. Ena nona gauna, o ira sara mada ga era veivolekati era sega ni dau dina tu ga ena ka era tukuna. E veivakasalataki gona kina o Maika: “Kakua ni dou vakadinata e dua nai tokani, kakua ni vakararavi vua na wekamu dina: mo qarauna ga nai sogo ni gusumu mai vua sa koto e na lomaseremu.”​—Maika 7:5.

E kena ibalebale oqo ni sa na vakatitiqataka o Maika na vosa ni yalayala kece ga e dau caka? E sega! E nuitaka vakaoti na vosa ni yalayala i Jiova, na nona Kalou. E vola: “Ia koi au, ka’u na rai ga vei Jiova; ka’u na waraki koya na Kalou, na noqui vakabula.”​—Maika 7:7.

Na cava e sa rui nuitaka vakaoti kina na Kalou o Maika? Baleta ni kila vinaka o koya ni dau dina tu ga o Jiova ena nona vosa. E dau vakayacora dina sara ga na nona vosa ni yalayala vei ira na tuka i Maika. (Maika 7:20) Ni dau vosa dina gona vaka oqori o Jiova e vakabauta kina o Maika ni na dina tale ga nona vosa ni yalayala me baleta na veigauna mai muri.

“Sega ni Lutu . . . na Ka Kece ga sa Vosataka”

Kena ivakaraitaki, e kila vinaka o Maika ni o Jiova a sereki ira na Isireli ena nodra tu vakabobula e Ijipita. (Maika 7:15) A tu sara ga ena veivakabulai oqori o Josua qai uqeti ira kina nona itokani Isireli mera vakabauta nona vosa ni yalayala na Kalou. Ena vuku ni cava? E tukuna vei ira o Josua: “Ia dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.”​—Josua 23:14.

O ira tale ga na lewe i Isireli era kila vinaka tu na veika vivinaka sa cakava oti vei ira o Jiova. A yalataka vua na tukadra o Eparama, e dau rerevaka na Kalou, ni na vaka na levu ni kalokalo na nona kawa ra qai taukeni Kenani tale ga, qai yaco dina na yalayala oqori. E kaya tale ga vei Eparama o Jiova nira na vakararawataki na nona kawa me 400 na yabaki, ia era na qai suka i Kenani ena “kenai kava ni tabatamata.” Era yaco taucoko na veika kece oqori.​—Vakatekivu 15:5-16; Lako Yani 3:6-8.

Era ciqomi rawarawa na Isireli e Ijipita ena gauna a tiko kina ena vanua oya o Josefa na luve i Jekope. E muri era sa qai vakabobulataki tale vei ira na kai Ijipita, ia e dina tiko ga ena nona vosa ni yalayala na Kalou, era sereki tale ni oti ga e va na itabatamata mai na gauna era tadu yani kina i Ijipita na kawa i Eparama.a

Ena 40 tale na yabaki e tarava, era se baci vakadinadinataka na Isireli ni o Jiova e dau dina tu ga ina nona vosa ni yalayala. Nira valuti ira yani na Isireli na Amalekaiti, e vala sara ga ena vukudra o Jiova qai taqomaki ira. E vakarautaka kece o koya na ka era gadreva na Isireli nira taubaletaka na vanualiwa me 40 na yabaki, ni bera nira lai cegu ena Vanua Yalataki. Ni raica lesu o Josua na veika a cakava o Jiova vei ira na kawa i Eparama, e kaya kina ena nuidei: “Sa sega ni lutu e dua na ka e na ka vinaka kecega ka vosa kina ko Jiova kivei ira na Isireli; sa yaco kece sara ga.”​—Josua 21:45.

Vakadeitaka Nomu Vakanuinui ena Yalayala ni Kalou

Na cava mo cakava mo na vakabauta dei kina na yalayala i Jiova me vakataki rau o Maika kei Josua? Sa vinaka, na cava sara mada o dau cakava mo nuitaki ira kina e so tale? Taumada o na saga mo kila e levu na ka me baleti ira. Me kena ivakaraitaki, o rawa ni kila ni tamata nuitaki ni o raica sara ga nona saga me dau dina ina ka kece e yalataka. Ni o kila tale e levu na ka me baleti koya, sa rawa ni tubu cake na nomu nuitaki koya. Oqori tale ga na ka mo cakava me na qaqaco kina na nomu vakabauta na yalayala ni Kalou.

Dua na sala oya na nomu vakasamataka na nona ibulibuli kei na lawa e lewai ira tu. Era nuitaka na saenitisi na lawa oqori, me vaka ga na lawa e vakavuna na vidai ni dua ga na sela me buli tale kina e milioni vakacaca na sela ena yago ni tamata. Na lawa e lewai ira na veika buli vaka kina na kaukaua e tu e vuravura kei na lomalagi taucoko, e kena irairai ga ni vakavuna e dua na Daubulilawa e nuitaki vakaoti. O rawa sara tale ga ni nuitaka na nona vosa ni yalayala, me vaka ga nomu nuitaka na lawa e vauca na nona ibulibuli.​—Same 139:14-16; Aisea 40:26; Iperiu 3:4.

