Guta o Jisu na Sokalou Dina

Oti na vakamau mai Kena, e gole i Kapenaumi o Jisu. Eratou tomani koya o tinana kei na tacina vakacabecabe o Jemesa, Josefa, Saimoni, kei Jutasa.

Na cava e lako kina i Kapenaumi o Jisu? O Kapenaumi e koro rogo ni vakatauvatani kei Nasareci se Kena, e koro levu tale ga. E levu na tisaipeli vou i Jisu era vakaitikotiko e Kapenaumi se dua na vanua voleka. E rawa gona ni vakavulici ira sara ga o Jisu ena nodra yasayasa.

A cakava tale ga e Kapenaumi o Jisu eso na ka veivakurabuitaki. Era rogoca kina e levu ena korolevu qori kei na veivanua voleka na veika e vakayacora. Ia ena sega ni dede e keri o Jisu kei ratou na nona itokani Jiu yalodina, ni ratou sa vakarau toso sara i Jerusalemi me lai solevutaki na Lakosivia ni 30 G.V.

Ni ratou tiko voli ena valenisoro e Jerusalemi, eratou raica vei Jisu nona tisaipeli e dua na ka vakasakiti eratou sega ni bau raica e liu.

Era vakaroti ena Lawa ni Kalou na Isireli mera cabora ena valenisoro na isoro manumanu. Ena vinakati tale ga mera kana na vulagi era gole yani. E vakadonui gona ena Lawa mera kauta mai na vulagi na ilavo ni nodra vanua me voli kina na “bulumakau, na sipi, na me” kei na so tale na ka ena yaga ena nodra tiko ena korolevu. (Vakarua 14:24-26) Qori na vuna era volitaki manumanu kina kei na manumanuvuka na dauveivoli e Jerusalemi ena dua na rara levu ena loma ni bai ni valenisoro. Eso na dauveivoli era vakaisini ira na lewenivanua nira lavaka vakasivia na isau ni nodra ivoli.

E cudru sara ga o Jisu, e sova nodra ilavo na dauveisauilavo, vakatoboicutaka nodra teveli, qai cemuri ira e tuba. E kaya o Jisu: “Ni kauta laivi na ka kece qo! Ni kua ni cakava tiko na vale i Tamaqu me vale ni veivoli!”​—Joni 2:16.

Ni ratou raica na tisaipeli i Jisu na veika e yaco, eratou nanuma lesu sara na parofisai me baleta na Luve ni Kalou: “Sa kani au na noqu yalogu me baleta na nomuni vale.” Ia era taroga na Jiu: “Na ivakatakilakila cava o na vakaraitaka vei keimami me tokona na ka o cakava?” E sauma o Jisu: “Ni talaraka na valenisoro qo, au na qai tara tale ena tolu na siga.”​—Joni 2:17-19; Same 69:9.

Era nanuma na Jiu ni vakaibalebaletaka tiko o Jisu na valenisoro e Jerusalemi, era mani taroga: “E 46 na yabaki na tara tiko ni valenisoro qo, o na rawa ni tara me tolu ga na siga?” (Joni 2:20) Ia e vakaibalebaletaka tiko o Jisu na yagona ni cavuta na valenisoro. Oti e tolu na yabaki, eratou qai nanuma lesu nona tisaipeli na vosa qo ni sa vakaturi.