Ena gusu i koya na parofita o Aisea na itokani i Maika, e vakayagataka o Jiova na kena sega ni veiveisau na ivakarau ni draki kei na italetale ni wai veivakurabuitaki me vakaraitaka kina na nuitaki ni nona vosa. E tau ena veiyabaki na uca. E vakasuasuataka na qele qai rawa kina nira teitei ra tatamusuki tale ga na tamata. E kaya o Jiova me baleta na tikina oqori: “Ka me vaka sa tau sobu na uca, kei na ucavulavula mai lomalagi, ka sa sega ni lesu tale yani kina, ia sa vakasuasuataka mada ga na qele, ka vakabulabulataka ka me kubu, me vuataka kina na sila vua sa kaburaka, kei na madrai vua sa kania; ena vaka talega kina na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”​—Aisea 55:10, 11.

Yalayala Dina Baleta na Parataisi

Ena tarai cake noda nuitaki koya na Dauveibuli nida dikeva na nona ibulibuli, ia e dua tale na ka e gadrevi meda cakava meda kila kina vakavinaka na tiki ni vosa ni yalayala e “vosataka.” Me rawa nida kila da qai nuitaka nona vosa yalayala, ena gadrevi meda vulica na ivola uqeti vakalou e vakamacalataka na nona inaki me baleta na vuravura kei na kawatamata.​—2 Timoci 3:14-17.

E nuitaka na vosa ni yalayala i Jiova na parofita o Maika. E levu sara na itukutuku uqeti vakalou sa tu vei iko edaidai ni vakatauvatani kei na kena a tu vua. Ni o wilika na iVolatabu o qai vakasamataka vakatitobu, o na vakabauta ni na yaco dina na nona vosa ni yalayala na Kalou. Na yalayala oqori e sega ni baleti ira ga na kawa i Eparama, e baleti ira kece na kawatamata. E yalataka o Jiova vua na peteriaki dau rerevaka na Kalou oqo: “Ena kalougata talega na veimatanitu kecega e vuravura e na nomu kawa; ni ko a vakarorogo ki domoqu.” (Vakatekivu 22:18) Na tikina levu duadua ni “kawa” oya i Eparama na Mesaia o Jisu Karisito.​—Kalatia 3:16.

Ena vakalougatataki ira gona na tamata talairawarawa o Jiova ena vuku i Jisu Karisito. Ia, na cava sa yalataka tu na Kalou me baleta noda gauna? E sauma na taro oqori na vosa ni parofisai ena Maika 4:1, 2: “Ia ena yaco e na gauna maimuri, ena vakataudeitaki na ulu-ni-vanua ni vale i Jiova me sivia na veiulu-ni-vanua, ena vueti me cecere ka lolovira na veiulu-ni-koro; a ra na drodro kina na veimataqali. A ra na lako kina na veimatanitu e vuqa, ka kaya, Me da mai lako cake ki na ulu-ni-vanua i Jiova, io ki na vale ni Kalou i Jekope; ena vakavulica vei keda ko koya na nonai valavala, ia eda na muria na nona sala.”

O ira na vulica na sala i Jiova era na “tukitukia na nodrai seleiwau mei bati ni siviyara.” Sa na sega ni dua e via veivaluvaluti tiko. Sa voleka sara nira tawani vuravura na tamata yalododonu, qai sega ni dua e vakarerei ira. (Maika 4:3, 4) Io, sa yalataka tu na Vosa ni Kalou ni na vakarusai ira kece na dauveitusaqati ni sa veiliutaki na nona Matanitu, ena veidusimaki i Jisu Karisito.​—Aisea 11:6-9; Taniela 2:44; Vakatakila 11:18.

O ira sara mada ga na vakararawataki ra qai tini mate ena vuku ni nona talaidredre na tamata vua na Kalou, era na vakaturi qai soli vei ira na inuinui ni bula tawamudu e vuravura. (Joni 5:28, 29) Ena sega tale ni kune e dua na o kei Setani vaka kina o ira na nona timoni era dau bukana tiko na veika ca, qai bokoci tale ga na ivalavala ca i Atama ena isoro ni veivoli i Jisu. (Maciu 20:28; Roma 3:23, 24; 5:12; 6:23; Vakatakila 20:1-3) Na cava ena yacovi ira na tamata talairawarawa? Era na vakalougatataki sara ga mera bula tawamudu ena ituvaki uasivi ena parataisi e vuravura!​—Same 37:10, 11; Luke 23:43; Vakatakila 21:3-5.

Sa dua dina na veivakalougatataki! O vakabauta ni na yaco dina na veika oqori? Io, e rawa sara ga ni vakabauti. Baleta ni oqo e sega ni nodra vosa ni yalayala ni tamata e lomadra dina na caka vinaka ia e sega ga vei ira na kauakaua mera cakava kina. Oqo na ka sa yalataka tu na Kalou Kaukaua duadua, e sega ni dau lasu qai “sega ni berabera . . . ni vakayacora na nona vosa ni yalayala.” (2 Pita 3:9, VV; Iperiu 6:13-18) Mo nuitaka na vosa ni yalayala kece ena iVolatabu, ni vu sara tiko ga mai vei “Jiova, na Kalou daudina.”​—Same 31:5.

[iVakamacala e ra]

[Tikina bibi ena tabana e 6]

“Ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou.”—JOSUA 23:14

[iYaloyalo ena tabana e 4]

E vakayacora o Jiova na nona vosa ni yalayala vei ira na lewe i Isireli ena Wasa Damudamu kei na vanualiwa

[iYaloyalo ena tabana e 7]

E vakayacora o Jiova na nona vosa ni yalayala vei Eparama. Ena vakalougatataka na kawatamata na nona Kawa, o Jisu Karisito